Library · lus

Ephesians 5

5:1 Chutichuan, a fa duh takte angin Pathian awm dan latute ni rawh u. 5:2 Tin, Kristan a hmangaih che u a, rimtui atan Pathian hnena thilhlanah leh inthawinaa kan aia a inpek ang bawk khan hmangaihnaah awm rawh u. 5:3 Nimahsela, mi thianghlimte tiha mawi awm rengin, inngaih leh bawlhhlawh zawng zawng, duhamna nen in zingah lam pawh lamin awm suh se; 5:4 zahmawh te, thu lawi lo sawi te, fiamthu te pawh, chung chu a mawi lo a ni; chung tih ai chuan lawmthu hrilh zawk rawh u. 5:5 Inngaih hmang leh mi bawlhhlawh leh mi duham reng reng chuan (mi duham chu milem betu a ni a) Krista leh Pathian ramah chuan chan reng an nei lo a ni tih in hre hle si a. 5:6 Tuma'n thu lawi lo maiin bum che u suh se; chung thil avang chuan Pathian thinur chu awih lo fate chungah a thleng si thin a. 5:7 Chuvangin, anmahni tawmpui suh ang che u. 5:8 Hmanah khan thim in ni a, tunah erawh chuan Lalpaah chuan eng in lo nih tak hi; 5:9 Lalpa lawmzawng eng nge ni tih fiahin, eng fate angin awm rawh u, 5:10 eng rah chu thatna leh, felna leh, thutak zawng zawngah a lang si a. 5:11 Tin, thim thiltih rah nei ngai loahte chuan telna reng nei suh u la, tel ahnekin a thiam lohzia hriattir zawk rawh u; 5:12 a ruka an thil tih thinte chu a sawi pawh a zahthlak si a. 5:13 Amaherawhchu thil engkim a thiam lohzia hriattira awm hi eng tihlan a ni thin: tihlana awm apiang chu eng a ni si a. 5:14 Chuvangin, "Nang muhil! meng la, mitthi zing ata tho rawh, tichuan Krista chuan a chhun eng ang che," a tih kha. 5:15 Chutichuan, mi fing lote anga awm loin mi fingte anga awm zawkin, in awm danah fimkhur rawh u; 5:16 nite hi a that loh avangin remchannate lei zel rawh u. 5:17 Chu mi avang chuan a duh suh u la, Lalpa duhzawng eng nge ni tih lo hre zawk rawh u. 5:18 Tin, uaiin ruiin awm suh u, chu miah chuan insum lohna a awm si a; Thlarauva khatin awm zawk rawh u. 5:19 Fakna hlate, Pathian hlate, thlarau lam hlatea inbe tawnin, Lalpa chu in thinlungah hla saksakin, tingtang kaihsak rawh u. 5:20 Kan Lalpa Isua Krista hmingin, Pathian, Pa ngei hnenah chuan engkim chungah lawmthu hril fo rawh u. 5:21 Krista tih dekin intulut tawn theuh rawh u. 5:22 Nupuite u, Lalpa hnena in intulut ang hian mahni pasalte hnenah intulut rawh u. 5:23 Krista chu amah ngei taksa chhandamtu nia kohhranho lu a ni ang bawk hian, pasal chu nupui lu a ni si a. 5:24 Chutichuan, kohhranho Krista hnena an intulut ang bawk hian nupuite chu engkimah an pasalte hnenah intulut rawh se. 5:25 Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khan, 5:26 anni chu tuia sila thu chuan tifaiin a tihthianghlim theihna'n; 5:27 chutichuan kohhranho chu bawlhhlawh kai lo leh zur lo leh, chutiang thil reng pu loin, thianghlim leh hmelhem loa awm zawkin, amah leh amah kohhranho ropui takah a inpe chawp thei ang. 5:28 Chutiang bawkin pasalte pawhin mahni taksate angin mahni nupuite chu an hmangaih tur a ni. Mahni nupui hmangaihtu chu mahni inhmangaih a ni. 5:29 Tuma'n mahni tisa an haw ngai si lo a, an chawmin an duat zawk thin a ni. Kristan kohhranho a chawmin a duat ang hian; 5:30 a taksa pengte kan ni si a. 5:31 Chu mi avang chuan mipain a nu leh pa kalsanin a nupui a vuan ang a, tin, an pahnih chuan tisa pumkhat an lo ni tawh ang. 5:32 Hei hi thu ril thuk tak a ni; Krista leh a kohhran thu kei chuan a sawina niin ka hria.Engpawh ni se, tupawhin mahni a inhmangaih angin mahni nupui hmangaih theuh se la, nupui pawhin a pasal hlau thiam rawh se. 5:33 Engpawh ni se, tupawhin mahni a inhmangaih angin mahni nupui hmangaih theuh se la, nupui pawhin a pasal hlau thiam rawh se.