Library · lus

2 Chronicles 26

26:1 Judai ram mi zawng zawng chuan kum sâwm leh paruka upa Amazia fapa Uzia chu a pa aiawha lal tûrin an thlang a. 26:2 Amazia thih hnuin Uzia hian Elat khua hi a la lêt leh a, Judai ram a belhin a din ṭha a ni. 26:3 Uzia chu kum sâwm leh paruk a nihin a lal ṭan a, Jerusalem-ah kum sawmnga leh pahnih a lal a. A nu chu Jerusalem mi Jekoli a ni. 26:4 Amazia angin Lalpa lawmzâwng a ti ṭhîn. 26:5 Pathian thu lama kaihruaitu Zekaria dam chhûng chuan Lalpa chu a pawm tlat a, Pathian pawhin a tihmuingîl a. 26:6 Uzia chuan Filistia-ho chu a rûn a, Gath khaw kulh bang te, Jabne leh Asdod kulh bang te pawh a tichhia a; Askelon bulah leh Filistia ram hmun hrang hrangah kulh a siam a. 26:7 Pathian chuan Filistia mi te, Gurbaal-a awm Arab-ho te leh Meun-ho te chu a hnehpui a, 26:8 Amon-ho pawhin Uzia hnênah chhiah an chawi a; a lo ropui a, Aigupta ram thlengin a hming a thang ta a. 26:9 Jerusalem kulh bang chu a thuam thar bawk a; ‘Bangkil kawngkhâr’ an tihah te, ‘Ruam kawngkhâr’ an tihah te, kulh kawina lai kawngkhârah te in sâng a sa a. 26:10 Ram palailêngah te pawh kulh nei khua a din a; tui a lai chhuak thluah bawk a ni; khawthlang lam, tlang ṭhut phairuamah bâwng a vulh ṭeuh bawk a. Lo neih lamah a tui hle a, tlângramah pawh grepte a phuntîr a, phai ram ṭhate chu leiletah a neihtîr a. 26:11 Sipai tam tak, indo thei mai a nei reng a. An chanchin ziakna chu ziaktu Jeiela leh Maaseian, lal milian Hanania hovin an vawng a. 26:12 Hotu sânghnih leh zarukin a sipaite chu an ho va. 26:13 An hnuaiah chuan sipai chak tak, râl bei mai thei nuaithum leh sângsarih leh zanga a nei bawk a. 26:14 Uzia chuan a sipaite chu phaw te, fei te, thîrlukhum te, thîrkawr te, thal te, virvawma hman tûr lungte mûm te a pe bawk a. 26:15 Jerusalem-ah chuan a mi themthiamte siam thal kahna khâwl te, lung lian pui pui vawmna tûr khâwl te, in sângah te leh kulh kilah te a bun a. A hming pawh a thang thui ta hle a. Pathianin a ṭanpui avânga chuti taka ropui chu a ni. 26:16 Lal Uzia chu a ropui tâk hle hnu chuan a lo chapo ta deuh va, chu chu a chhiat phah ta a ni.A Pathian, Lalpa thu pawisa lovin rimtui hâlna dawhkâna rimtui hâl tûrin Tempulah a lût a. 26:17 Puithiam chak leh huaisen tak tak sawmriatin 26:18 khap tumin an zui a, “Uzia, Lalpa hnêna rimtui i hâl a thiang lo. Puithiam atâna serh hran Arona thlahte chauhvin hetiang thil hi an ti tûr a ni. He Hmun Thianghlim hi chhuahsan rawh, Lalpa chu i tithinur a, a duhsakna i dawng tawh chuang lo vang,” an ti a. 26:19 Uzia chu Tempul chhûng rimtui hâlna dawhkân bulah chuan a ding a, rimtui hâlna bûr chu a keng a, puithiamho chungah chuan a thinur hle a; mahse, an hmaah ngei, Lalpa in chhûnga rimtui hâlna dawhkân bulah chuan a chalah pânchhia a kai ta thut a. 26:20 Azaria leh puithiamte chuan lal chal an en chuan an phâwk ta hru vek a, Tempul chhûng ata chu an hnawt chhuak ta a. Lalpa chuan a hrem tâk avângin hmanhmawh takin a chhuak ta a. 26:21 A natna avâng chuan lal Uzia chu a dam chhûng chuan a bawlhhlawh ta a, Tempula a luh thian tak loh avângin ama inah a awm ta reng a, a hna a thawk tawh lo, a fapa Jothaman ram a awp ta zâwk a. 26:22 A lal chhûnga Uzia thiltih zawng zawng chu zâwlnei Isaian a ziak a. 26:23 Uzia chu a thi a, lalho thlânmualah an phûm a, a pân vei avâng chuan lalho thlânah an dah duh lo. A fapa Jothama chu a lo lal ta a.