Library · lus

Galatians 1

1:1 Paula, tirhkoh (mihringte tirh chhuah ni loin, mihring zarah ni hek loin, Isua Krista leh mitthi zing ata a kai thotu, Pa Pathian zarah a ni zawk) leh, 1:2 ka hnena unau awm zawng zawngte chuan Galatia rama kohhranhote hnenah, 1:3 Pa Pathian leh kan Lalpa Isua Krista hnen ata khawngaihna leh remna in hnenah awm rawh se: 1:4 ani chuan kan Pathian leh kan Pa remtihzawngin tun lai khawvel sual tak lakah hian min chhan chhuah theihna'n kan sualte aiah amah a inpe ta; 1:5 Pathian hnenah chuan ropuina chatuanin awm rawh se. Amen. 1:6 Krista khawngaihna zara a kotu che u kha chuti thuta Chanchin Tha hrang lama in pakaisan hi mak ka ti a ni; 1:7 chu chu Chanchin Tha a ni ve si lo; nangmahni tibuaiin, Krista Chanchin Tha tihdanglam duh tute emaw an awm mai a ni a. 1:8 Nimahsela, keimahniin emaw, van atanga lo chhuk vantirhkoh pawhin emaw, Chanchin Tha kan hrilh che u lo kha chu Chanchin Tha dang reng lo hrilh che u se la, anchhe dawngin awm rawh se. 1:9 Hmana kan sawi ang khan tunah ka sawi leh dawn a ni, "Chanchin Tha in pawma lo kha chu, Chanchin Tha dang tupawhin hrilh che u se la, anchhe dawngin awm rawh se," 1:10 Mihring tihlawm nge ka tum, Pathian tihlawm? Mi zinga tlaktlum tum ka ni em ni? Ni i la, Krista bawih ka ni lo ang. 1:11 Chutichuan, unaute u, ka Chanchin Tha hrilh kha mihring lam thu a ni lo tih ka hriattir a che u. 1:12 Mihring hnen ata hmu ka ni hek lo, mi mi zirtir ka ni hek lo, Isua Krista inlarna avanga hmu ka ni zawk si a. 1:13 Judate sakhaw biak danah chuan hman laia ka awm dan chu in hre tawh si a, khatia Pathian Kohhranho nasa taka tiduhdahin ka tihbuai thin kha; 1:14 tin, mi thlahtute thurochhiah chunga thahnem ka ngaih nasat bik avangin Judate sakhaw biak dan kawngah chuan ka chite zinga ka rualpui tam takte ka lehpel ta a. 1:15 Tin, ka nu pum chhung atanga mi tihrangtu leh a khawngaihna avanga mi kotu Pathian chuan, 1:16 Jentailte zinga a Chanchin Tha ka hrilh theihna'n a Fapa chu ka hnena a inlartir lai khan, tumah rawn loin, 1:17 tirhkoh ka nih hmaa tirhkoh lo ni tawhte hnenah Jerusalem khuaa han kal hek loin, Arabia ramah ka kal bo ta nghal zawk a; tin, Damaska khuaah ka kir leh ta a. 1:18 Tin, kum thum a vei hnuin Kipha kan turin Jerusalem khuaah kan han kal a, a hnenah ni sawm leh ni nga ka cham a, 1:19 Tirhkoh dangte erawh chu Lalpa unau Jakoba chauh lo chu tumah ka hmu lo a. 1:20 (Ngai teh mah u! In hnena thu ka ziakte hi Pathian mithmuhah pawh ka daw lo e). 1:21 Chu mi hnuah chuan Suria leh Kilikia ramahte ka lo kal a. 1:22 Nimahsela,Judai ram kohhranho Kristaa awmte hmelhriat ka la ni lo ta fo a. 1:23 "Hmana min tiduhdahtu khan hmana rinna thu a tihkhawloh thin kha tunah a hril ta zawk a ni," tih mi sawi chauh an hria a.Tin, keimah avangin Pathian an chawimawi ta a. 1:24 Tin, keimah avangin Pathian an chawimawi ta a.