Library · lus

1 Corinthians 16

16:1 Tin, mi thianghlimte tana thawhlawm thu kha zawng, Galatia rama kohhranho pawl hnenahte thu ka pek angin nangni pawhin lo ti ve rawh u. 16:2 Ni sarih ni hmasa berah chuan mi tinin, malsawmna in hmuh angzia zelin dah khawl theuh u la; ka lo kal huna thawhlawm khawn reng reng a awm lohna'n. 16:3 Tin, in khawngaih thilpek chu Jerusalem khuaa kalpui turin ka lo thlen hunin tupawh tha in tih apiang lehkhate kengin ka tir ang. 16:4 Tin, ka kal vena awm a nih phei chuan ka hnenah an kal ang. 16:5 Tin, Makedonia ram ka fan chhuah hnuah chuan in hnenah ka lo kal ang; Makedonia ram chu ka fang reng reng dawn si a. 16:6 Nangni hnenah erawh chuan ka cham reng a ni thei e, thlasik chhung zawng pawh a ni mahna, khawiah pawh ka kalna tur apiangah nangnin mi thlah theihna turin. 16:7 Tuna kal pah maia hmuh che u ka duh lo a, Lalpa'n rem a tih chuan in hnenah rei deuh cham ka beisei si a. 16:8 Nimahsela, Pentikost thlengin Ephesi khuaah hian ka cham reng ang, 16:9 kawngka zau tak leh sawt tak ka tan a inhawng si a,dotute tam tak an awm bawk. 16:10 Tin, Timothea kha a lo thlen chuan ti loa in hnena a awmna'n fimkhur rawh u; keiin ka thawh ang bawk hian Lalpa hna chu a thawk si a. 16:11 Chuvangin, tuma'n hmusit suh se; ka hnena a lo kal theihna'n thlamuang takin thlah zawk ang che u; unaute rualin amah lo hmuh ka beisei si a. 16:12 Kan unau Apollova thu kha chu, unaute ruala in hnena lo kal turin ka ngen chiam a, nimahsela tunah zawng lo kal a duh hauh lo a; a remchan hunah erawh chun a lo kal ang. 16:13 Inveng u la, rinnaah chuan ding nghet u la, intihuai u la, chak takin awm rawh u. 16:14 In tih apiang chu hmangaiha tih ni vek rawh se. 16:15 Unaute u, Stephana chhungte chu Akaia rama awih hmahruaitute an ni a, mi thianghlimte rawngbawl turin an inpe tih in hria e; 16:16 chutiang mite hnenah leh, hnathawha tanpui leh, thawk rim apiangte hnenah chuan intulut turin ka ngen a che u. 16:17 Tin, Stephana te, Phortunata te, Akaika te an lo kal hi ka lawm a ni, in awm loh pawh lang loin mi siam avangin. 16:18 Anni hian ka rilru leh in rilru an tiharh si a, chutichuan hetiang mite hi lawm rawh u. 16:19 Asia ram kohhranho pawlte hian chibai an buk a che u. Akuila leh Priskilli, an ina kohhran inkhawmho nen hian Lalpaah chuan chibai tam takin an buk a che u. 16:20 Unau zawng zawng hian chibai an buk a che u. Fawh thianghlimin chibai inbuk theuh rawh u. 16:21 Kei Paulan keima kut ngeia chibai ka bukna che u a nih hi. 16:22 Tupawhin Lalpa a hmangaih loh chuan anchhe dawngin awm rawh se. Kan Lalpa chu a lo kal e. 16:23 Lalpa Isua Krista khawngaihna chu in hnenah awm rawh se.Krista Isuaa ka hmangaihna hi inzaa hnenah awm rawh se. Amen. 16:24 Krista Isuaa ka hmangaihna hi inzaa hnenah awm rawh se. Amen.