Library · lus

Romans 14

14:1 Tin, rinnaa chak lo mi chu a rinhlelhnate sawisel loin lawm rawh u. 14:2 Mi pakhatin thil engkim ei theiin a inring a, mi chak lo erawh chuan thlai chauh a ei thin. 14:3 Engkim ei mi chuan a ei lo mi hmusit suh se; ei lo mi pawhin a ei mi chu sawisel suh se; Pathianin ani chu a lawm tawh alawm. 14:4 Mi dang chhiahhlawh sawiseltu chu tu nge maw i nih le? A din leh a tluk chu ama hotu tan a ni. Nimahsela ani zawng dintirin a awm ang, Lalpa chuan a dintir thei si a. 14:5 Mi pakhatin ni khat hi ni dang ai hian a ngaihlu bik thin a, mi dangin ni zawng zawng hi inang theuhin a ngai thin a ni. Mi tin mahni rilruah inhre chiang rawh se. 14:6 Ni serhtu chuan Lalpa chawimawina'n a serh thin a ni. Tin, engkim eitu chuan Pathian hnenah lawmthu a sawi avangin Lalpa chawimawina'n a ei thin; a ei lotu pawh chuan Pathian hnenah lawmthu a sawi a, Lalpa chawimawina'n a ei lo thin a ni. 14:7 Tumah mahni tana nung kan ni lo a, tumah mahni tana thi kan ni hek lo. 14:8 Kan nun chuan Lalpa tan kan nung a; kan thih pawhin Lalpa tan kan thi a ni si; chuvangin kan nun pawhin, kan thih pawhin, Lalpa ta kan ni. 14:9 Krista thihna leh a lo nun lehna chhan chu mi nung leh mitthi Lalpa a nih theihna hi a ni si. 14:10 Nimahsela, nangin engati nge i unau i sawisel ni? A nih loh leh, nangin engati nge i unau i hmuhsit ni? Pathian rorelna thutphah hmaah kan vaiin kan la ding dawn si a; 14:11 "Lalpa chuan, 'Mi tinreng ka hmaah an kun ang a, lei tinreng pawh Pathian hnenah a inpuang ang, tiin chhia ka chham a ni,' a ti a," tih ziak a ni si a. 14:12 Chutichuan kan zain Pathian hnenah mahni chanchin kan sawi theuh tur a ni. 14:13 Chuvangin I insawisel tawh suh ang u, tupawhin mahni unau dalna emaw tlukna emaw siam loh tum zawk rawh u. 14:14 Amah ngawtah chuan thiang lo engmah reng a awm lo tih Lalpa Isuaah chuan ka hre em em mai, englo thiang loa ngaitu tan erawh chuan amah atan chuan a thiang lo a ni. 14:15 I englo ei vangin I unau rilru a nat chuan hmangaih dan ang I zawh tawh lo a ni. A thih ai Kristan a thihsaka chu I englo eiin tiboral suh. 14:16 Chutichuan in tana thatna chu sual lama sawiin awm suh se; 14:17 Pathian ram chu ei leh in lam thu a ni si lo a, felna te, remna te, Thlarau Thianghlima lawmna te a ni zawk e. 14:18 Tupawh chung thu-ah chuan Krista rawngbawl chu Pathian lawmzawng leh mihring fakin a awm thin a ni. 14:19 Chutichuan inremna tur leh intihsawt tawnna tur thilte chu i um ang u. 14:20 I englo ei vangin Pathian hnathawh tichhe suh. Thil zawng zawng a thianghlim ngei mai, nimahsela a englo eiin mi a tihtluk chuan a eitu tan sualna a ni. 14:21 I unau tlukna tur a nih chuan sa ei loh te, uain in loh te, thil engpawh tih loh a tha a ni. 14:22 Rinna i neih chu Pathian hmaah nangmah chauha hriatin nei mai rawh. Mahni tha tih kawnga thiam loh inchantir lo chu a eng a thawl e.Amaherawhchu ringhleltuin a ei chuan rinnain a ei loh avangin thiam loh a chang a ni; engpawh rinna loa tih chu sual a ni si a. 14:23 Amaherawhchu ringhleltuin a ei chuan rinnain a ei loh avangin thiam loh a chang a ni; engpawh rinna loa tih chu sual a ni si a.