Library · lus

John 10

10:1 "Tih tak meuhin, tih tak meuhin ka hrilh a che u, tupawh beram huanga kawngkhara lut lo a, dang lama lawn lut chu,chu mi chu englo ruk hmang leh suam hmang a ni e. 10:2 Tupawh kawngkhara lut erawh chu beram vengtu a ni. 10:3 Kawngkhar vengtuin ani chu a lo hawnsak thin a; beramten a aw an hre thin a;ama beramte chu an hmingah a ko theuh a, a hruai chhuak thin a. 10:4 A ta zawng zawng a chhuahtir veleh, an hma a hruai a, beramte chuan amah an zui thin a, a aw an hre si a. 10:5 Mi dang zawng an zui lo ang a, an tlan bosan zawk ang: mi dangte aw zawng an hriat loh avangin," a ti a. 10:6 Chu tehkhin thu chu Isua'n an hnenah a sawi a; nimahsela eng thu nge an hnenah a sawi tih an hre si lo. 10:7 Chutichuan Isua'n an hnenah a sawi leh a, "Tih tak meuhin, tih tak meuhin ka hrilh a che u, kei hi beram kawngkhar chu ka ni. 10:8 Ka hmaa lo kal zawng zawngte kha ruk hmangte,suam hmangte an ni vek a;nimahsela beramte chuan an thu an awih lo. 10:9 Kei kawngkhar chu ka ni; tupawh keimahah a luh chuan humhimin a awm ang a, a lutin a chhuak ang a, a ei tur a hmu bawk ang. 10:10 Ruk hmang chu, ru tur leh tihlum tur leh tichhe tur lo chuan a lo kal lo; kei zawng nun an neihna'n, tam taka an neihna'n, lo kal ka ni. 10:11 Kei beram vengtu tha ka ni; beram vengtu thain beramte tan a nun a pe thin. 10:12 Inhlawhfa, beram vengtu tak ni lo a, beramte a ta ni loa chuan chinghne lo kal a hmuhin beramte a tlansan thin; tin, chinghnia chuan beramte a she a, a tidarh thin; 10:13 inhlawhfa a ni a, beramte a ngaihsak loh avangin a tlan bo thin a ni. 10:14 Kei zawng beram vengtu tha ka ni; Pain mi hriat leh keiin Pa ka hriat ang hian ka ta ka hria a, ka ta pawhin mi hria a ni; 10:15 tin, beramte tan chuan ka nun ka pe. 10:16 Tin, he beram huanga mi lo hi, beram dang ka nei; anni pawh ka la rawn hruai tur a ni, ka aw pawh an hria ang; chutichuan pawl khatin an awm ang a, a vengtu pakhat nen. 10:17 "He mi avangin Pain mi hmangaih a ni, lak leh tura ka nun ka pek dawn avang hian. 10:18 Tuma'n mi laksak lo ang, keima thu thuin ka pe zawk dawn a ni. Pe thei ka ni, la leh thei pawh ka ni. He thupek hi ka Pa hnenah ka hmu a ni," a ti a. 10:19 Chung thu avang chuan Judate an inthen a, an inkhing leh a. 10:20 A then tam takin "Ramhuai a zawl a, a a a nih hi; engati nge a thu in ngaihthlak?" an ti a. 10:21 A thenin, "Heng thu hi ramhuai zawl thusawi a ni lo e. Ramhuaiin mitdel mit a tivar thei em ni?" an ti a. 10:22 Tin, Jerusalem khuaa Inpumpek Kut lai a ni a, chu chu thlasik lai a ni. 10:23 Tin, Isua Pathian biak inah, Solomona hulhliapah a vei a vei a. 10:24 Tin, Judate a velah an lo kal a, a hnenah, "Eng chen nge tuilairapin min siam dawn? Krista i nih chuan fiah takin min hrilh rawh," an ti a. 10:25 Isua'n an hnenah, "Ka hrilh tawh che u kha, in awih si lo; ka Pa hminga thil ka tih hi, he'ng hian ka chanchin a hriattir a nih hi. 10:26 Nimahsela in awih si lo, ka beram zinga mi in nih loh avangin. 10:27 Ka beramten ka aw an hre thin, kei pawhin anni chu ka hria, anni chuan mi zui thin; 10:28 an hnenah chatuana nunna ka pe a; kumkhuain an boral lo ang a, tuma'n ka kut ata mi chhuhsak hek lo ang. 10:29 Anni mi petu, ka Pa chu, mi zawng zawng aia ropui ber a ni a; tuma'n Pa kut ata chu an chhuhsak thei lo ang. 10:30 Kei leh Pa chu pumkhat kan ni," tiin a chhang a. 10:31 Tin, Judate chuan a denna turin lung an char leh a. 10:32 Tin, Isua'n anni chu a bia a, "Pa hnena chhuak hnathawh tha tam tak ka entir che u a, khang hnathawhte zingah khan hna eng avang khan nge lunga mi den dawn hi?" a ti a. 10:33 Judate chuan a hnenah, "Hna tha chungah lungin kan den dawn loh che hi; Pathian i sawichhiat chungah leh, nang, mihring ni si a, Pathiana i insiam avang zawk hian a ni," tiin an chhang a. 10:34 Isua'n an hnenah, "In Dan Lehkhabuah 'Pathiante in ni ka ti,' tih ziak a ni lo vem ni? 10:35 Pathian thu thlennate mah pathianho an tih chuan, (Pathian Lehkha Thu ban theih a ni si lo va), 10:36 Pain a ruat a, khawvela a tirha chungah hian, 'Pathian Fapa ka ni,' ka tih avangin, 'Pathian i sawichhia,' in ti a ni maw? 10:37 Ka Pa hna thawk ka nih loh chuan mi ring suh u. 10:38 Amaherawhchu thawk ka nih chuan kei mi ring lo mah u la, hnathawhte tal hi ring rawh u; Pa keimahah a awm tih leh, kei Paah ka awm tih in hriata in rinna'n," a ti a, a chhang a. 10:39 Chutichuan ani chu man an tum leh a, nimahsela an kut ata a chhuak a, 10:40 Jordan lui ralah, Johanan atira mi a baptisma lamah khan a kal bo leh a, chutah chuan a awm ta reng a. 10:41 Tin, mi tam tak a hnenah an lo kal a; "Johanan chhinchhiahna engmah zawng a ti lo a; nimahsela Johanan he mi chungchang thu a sawi apiang kha a lo dik hle hi," an ti a.Tin, chutah chuan mi tam takin amah an ring ta a. 10:42 Tin, chutah chuan mi tam takin amah an ring ta a.