Library · lus

1 Thessalonians 5

5:1 Amaherawhchu, unaute u, a hun leh a ni kawng thute reng ziaksak che u in ngai lo e. 5:2 Lalpa Ni chu zanah rukru angin a lo thleng dawn tih nangmahni ngeiin chiang takin in hre si a. 5:3 "Muanna leh himna," tia an sawi lai takin hmeichhe nau vei angin chawp leh chilha boralna an chungah a thleng ang a, an pumpelh tawp lo ang. 5:4 Nimahsela, unaute u, nangni zawng chu mi Ni chuan rukru ang a nanna tur che uin thimah in awm lo e; 5:5 eng fate leh ni fate in ni vek si a; zana mi kan ni lo a, thima mi kan ni hek lo. 5:6 Chuvangin, mi dangte angin i muhil suh ang u khai, i mengin i ngaihven zawk ang u. 5:7 Muhilte chu zanah a ni, an muthilh thin ni; zu ruite pawh chu zanah a ni, an ruih thin ni. 5:8 Nimahsela, keini zawng chhuna mi kan nih avang hian rinna leh hmangaihna awmphaw chu hain, chhandam beiseina chu lukhuma hmangin i ngaihven zawk ang u. 5:9 Pathianin thinurna tuar tur ni loin, kan Lalpa Isua Krista zara chhandamna hmu tur zawkin min ruat a ni si a; 5:10 kan men pawhin kan muthilh pawhin amah nena kan nun tlan theihna'n ani chu kan thih aiin a thi a ni. 5:11 Chuvangin, infuih tawnin, intisawt tawn theuh rawh u, in tih reng thin ang hian. 5:12 Nimahsela, unaute u, in zinga thawkrim leh, Lalpaa in hotua awm leh, zilhtute che u chu hre tur leh, an hnathawh vanga hmangaiha ngaihlu em em turin kan ngen che u a ni. 5:13 Inremin awm rawh u. 5:14 Tin, unau te u, kan ngen a che u, dan ang loa awmte chu zilh u la, rilru tete chu fuih u la, chak lote chu tanpui u la, mi zawng zawng lakah dawhthei takin awm rawh u. 5:15 Tuma'n tu sual pawh suala thungrul lo turin fimkhur rawh u; in thil intihsak tawnna lamah leh, mi zawng zawng chunga in tihsakna lamah pawh, a tha apiang um fo zawk rawh u. 5:16 Lawm fo u la; 5:17 Bang loin tawngtai u la; 5:18 engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a. 5:19 Thlarau chu timit suh u la; 5:20 Thu hrilte hmusit suh u; 5:21 Engkim fiah zawk u la: a tha apiang pawm tlat u la; 5:22 Sual tinreng lakah inthiarfihlim rawh u. 5:23 Tin, remna Pathian ngei chuan in pumin tithianghlim che u rawh se; tin, in thlarau leh, in rilru leh, in taksa chu kan Lalpa Isua Krista lo kal hunah chuan sawiselboin apuma humhimin awm rawh se. 5:24 A kotu che u chu a rinawm a, tih pawh a ti bawk ang. 5:25 Unaute u, min tawngtaisak rawh u. 5:26 Unau zawng zawngte chu fawh thianghlimin chibai mi buksak rawh u. 5:27 He lehkha hi unau zawng zawng hnenah chuan chhiar turin Lalpa hmingin ka ngen a che u.Kan Lalpa Isua Krista khawngaihna chu in hnenah awm rawh se. 5:28 Kan Lalpa Isua Krista khawngaihna chu in hnenah awm rawh se.