Library · lus

Acts 10

10:1 Tin, Kaisari khuaah a hming Kornelia mi pakhat a awm a, Itali pawl an tih, chu mi pawla sipai za hotu a ni a, 10:2 Pathian ngaihsak mi a ni a, a chhungte zawng zawng nen Pathian an tih thin a, mite hnenah thil tam tak a pe thin a, Pathian hnenah pawh a tawngtai fo a. 10:3 Chu mi chuan behliang mun hun lai velah mumang angin fiah takin Pathian vantirhkoh pakhat a hnenah luta, "Korneli," tiin a hmu a. 10:4 Tin, Kornelia chuan ani chu a lo en reng a, a hlau a, "Lalpa, eng nge ni?" a ti a. Tin, ani chuan a hnenah, "I tawngtainate leh i thilpek thute kha hriat reng turin Pathian hmaah a thleng chho ta a. 10:5 Tunah Joppa khuaah mite tir la mi pakhat Simona, Petera an tiha chu, han hruaitir rawh; 10:6 savun siamtu Simona hnenah a thleng a ni, a in chu tuifinriat kamah a awm," a ti a. 10:7 Tin, vantirhkoh a betu chu a kal veleh, Kornelia chuan a chhiahhlawhte zinga mi pahnih leh a rawngbawl fote zinga Pathian ngaihsak sipai pakhat a ko a; 10:8 tin, thu zawng zawng chu an hnenah a hrilh zawhin Joppa khuaah chuan a tir ta a. 10:9 Tin, atukah an kal laia khaw kiang an thlen dawnin, Petera chu tawngtai turin chawfak hun laiin, in chungah a lawn chho a; 10:10 tin, a ril a lo tam a, chaw ei a duh ta a; nimahsela ei tur an siam lai chuan engloin a zel ta a. 10:11 Tin, van inhawngin englo bawm, puan lian tak ang, a kil lia hlina leia uai thlain a hmu a; 10:12 chu mi chhungah chuan fuliafa leh rannung leh chungleng sava tinrengte an awm a. 10:13 Tin, a hnenah awin, "Peter, tho rawh; talh la, ei rawh," a rawn ti a. 10:14 Nimahsela Petera chuan, "Lalpa, ni lo e; thiang lo leh bawlhhlawh engmah reng ka ei ngai lo e," a ti a. 10:15 Tin, aw chuan a vawi hnihnaah, "Pathianin a tihthiaghlim tawh chu nangin thiang lo ti suh," a ti a. 10:16 Chutiang hlirin vawi thum a lo awm a: tin, bawm chu vana khai chhohin a awm leh ta nghal a. 10:17 Tin, Petera chuan mumang anga a hmuh chu a ngaihna hre loa a mangan laiin Kornelia mi tirhte chuan Simona in chu an lo zawt chhuak tawh a, kawngkhar bulah an lo ding a, 10:18 an au a, Simona, Petera an tiha chu, chutah chuan a thlen leh thlen loh an zawt a. 10:19 Tin, Petera chuan a mumang ang thu chu a ngaihtuah laiin Thlarauin a hnenah, "Ngai teh, mi pathumin an zawng a che. 10:20 Chutichuan, tho la, chhuk la, engmah ringhlel loin anmahni zui rawh; anni chu `ka tirh an ni e," a ti a. 10:21 Chutichuan, Petera chu, chu mite hnenah chuan a chhuk a, an hnenah, "In zawn hi ka ni e; eng nge in rawn kal chhan?" a ti a. 10:22 Tin, anni chuan, "Vantirhkoh thianghlim pakhatin, Kornelia, sipai za hotu, mi fel tak, Pathian tih, Juda hnam zawng zawng zinga mi hmingtha hnenah chuan i thusawi a hriatna'n, a inah nangmah ko tur chein a hrilh a ni," an ti a. 10:23 Chutichuan mite chu a ko lut a, a riahtir ta a. Tin, atukah chuan Petera chu a tho a, an hnenah a kal a, Joppa khuaa mi unau tute emaw pawh a hnenah an kal ve a, 10:24 Tin, atuk lehah Kaisari khuaah chuan an lut ta a. Tin, Kornelia chuan a laichinte leh a thian duh berte ko khawmin, anni chu a lo nghak reng a. 10:25 Tin, Petera chu a luh dawn lai takin Kornelia chuan a lo hmuak a, a ke bulah a bawkkhup a, Pathian chibai buk angin a buk a. 10:26 Nimahsela Petera chuan ani chu a kai tho a, "Ding rawh, kei pawh mihring ka ni alawm," a ti a. 10:27 Tin, a hnenah thusawi chungin a lut a, mi tam tak awm khawm chu a va hmu a. 10:28 Tin, an hnenah, "Juda miin hnam dang pawl leh an hnena kal a thian lohzia nangnin in hria a ni; nimahsela tumah thiang lo leh bawlhhlawh ka tih tur a ni lo tih Pathianin mi hriattir a ni. 10:29 Chuvangin mi rawn koh veleh khan hnial loin ka lo kal ta a nih hi. Tichuan ka zawt a che u, eng nge mi rawn koh chhan le?" a ti a. 10:30 Tin, Kornelia chuan, "Ni li a ni ta, tun hun ang thleng hian ka inah, behliang mun hun tawngtainaah ka tawngtai a; tin, ngai teh, mi pakhat puan eng tak sinin ka hmaah a lo ding a, 10:31 'Korneli, i tawngtaina kha hriatin a awm ta, mi hnena i thilpekte pawh kha Pathianin a hre reng a. 10:32 Chuvangin Joppa khuaah mi tir la, Simona,Petera an tiha chu,i hnenah ko rawh; ani chu tuifinriat kamah savun siamtu Simona inah a thleng a ni,' a ti a. 10:33 Chuvangin i hnenah mi ka rawn tir ta nghal a ni; i lo kal hi a tha e. Chutichuan, Lalpa'n thu a pek apiang che hre turin tunah Pathian mithmuhin kan zain hetah kan awm a nih hi," a ti a. 10:34 Tin, Petera chuan a sawi a: "Pathianin mi duhsak bik a nei lo tih dik takin ka hria e; 10:35 nimahsela hnam tin zingah tupawh amah tiha fel taka ti apiang a lawmzawng mi an ni thin. 10:36 Ani chuan thlamuanna Chanchin Tha Isua Krista kaa hrilin, Israela thlahte hnenah thu a thawn a, (Isua chu mi zawng zawng Lal a ni a) 10:37 Johanan a tlangaupui thin baptisma zawhah khan, thu, Galili ram atanga lo thang tana Judai ram zawng zawnga thang chhuak kha, nangnin in hre bawk alawm; 10:38 Nazaret Isua chungchang thu kha, khatia Pathianin ani chu Thlarau Thianghlim leh thiltihtheihnaa a vurzia kha; ani chuan mi chunga titha leh diabola tihduhdah zawng zawng tidamin a fang vel thin a, Pathian a hnenah a awm avangin. 10:39 Judate ramah leh Jerusalem khuaa a thiltih zawng zawng hretute kan ni e; ani chu thinglerah khaiin an tihlum ta a. 10:40 Pathianin ani chu ni thum niin a kai tho leh a, fiah takin a entir a, 10:41 amaherawhchu, mi zawng zawng hnenah a ni lo, Pathianin hretua a ruat lawkate hnenah chauh a ni, - keimahni, mitthi zing ata a thawh leh hnua a hnena eia barte hnenah hian. 10:42 Ani chu mitthite leh mi nungte chunga Roreltua Pathian ruat chu a ni tih, mi hnena tlangaupui leh hriattir turin Pathianin thu min pe a ni. 10:43 Tupawh amah chu ring apiang a hming avangin sualte ngaihhnathiamin an awm ang tih, he'ng a chanchin hi zawlnei zawng zawngin an hriattir thin kha," a ti a. 10:44 Tin, Petera'n chung thu chu a sawi lai tak chuan thu hretute zawng zawng chungah chuan Thlarau Thianghlim a lo thleng ta a. 10:45 Tin, Serhtanho zinga ringtute Petera rawn zui apiang chuan Thlarau Thianghlim pek chu Jentailte chungah pawh leih a nih avangin mak an ti hle a; 10:46 tawng hriat lohtea thu sawiin Pathian fakin an hre si a. Tin, Petera'n a bia a, 10:47 "Heng mite, keimahni anga Thlarau Thianghlim hmu ve hi baptisma an chan lohna'n miin tui hman an khap thei em ni?" a ti a.Tichuan isua Krista hminga baptisma chan tur thu a pe a. Chung zawhah chuan ni engzat emaw chamah an ngen a. 10:48 Tichuan isua Krista hminga baptisma chan tur thu a pe a. Chung zawhah chuan ni engzat emaw chamah an ngen a.