1 Peter 2
2:1 Chutichuan, sualna zawng zawng te, ngamthlemna zawng zawng te, vervekna te, itsikna te, sawichiatna zawng zawng te bansan u la,
2:2 nausen piang tharte angin thlarau lam hnute, engmah pawlh loh chu chak rawh u, chu miah chuan chhandamna tling khawpa in than len theihna'n;
2:3 Lalpa chu mi khawngaih thei tak a ni tih in hriat tawh phawt chuan.
2:4 Amah chu lung nung, mihringte duh loh ngei, Pathian ngaihah erawh chuan thlan leh hlu tak a ni, ama hnenah chuan lo kalin,
2:5 nangni pawh lung nungte angin thlarau lam ina rem chhohin in awm, Isua Krista zara Pathian lawmzawng thlarau lam inthawina hlan turin puithiam thianghlimho in lo nihna'n.
2:6 Chuvangin, Pathian Lehkha Thuah chuan, "Ngai teh u, Zionah chuan a kila lung pawimawh ber, thlan, hlu tak ka rem a ni; Amah ringtu chu a mualpho lo ang," tih a chuang a ni.
2:7 Chutichuan,nangni a awihte tan chuan hlu tak a ni,a awih lote tan erawh chuan, "In satuten lung an duh loh kha,chu ngei chu a kila lung tangkai ber a lo ni ta,
2:8 Tlukna lung leh dalna lungpui" nen. An awih lo a, thu-ah chuan an tlu si thin a; chutianga ti turin ruat an ni reng bawk a.
2:9 Nimahsela, thim ata chhuaka, a eng mak taka lut tura kotu che u thatna chu in entir theihna'n nangni zawng chi thlan, lal puithiamho, hnam thianghlim, Pathian mite ngei in ni si a;
2:10 hman lai khan mi reng in ni lo a, tunah erwh chuan Pathian mi in ni ta a; hman lai khan zahngaihna in hmu lo a,tunah erawh chuan zahngaihna in hmu ta a.
2:11 Duh takte u, mikhual leh khualzin in nih avangin, thlarau do thintu tisa chaknate bansan turin ka ngen a che u;
2:12 Jentailte zinga in chetzia chu mawi tak ni rawh se,chutichuan thil tisualtute anga an sawichhiat che u kawngah chuan in thil tihthat an hmuhte avangin fanin an awm hunah chuan Pathian an chawimawi thei ang.
2:13 Lalpa avang chuan mihring ruat apiangte hnenah intulut rawh u, chungnunga awm lalber hnenah emaw,
2:14 thiltisualtute chunga phuba la tur leh, thil tithatute fak tura ama tirh chhawn Ram Awptu hnenah pawh.
2:15 Hei hi Pathian duhzawng a ni si, mi ate thusawi fing lo chu thil tha tia in tihdan hi;
2:16 zalen in ni a, nimahsela in zalenna chu sual khuhna'n hmang loin, Pathian bawiha awmna'n hmang zawk rawh u.
2:17 Mi zawng zawng chawimawi rawh u. Unauhote chu hmangaih rawh u. Pathian tih dek rawh u. Lalber chu chawimawi rawh u.
2:18 Chhiahhlawhte u, ti dek hlirin in hotute thu thuin awm rawh u; mi tha leh mi nunnemte lakah chauh ni loin, mi nunrawngte lakah pawh.
2:19 Miin Pathian hriatna avangin tuar loh tur tuarin lungngaihna a tuar hram hram chuan chu chu Pathian lawmzawng a ni si.
2:20 In sual a, kut thlak in tuarin chhel takin tuar mah u la, fakna eng nge in hlawh thin? Amaherawhchu thil in tihthat a, in tuarin chhel taka in tuar chuan chu chu Pathian lawmzawng a ni.
2:21 Krista pawh khan a tuarsak che u avangin hetiang ti turin koh in ni a sin; a hniaka in zuina turin entawn tur a hnutchhiah che u kha.
2:22 Ani chuan thil reng a tisual lo a, a kaah ngamthlemna a awm hek lo;
2:23 mi hauha a awm laiin a hau ve thung lo a, a tuar laiin a vau lo a; fel taka ngaihtuah thintua hnenah chuan a inpe zawk a.
2:24 Sual lamahte thi tawhin felna lamah kannun theihna'n amah ngeiin thingah khan a taksain kan sualte a phur a; amah vuakna vualte chuan tihdamin in awm ta a.Beram bo anga in bo kha, tunah erawh chuan in thlarau vengtu leh Hotu hnenah chuan in kir leh tak hi.
2:25 Beram bo anga in bo kha, tunah erawh chuan in thlarau vengtu leh Hotu hnenah chuan in kir leh tak hi.