2 Samuel 12
12:1 Lalpa chuan Nathana chu Davida hnênah a tîr a, Nathana chu a kal ta a. Davida hnênah chuan, “Khaw pakhatah mi pahnih an awm a; Pakhat chu a hausa hle a, pakhat erawh chu a rethei hle a.
12:2 A hausa zâwk chuan berâm tam tak leh bâwng tam tak a nei a.
12:3 A rethei zâwk erawh chuan ama suma a lei berâmnotê, a nu pakhat a nei a. A duat êm êm a, a fate zîngah an inah chuan a puitlin thlengin a chêntîr a. An ei ang ang a eiin a in ve a. A pawm a, a fanu ang maiin a duat a.
12:4 Mikhual pakhat hi mi hausa hnênah chuan a thleng a, chu mi chuan a mikhual eipui atân ama berâm leh ran chu talh phal lovin mi rethei berâmno chu a chhuhsak a, a mikhual eipui atân a talhsak ta a,” a ti a.
12:5 Chu mi hausaa chungah chuan Davida chu a thinur ta hle a, Nathana hnênah chuan, “ Lalpa hming chhâlin ka sawi e, chu mi chu thi tlâk a ni.
12:6 Chu thil chu a tih avâng leh khawngaihna a neih loh avângin berâmno chu a lêt liin a rûl leh tûr a ni,” a ti a.
12:7 Nathana chuan Davida hnênah, “Chu mi chu nangmah hi i ni alâwm. Lalpa, Israel-te Pathian chuan heti hian a ti: Israel-te lal atân hriak ka thih che a, Saula kut ata ka chhan chhuak che a.
12:8 I pu in leh lote, i pu nupuite i kutah ka pe a. Israel chhûng te leh Juda chhûng te pawh ka pe bawk che a. Hêng hi a la tlêm lutuk a nih chuan a dang pawh ka pêk belh zêl tûr che alâwm.
12:9 Engati nge Lalpa thupêk zâwm lova, a mit hmuha thil ṭha lo chu i tih le? Hit mi Uria chu i that a, Amon mite khandaih chuan i tihlum a, a nupui i neihsak a.
12:10 Ka thu i awih loh avâng leh Hit mi Uria nupui i neihsak avângin i thlahte chu khandaihin an thi an thi ang.
12:11 Lalpa chuan heti hian a ti: ‘I chhûngkua aṭang ngeiin i chungah buaina ka thlentîr ang. I hmuh reng laiin i nupui ka lâksak ang che a, mi dang hnênah ka pe ang a, chhûn êngah i nupuite chu an mutpui ang.
12:12 Nang chuan a rûkin i ti a, kei erawh chuan Israel mi zawng zawng hmuh tûrin chhûn êngah ka ti ang,’ a ti e,” a ti a.
12:13 Davida chuan Nathana hnênah, “ Lalpa chungah thil sual ka lo ti ta a ni,” a ti a. Nathana chuan, “ Lalpa chuan a ngaidam ta che a, i thi lo vang.
12:14 Amaherawhchu, he i thiltih hian Lalpa chu nasa taka a tihhmingchhiat avângin i fa chu a thi ang,” a ti a.
12:15 Nathanan a in lama Davida a hâwnsan hnuin Lalpa chuan Uria nupui laka Davida fa chungah chuan kut a thlâk ta a, a dam lo ta a.
12:16 Davida chuan naupang tân Pathian hnênah a ngên chiam a; chaw te a nghei a, a pindanah a lût a, zankhuain chhuatah a mu a.
12:17 A ina upaho a mutna ata kaihthawh tumin a kiangah an rawn ding a; mahse, a tho duh lo va, an hnênah pawh chaw a kîl duh lo.
12:18 A ni sarih ni chuan naupang chu a thi ta a. Davida chhiahhlawhte chuan naupang thih thu hrilh chu an huphurh hle a, “Naupang a la dam lai pawh khân a hnênah thu kan sawi a, a ngaithla duh si lo va, engtin nge naupang chu a thi ta tih kan hrilh ngam ang?” an ti a.
12:19 A chhiahhlawhte an inbekbawr chu a hmuhin Davida chuan naupang chu a thi a ni tih a ring a, a chhiahhlawhte hnênah chuan, “Naupang chu a thi ta elo?” a ti a. Anni chuan, “Thi ta e,” an ti a.
12:20 Davida chu chhuat aṭangin a lo tho va, a inbual a, hriak a thih a, a thawmhnaw a inthlâk a, Lalpa inah a kal a, chibai a bûk a, inah a haw leh a, chaw ei tûr a lam a, an rawn hlui a, a ei ta a.
12:21 A chhiahhlawhte chuan a hnênah, “Engtiziaa hetianga ti nge i nih? Naupang chu a dam lai khân chaw te i nghei a, i ṭap a; mahse, naupang chu a thih veleh i lo tho va, chaw te i ei ta zâwk mai si a,” an ti a.
12:22 Davida chuan, “Naupang chu a la dam lai khân chaw te ngheiin ka ṭap ngei tak a, Lalpa chuan min khawngaih ang a, naupang chu a dam leh mial mahna ka tih vâng a ni.
12:23 Mahse, tûnah a thi ta a, engah nge chaw ka nghei tawh ang? Ka ko kîr leh thei em ni? Kei pawh a hnênah ka la kal dâwn, ani zawng ka hnênah a lo kîr leh dâwn tawh lo,” a ti a.
12:24 Davida chuan a nupui Bathsebi chu a hnêm a, a hnênah a kal a, a mutpui a; tichuan, fapa a hring a, a hmingah Solomona a sa a. Lalpa chuan naupang chu a hmangaih hle a.
12:25 Lalpa chuan a hmangaih avângin chu nau hmingah chuan Jedidia sa tûrin zâwlnei Nathana chu a chah a.
12:26 Joaba chuan Amon mite khawpui Raba chu a rûn a, lal inte a la ṭêp a.
12:27 Davida hnênah mi a tîr a, “Raba khua ka bei a, an tui tlan dîl lian pawh ka la ta.
12:28 Tûnah, sipai la awm zawng zawng khâwm la, khua chu rawn hual la, rawn la rawh. Chutilo zawng, khawpui chu ka la ang a, a hmingṭhatna ka khum dah ang e,” a ti a.
12:29 Davida chuan sipai zawng zawng a khâwm a, Raba chu a pan a, a bei a, a la ta a.
12:30 An milim pathian Milkoma rangkachak lallukhum chu a la a, a rih lam chu kg. sawmthum leh panga a ni; lunghlua chei a ni a; tin, Davida chu an khumtîr a, khawpuia mi sum tam tak a la bawk a.
12:31 Chu khuaa mite chu a kawi chhuak a, thingzaina te, leilehna thîr te, hreipui te hmangin hna a thawhtîr a, leirawhchan te a siamtîr bawk a. Amon mi, khawpui danga awm zawng zawng pawh chutiang chuan a thawhtîr a. Tichuan, Davida leh a hote chu Jerusalem-ah an haw leh ta a.