Library · lus

2 Timothy 2

2:1 Chutichuan, nang ka fa, Krista Isuaa khawngaihna awmah hian thiltihtheihna neiin awm ang che. 2:2 Tin, hretu tam takte zinga ka kaa thu i hriatte kha, chung chu mi rinawm, mi dangte zirtir chhawng thei tur angte hnenah chuan kawltir rawh. 2:3 Krista Isua sipai tha tak angin hrehawm mi tuarpui rawh. 2:4 Sipaia awm tura thlangtu chu a tihlawm theihna'n, sipai tumah indo laiin tun damchhung khawsaknate hian a intihnawk ngai lo a. 2:5 Tin, intihsiaknaahte pawh chuan miin bei mah se la, dan angin a beih loh chuan khumtirin a awm ngai lo a. 2:6 Lo neitu thawk rim chu a rah chang hmasatu a ni tur a ni. 2:7 Ka thusawi hi ngaihtuah rawh; Lalpa chuan kawng engkimah hriat theihna a pe dawn si chia. 2:8 Isua Krista, Davida thlaha mi, ka Chanchin Tha sawi anga mitthi zing ata tho leha kha hre reng rawh; 2:9 chu Chanchin Tha avang chuan thil tisualtu angin phuar khawp hialin hrehawmte ka tuar thin a ni; nimahsela Pathian thu chu phuarin a awm si lo. 2:10 Chuvangin, Krista Isuaa awm chhandamna chu chatuana ropuina nen an hmuh ve theihna turin, Thlante avang chuan engkim ka tuar thin. 2:11 He thu hi a rinawm a ni: "A thihnaah kan thih tawh si chuan, a nunnah kan nung bawk ang; 2:12 Kan tuar chuan a rorelnaah ro kan rel ang; Amah kan phatsan chuan Ani pawhin min phatsan ang; 2:13 Keini rinawm loin awm mah i la, Ani chu rinawmin a awm reng a ni; Amah leh amah a inphat thei si lo a," tih hi. 2:14 Chung thu chu hriatpui la, thu mai mai chunga an inhnial lohna'n Lalpa mithmuhah thahnemngai takin hriattir rawh, chu chu engmah a sawt lo a, a ngaithlatute tan boralna a ni zawk thin. 2:15 Hnathawktu, thutak thu fel taka hmang chu zak tur a ni lo angin, Pathian ngaiha thaa inentir turin thahnem ngai rawh. 2:16 Amaherawhchu, Pathian zah lo lam thu sawi mai mai chu hawisan thin ang che; chutiang mite chu Pathianngaihsak lohna lamah an nasa lehzual ang a, 2:17 an thu pawh chuan pan chhe ei angin a ei zel ang; an zingah chuan Humenaia leh Phileta an tel a ni; 2:18 chung mite chuan, "Thawhlehna chu tunah pawh a ni tawh daih," tiin thutak kawng chu an kal kawisan a, mi thenkhatte rinna an tibo thin a. 2:19 Nimahsela, Pathian lungphum nghet chu a la ding reng a, he chhinchhiahna hi a nei a: "Lalpa chuan ama tate chu a hria," tih leh, "Lalpa hming lam apiang chuan sual kalsan rawh se," tih hi. 2:20 Nimahsela, in ropuiah hian bungbel, rangkachak leh tangkaruaa siam mi chauh a awm lo a, thing leh belleia siam mite pawh a awm thin a; thenkhatte ngaihhlut tur a awm bawk a, thenkhatte chu ngaihhlut loh tur a awm bawk a. 2:21 Chuvangin, chung thil laka mi a inthiarfihlim chuan bungbel thianghlim, Lalpa hman tlak, hnathawh tha tinrenga inpeih sa, ngaihhlut tur mi a ni ang. 2:22 Nimahsela, tleirawl chaknate chu tlansan la, thinlung thianghlima Lalpa lam apiangte zingah chuan felna te, rinna te, hmangaihna te, remna te um ve rawh. 2:23 Amaherawhchu, indonate a hring thin tih hriain, inhnialna atthlak leh fing lovahte chuan tel duh suh. 2:24 Lalpa bawih chuan do tur a ni si lo a, mi zawng zawng chungah zaidamin, zirtir thiamin, sual chungah dawhtheiin, 2:25 do tura insiamte chu thuhnuairawlh takin a zirtir zawk tur a ni; chutichuan Pathianin thutak chu an hriat famkimna'n a simtir hlauhin,Pathian duhzawng ti atan Lalpa bawihin a manin, Diabola thang ata an chhuak thei mahna. 2:26 Pathian duhzawng ti atan Lalpa bawihin a manin, Diabola thang ata an chhuak thei mahna.