Philippians 3
3:1 A tawp berah chuan ka unaute u, Lalpaah lawm rawh u. Thu pangngaite in hnena ziak nawn leh hi keia tan zawng ninawm a ni lo e, nangni tan a sawt bawk si a.
3:2 Ui lakahte chuan fimkhur rawh u, thil tha lo titute lakah chuan fimkhur rawh u. Innghaisaho lakah chuan fimkhur rawh u.
3:3 Keini Pathian Thlarau zara Pathian bia leh, Krista Isua chhuang leh, tisa chunga rinna reng nghat lotute hi Serhtanho kan ni zawk si a.
3:4 Duh phei i la, kei pawh tisa chunga rinna nghat thei ka ni a sin. Mi dang reng rengin tisa chunga rinna nghahchhan neia an inruat chuan kei ka inruat lehzual a ni;
3:5 Ni riat nia serh tan, Israela thlaha mi, Benjamina chia mi, Hebraite laka Hebraia piang ka ni a; Dan lamah chuan Pharisai ka ni a;
3:6 thahnemngaih lamah chuan kohhranho tiduhdahtu ka ni a; Dan thua felna lamah chuan sawiselbo ka ni.
3:7 Nimahsela, ka tana hlawkna tur apiangte chu chung chu Krista avangin channaah ka ruat ta a ni.
3:8 A ni tak meuh mai, ka Lalpa Krista Isua hriatna ropui bikzia avangin thil engkim pawh channaah ka ruat a ni; amah avangin thil zawng zawng ka chan ta vek a, chung chu hnawmhneah lek ka ngai a, Krista ka hmuh theihna tur leh,
3:9 mahni felna (Dana felna chu) nei loin, Krista rin avanga felna (rin avanga Pathian laka felna chu) nei zawkin, amaha awm ka lo nih theihna turin;
3:10 a thihna anpuia thiin, amah nen, a thawhlehna thiltihtheihna nen, a tuarnate tawmpuina nen ka hriat theihna'n;
3:11 mitthi zing ata thawhlehna chu ka chang thei hram mahna, tiin.
3:12 Hmu thawh reng inti ka ni lo a, famkim tawh reng inti pawh ka ni hek lo; "Krista mi man chhan chu ka man thei dah law maw," tiin a umin ka um zawk a ni.
3:13 Unaute u, manah ka inngai lo. Amaherawhchu he thil pakhat hi ka ti thin - hnung lama thil awmte chu theihnghilha, hma lama thil awmte chu banin,
3:14 Krista Isuaa Pathian chung lam koh chhan lawman hmu turin, tiam chin lam chu ka pan talh talh a ni.
3:15 Chutichuan, puitling apiang chutiang rilru puin i awm ang u; tin, eng kawngah pawh rilru danglam pu in lo nih chuan, chu pawh chu Pathianin a la hriattir ang che u.
3:16 Engpawh ni se la, kan thlen chin atang khan hma i sawn zel ang u.
3:17 Unaute u, ka awm dan zirtute lo ni hlawm rawh u, tin, entawn tur keini min nei a, chu mi ang zela awmte chu en tha rawh u.
3:18 Mi tam tak an kal a, chu mite chu Krista kraws hmelma an ni tih an chanchin ka hrilh fo che u kha, tunah pawh tap chungin ka hrilh che u hi;
3:19 chungho tawpna chu boralna a ni, an pathian chu an pum a ni, an ropuina pawh chu an mualphona a ni, khawvel thil an duh thin a ni.
3:20 Keini zawng van khua leh tui kan ni si a, van atanga min chhandamtu Lal Isua Krista lo kal tur chu nghakhlel takin ka thlir a ni.Ani chuan a thawhin, engkim pawh ama thu thuin a awmtir thei, chu mi thawhzia ang zelin kan tlawm lai taksa hi, ama taksa ropui anga awm turin a siam tha leh ang.
3:21 Ani chuan a thawhin, engkim pawh ama thu thuin a awmtir thei, chu mi thawhzia ang zelin kan tlawm lai taksa hi, ama taksa ropui anga awm turin a siam tha leh ang.