Library · lus

2 Samuel 15

15:1 Chumi hnuin Absaloma chuan amah vêng tûrin tawlailîr te, sakawr te, mi sawmnga lai nên a buatsaih a. 15:2 Absaloma chu zîng takah a tho va, kulh kawngka bulah chuan a lo ding ṭhîn a, lal hnêna thubuai sawi tûr neite chu Absaloma chuan a lo ko va, “Khawii khua nge i nih le?” a lo ti ṭhîn a. Anni chuan, “I chhiahhlawh hi Israel hnam zînga mi ka ni,” an ti zêl a. 15:3 Absaloma chuan, “I thu hi a dik khawp mai; mahse, lo ngaihtuahsak tûr che tu mah lal chuan a ruat si lo a nih hi,” a lo ti ṭhîn a. 15:4 Absaloma vek chuan, “Rorêltu chu han ni ve ila chuan thubuai nei te, beisei neite chu dik takin ka lo rêlsak tûr,” a ti bawk a. 15:5 Amah chibai bûk tuma rawn pantute chu a vuan a, a kuah a, a lo fâwp ṭhîn a. 15:6 Israel mi, lal hnêna thubuai sawi tûra lo kal apiangte hnênah Absaloma chuan chutiang chuan a lo ti zêl a. Tichuan, Israel miten Absaloma chu an ngaina ta hle a. 15:7 Kum li a vei hnuin Absaloman lal hnênah chuan, “ Lalpa hnêna ka thutiam hlen tûrin Hebron-ah min kaltîr rawh. 15:8 I chhiahhlawh hi Suria ram Gesura ka awm lai khân, ‘ Lalpa chuan Jerusalem-a min hruai kîr leh chuan Hebron khuaah Lalpa chibai ka bûk ang,’ tiin ka lo tiam tawh si a,” a ti a. 15:9 Lal chuan, “Thlamuang takin kal ta che,” a ti a. Hebron-ah chuan a kal ta a. 15:10 Absaloma chuan Israel hnam tin hnênah a rûkin mi a tîr a, “Tawtawrâwt ri in hriat veleh, ‘Absaloma chu Hebron-ah a lal ta’ ti ang che u,” a ti a. 15:11 Tin, mi zahnihin Absaloma chu Jerusalem aṭangin an zui a. Chûng mite chu a sâwm chhuah an ni, thil awmzia eng mah an hriat loh avângin rilru thianghlim takin an zui a. 15:12 Absaloman inthawina a hlan lai chuan Gilo mi, Ahitofela, Davida rorêlpui chu, a awmna khua Gilo aṭangin a chah a. Lal an phiarna chu a nasa tawlh tawlh a, Absaloma lamṭang chu an pung tual tual a. 15:13 Mi pakhat hian Davida hnênah, “Israel-te chu Absaloma lamah an ṭang ta,” tiin a rawn sawi a. 15:14 Davida chuan a ṭhuihruai Jerusalem-a awmte hnênah, “Hawh u, i tlânchhia ang, tu mah Absaloma lakah kan him lo vang. I chhuak thuai ang u; chutilo zawng, min rawn nangchîng ang a, khua hi khandaihin a rawn bei ang a, min that dah ang e,” a ti a. 15:15 Lal ṭhuihruaite chuan, “I chhiahhlawhte hi kan pu lalin a sawi apiang ti tûrin kan inpeih e,” an ti a. 15:16 Lal chu a chhuak a, a laina zawng zawngin an zui a, a hmei sâwm erawh chu lal in nghâk tûrin a hnutchhiah a. 15:17 Lal chu a chhuak a, a mite chuan an zui vek a, khaw hmâwr in bulah chuan an innghâkkhâwm a. 15:18 A chhiahhlawh Keret mi te, Pelet mi te, Git mi te leh mi zaruk, Gath aṭanga amah rawn zuitute nên lal chu an bêl a, an kal a. 15:19 Lal chuan Git mi Itaia hnênah, “Engtizia nge kan zîngah i lo kal ve? Kîr la, lal thar hnênah chuan awm rawh. Nang zawng, ram dang mi, i ram ata râltlân mai i ni si a. 15:20 Nimin lawkah i lo kal a, engah nge vawiinah ka vahvaihpui ang che? Ka thangna tûr chin pawh ka hre lo. Chuvângin, kîr la, i mite kha hruai ang che. Lalpa chuan khawngaih che uin vêng zêl che u rawh se,” a ti a. 15:21 Itaia chuan lal chu a chhâng a, “ Lalpa nunna leh ka pu lal nunna chhâlin ka sawi e, khawiah pawh ka pu lal awmna tawh phawtah chuan thih leh thih, dam leh dam, i chhiahhlawh hi a awm ve zêl ang,” a ti a. 15:22 Davida chuan Itaia hnênah, “Chuti chu i kal zêl ang u,” a ti a. Tichuan, Git mi Itaia chu a hote leh an chhûngte nên chuan an kal ve ta a. 15:23 An kal ta chu a ram ṭahin an ṭap a, Lal chuan Kidron lui a kân a, a mite chuan an zui a, thlalêr lam panin an kal ta a. 15:24 Zadoka leh Levia chite chuan Pathian Bâwm zâwnin an zui ve a, mipuiin khua an chhuahsan vek hma chu Bâwm chu an nghat a. Abiathara chu maichâmah a chho va. 15:25 Lal chuan Zadoka hnênah, “Pathian Thuthlung Bâwm chu khawpuiah kîrpui leh rawh u, Lalpa mit ka tlun chuan min hruai hâwng leh ang a, Pathian Thuthlung Bâwm chu a hmun ngaiah ka hmu leh ang. 15:26 “I chungah ka lâwm lo a ni,” a tih chuan ṭha a tih ang angin min ti mai rawh se,” a ti a. 15:27 Lal chuan puithiam Zadoka hnênah, “Zâwlnei i ni alâwm, in fate pahnih, i fapa Ahimaaza leh Abiathara fapa, Jonathana te nên thlamuang takin khawpuiah haw leh rawh u. 15:28 Kei chu, chanchin min rawn hrilh hma chu thlalêra lui kaiah kan lo awm ang e,” a ti a. 15:29 Zadoka leh Abiathara chuan Pathian Thuthlung Bâwm chu Jerusalem-ah an kîrpui a, chutah chuan an awm ta a. 15:30 Davida chu ṭap chungin oliv tlângah a chho va, a lu a khuh a, ke lâwngin a kal a. A hnêna awm zawng zawng pawhin an lu an khuh a, ṭap chungin an chho ve a. 15:31 Davida hnênah chuan, “Ahitofela chu phiarrutute Absaloma hote zîngah chuan a tel ve ta,” tiin an hrilh a. Davida chu, “Aw Lalpa, Ahitofela thurâwn chu engmahlovah chantîr ang che,” tiin a ṭawngṭai a. 15:32 Davida chuan miten pathian an biakna ṭhin hmunsâng chu a han thlen chuan Ark mi Husaia chuan thawmhnaw thlêr phung inbelin, lu-a vaivut kai luam chungin a lo hmuak a. 15:33 Davida chuan a hnênah, “Ka hnêna i kal ve chuan ka tân phurrit mai i ni ang. 15:34 Khawpuiah kîr leh zâwk la. Absaloma hnênah, ‘Aw Lalpa, i chhiahhlawhah ka awm ang e; tûnhma khân i pa chhiahhlawh ka ni ṭhîn a; mahse, tûnah i chhiahhlawhah ka awm tawh ang e,’ ti la; tichuan, Ahitofela remruat chu i hnial ṭhîn ang a, min ṭanpui thei zâwk ang. 15:35 Puithiam Zadoka leh Abiathara pawh chutah chuan i kiangah an awm ang a, lal ina thil thleng i hriat apiang anni chu hrilh ang che. 15:36 An fate pahnih, Zadoka fapa Ahimaaza leh Abiathara fapa Jonathana pawh chutah chuan an awm kha. I thil hriat apiang mi rawn hrilh tûrin anni chu rawn tîr ṭhîn ang che,” a ti a. 15:37 Absaloman Jerusalem khua a luh ni chuan Davida ṭhian Husaia pawh chu a lo thleng ve a.