Library · lus

1 Corinthians 6

6:1 In zingah tupawhin mi dang chungah thupawi nei u la, mi thianghlimte hmaa thlen loin, mi fel lote hmaah in thlen ngam dawn em ni? 6:2 A nih leh, mi thianghlimte chuan khawvel an ngaihtuah dawn tih in hre lo em ni le? Tin khawvel mah hi in ngaihtuaha a awm dawn chuan thil te berte pawh chu ngaihtuah tlak lo em ni in nih le? 6:3 Tun dam chhung khawsak thute chu sawi loh, vantirhkohte lam pawh kan ngaihtuah dawn tih in hre lo em ni? 6:4 Chutichuan tun dam chhung khawsak thute ngaihtuah tur in neihin kohhranho zinga mi hmuhsitawmte chu in ngaihtuahtir thin em ni? 6:5 In zahna turin ka sawi a ni. A unaute kara thu titlu thei mi fing pakhat tal in zingah in hmu thei lo a ni ang maw, 6:6 unauin a unau rorelnaa a thlen zawk thin? Ring lote hmaah a ni nghal si. 6:7 A ni, hei hi in fel zawh zan lohna pakhat chu a ni pang mai, thupawi inneih tawn thin hi. Engati nge dik lo taka tihna chu in tuar zawk loh? Engati nge tihdawnna chu in tuar zawk loh? 6:8 A ni, nangmahni ngeiin in unaute chungh pawh in tidik lo a, in tidawng zawk thin. 6:9 A nih leh, mi fel lote chuan Pathian ram an luah lo ang tih in hre lo em ni le? Bumin awm suh u; inngaih hmangte emaw, milem betute emaw, uirete emaw, mi hurte emaw, mawngkawhurte emaw, 6:10 ruk hmangte emaw, mi duhamte emaw, zu ruih hmangte emaw, mi hau hmangte emaw, hleprute emawin Pathian ram an luah lo ang. 6:11 Tin, nangni thenkhat chutiang mi in nih thin kha; nimahsela Lalpa Isua Krsta hmingah leh kan Pathian Thlarauvah tlenfai in ni tawh a, tihthianghlim in ni tawh a, thiam chang in ni tawh. 6:12 Thil engkim tih ka tan a thiang a, nimahsela thil engkim tih a tha kher lo; thil engkim tih ka tan a thiang a, nimahsela eng bawihah mah ka inphal lo. 6:13 Ei turte chu pum tan a ni a, pum chu ei turte tan a ni; nimahsela Pathianin a tiboral ve ve dawn. Tin, taksa hi inngaihna'n a ni lo a, Lalpa tan a ni zawk e; Lalpa pawh chu taksa tan a ni. 6:14 Tin, Pathianin Lalpa chu a kai tho a, keini pawh a thiltihtheihnain min kai tho ve bawk ang. 6:15 In taksa chu Krista pengte a ni tih in hre lo em ni? Krista pengte chu laksakin nawhchizuar pengahte ka siam dawn em ni le? Hnai lo e. 6:16 A nih leh, nawhchizuar zawm chu amah nen pumkhat an ni tih in hre lo em ni le? "An pahnihin tisa pumkhat an lo ni tawh ang," a ti si a. 6:17 Lalpa zawm erawh chu amah nen thlarau pumkhat an ni. 6:18 Inngaih hi tlansan rawh u. Mihring thil tihsual tinreng hi taksa pawn lamah a ni; mi ngaih hmang erawh chuan ama taksa chungah thil a tisual a ni. 6:19 A nih leh, in taksa chu,in chhunga awm Pathian hnen atanga in hmuh Thlarau Thianghlim in a ni tih in hre lo em ni le? Mahni ta pawh in ni lo a,Mana lei in ni tawh a sin, chuvangin in taksaah chuan Pathian chawimawi rawh u. 6:20 Mana lei in ni tawh a sin, chuvangin in taksaah chuan Pathian chawimawi rawh u.