Library · lus

Psalms 106

106:1 Lalpa chu fak rawh u, Lalpa chu a ṭhat êm avângin lâwmthu hrilh rawh u, Ngil a nei kumkhua si a. 106:2 Tu nge Lalpa thiltih ropuizia hi sawi thei anga, A fakawmzia hril sêng ang le? 106:3 Eng lai pawha dik taka awma, Thil ṭha ti ṭhînte chu an nihlawh e. 106:4 Lalpa, i mite chunga ṭhat i chhuah hunah min hre reng la, I chhan chhuah hunah chuan min telh ve ngei ang che; 106:5 I thlante nihlawhna hmua, I hnam thlante lâwma ka hlimpui theih nân leh, I rochanten an chhuan che anga Ka chhuan ve theih nân che. 106:6 Kan pute ang bawkin thil kan tisual a, Kan khawlo va, kan sual a ni. 106:7 Aigupta ramah khân kan pute chuan, I thil mak tih an hrethiam duh lo va, I ngilneih nasatzia pawh an hre duh lo, Tuipui Sen kamah khân an hel tâk kha. 106:8 Mahse, i hming avângin i chawimawi a, I thiltihtheihziate i hriattîr tho a ni. 106:9 Tuipui Sen chu thu a pe a, a chat ta a, A mite chu leichârah chuan a kal tlangtîr ta a. 106:10 Anmahni hawtute kut ata chu a chhan chhuak a, An hmêlmate kut ata ngei chu. 106:11 Tui chuan an hmêlmate a chîm pil a, Pakhat tê mah dam chhuak an awm loh kha. 106:12 A mite chuan a thu an ring ta a, A fak nân hla an sa. 106:13 Mahse, a thiltihte an theihnghilh leh ta thuai a, A remruat chu an ngaichâng duh leh ta lo. 106:14 Thlalêrah an râwp ta êm êm a, Ram rovah chuan Pathian an fiah ta a. 106:15 An dîl ngei chu a han pe a, An râwp a tihrehsak ta a. 106:16 Mahse, Mosia leh mi thianghlim Arona chu, An riahna hmunah chuan an îtsîk ta a. 106:17 Lei a khi chat phuk a. Dathana chu a tla ta a, Abirama pawh, a hote nên, an pil zo ta. 106:18 An zîngah chuan mei a lo chhuak a, Mi sualte chu an kâng hlum ta vek a. 106:19 Horeb tlângah pawh khân bâwngno lem an din a, An thil chhûn chu an be ta a. 106:20 An ropuina Pathian chu Hnim pet, bâwng ang lekah an chan ta a. 106:21 Aigupta rama thil ropui tak tak titu, An chhandamtu Pathian an theihnghilh ta. 106:22 Aigupta ram chhûnga a thil mak tih te leh, Tuipui Sena thil râpthlâk tak a tihte pawh. 106:23 A mi thlan Mosia chuan, A thinur tireh tûrin An kâra bân pharin ngensak lo se chu Tihboral vek a tum tâk kha. 106:24 A thutiam chu an rin tâwk loh avângin, Ram duhawm tak chu an ngainêp a. 106:25 An puan inah chuan an phunnawi a, Lalpa aw chu an ngaithla duh ta lo. 106:26 Bân phar meuhvin thu a tiam a, “Thlalêrah in tlu hlum ang a, 106:27 Ram dang daihah ka tidarh ang che u a, Hnam dang zîngah in thlahte an thi ang,” A ti ta hial a ni. 106:28 Peor-ah khân Baal an bia a, Milem pathian hnêna inthawina sa an ei ve ta. 106:29 An thil tih chuan ani chu a tithinur a, An zîngah chuan hripui a lêng ta a. 106:30 Finehasa chu a tho va, ngaihdam a dîlsak a, Hri chu a reh thei ta. 106:31 Chu chu a thil tih ṭhaa ngaih a ni ta a, Kumkhuaa ṭhangtharten an hriat zêl tûrin. 106:32 Meriba tuiah Lalpa an tithinur leh a, Anmahni avângin Mosia meuh pawh a buai ta a. 106:33 Ani chu an tithinur a, Thu hnu dâwn lovin a ṭawng ta a. 106:34 Lalpan tihlum tûra thu a pêk angin Chûng rama awmte chu an tihlum duh lo. 106:35 Chûngho nên chuan an inneih pawlh ta a. An tih dânte chu an zir ve ta zâwk a ni. 106:36 An milemte an be ve ta a, Thangah an âwk ta a ni. 106:37 An fanu te, an fapa te, Ramhuai hnêna inthawi nân an hmang ta a. 106:38 Pawi khawih lo thisen chhuah an chîng a, Kanan mite milem hnênah thisen an hlân a, An fanu te, an fapa te thisen chuan Ram chu an tibawrhbâng zo ta. 106:39 An thiltih avâng chuan an bawlhhlawh zo ta a, An thil chîn avâng chuan an uire zo ta a ni. 106:40 A mite chungah Lalpa thin a thawk a, A rochante chu a ten ta êm êm a. 106:41 Hnam dang hnênah a pe a, Anmahni hawtuten an chungah ro an rêl ta a, 106:42 Hnam dangten an rap bet a, An thuhnuaiah an kûn ta a ni. 106:43 Vawi tam tak chu a chhan chhuak a, Mahse, an hel lui zêl a, An sualnaah chuan an pil ta a ni. 106:44 Mahse, an han mangan meuh chuan a ngaihsak a, An au thâwm chu a lo ngaithla ṭhîn. 106:45 Anmahni avângin a thuthlung a hre reng a, Ngil a neih êm avângin pawi a ti ṭhîn. 106:46 Sala mantu zawng zawngte chu Anmahni a khawngaihtîr fo ṭhîn. 106:47 Aw Lalpa, kan Pathian, min chhan chhuak la, Hnam dang zîng ata hi min hruai khâwm leh ang che. I hming thianghlim kan fak ang a, Ropui takin kan chawimawi bawk ang che. 106:48 Lalpa, Israel-te Pathian chu fak rawh u, Chatuan chatuanin fak ula, Mi zawng zawngin, ‘Amen,’ ti rawh se. Lalpa chu fak rawh u.