Galatians 5
5:1 Bawih ni lo turin Krista chuan min chhuahtir kha, chutichuan ding nghet u la, bawih nghawngkawlah chuan tang leh tawh suh u.
5:2 Ngai teh u, kei Paulan in hnena ka sawi hi, serh in tantir chuan Krista chu in tan engmah sawtna a ni lo ang.
5:3 A ni, Dan thu zawng zawng zawm tura batu an ni tih serh tantir apiang hnenah ka hriattir leh a nih hi.
5:4 Nangni Dana thiam chan tumte u, Krista nen in inthen ta: khawngaihna chu in tluksan ta.
5:5 Keini zawngin Thlarau zarah rinnain felna beiseina kannghak si a.
5:6 Krista Isuaah chuan serh tan engmah a sawt lo, serh tanloh pawh engmah a sawt hek lo; rinna, hmangaihnaa thawh erawh chu a sawt a ni.
5:7 Tha takin in tlan thin kha le; thutak chu in zawm lohna'n tuin nge dal ta che u?
5:8 He thlemna hi a kotu che u hnen ata a ni lo e.
5:9 Dawidim tlem tein chhang hlawm chu apumin a fan chhuak thin.
5:10 Rilru danglam in pu lo ang tih Lalpaah chuan ka ring tlat a; tibuaitu che u chu atua pawh ni se la, a chunga rorelna chu a la tuar ang.
5:11 Unaute u, kei hian serh tan thu hril ni i la tihduhdah ka ni cheu dawn em ni? Chuti ni se Kraws thu kan hril hian buaina a siam lo tur.
5:12 Tibuaitute che u chu intan fithla law law se la ka duh a ni.
5:13 Nangni unaute u, bawih ni lo turin koh in ni si a; nimahsela in bawih nih lohna chu tisa tana remchangah hmang suh u la, hmangaihnain rawng inbawlsak tawn theuh zawk rawh u.
5:14 "Nangmah i inhmangaih angin i vengte i hmangaih tur a ni," tih thu kamkhatah hian Dan thu zawng zawng chu a famkim tawh a ni si.
5:15 Nimahsela, in inseh a, in inei tawn si chuan in intihboral tawn lohna'n fimkhur rawh u.
5:16 Chutichuan, hei hi ka ti a ni: Thlarau vah awm rawh u, tichuan tisa chakna chu in zawm dawn lo nia.
5:17 Tisa hian Thlarau dona lam a chak thin, Thlarau pawhin tisa dona lam a chak bawk si thin; thil tih in tumte chu in tih theih lohna'n chungte chu an inkalh si.
5:18 Nimahsela, Thlarau hruaia in awm chuan Dan hnuaiah chuan in awm lo e.
5:19 Tin, tisa thiltihte chu a lang fiah a ni; chung chu he'ng hi a ni: inngaihna te, bawlhhlawhna te, hurna te,
5:20 milem biakna te, dawithiamna te, huatna te, inhauna te, thikna te, thinurna te, inkhinna te, awm hranna te, rin hranna te,
5:21 itsikna te, zu ruihna te, zu hmun hlimna te, chutiangte chu: chung kawngah chuan tun hmaa, "Chutiang thil tih hmangte chuan Pathian ram an chang lo ang," tia ka hrilh lawk che u ang khan ka hrilh lawk che u hi.
5:22 Thlarau rah erawh chu hmangaihna te, hlimna te, remna te, dawhtheihna te, ngilneihna te, thatna te, rinawmna te,
5:23 thuhnuairawlhna te, insumtheihna te a ni zawk e; chutiang kalhzawngin Dan thupek reng a awm lo e.
5:24 Tin, Krista Isua mite chuan tisa chu, a sual ngaihtuahna leh a chaknate chawpin an khengbet ta.
5:25 Thlaraua nung kan nih chuan Thlarauvah vek i awm leh bawk ang u.Incho tawna initsik tawnin i inngaihlu suh ang u.
5:26 Incho tawna initsik tawnin i inngaihlu suh ang u.