Library · lus

Exodus 32

32:1 Mosia chu tlâng aṭanga a lo chhuk tâk lawk loh avângin Arona hnênah mite chu an kal khâwm a, “Khai, min hruaitu tûr Pathian min siamsak teh; Aigupta ram aṭanga min hruai chhuaktupa Mosia lah hi a chanchin eng mah kan hre tawh si lo,” an ti a. 32:2 Arona chuan, “In nupui te, in fapa te, leh in fanute rangkachak bengbeh thlawnsak ula, han la ta che u,” a ti a. 32:3 Mi zawng zawng chuan an rangkachak bengbehte chu an thlawn a, Arona an pe a. 32:4 Ani chuan a lo dawng a, rangkachak chu a rawh tui a, a chhûnna tûr a siamah chuan bâwngno, a pa lim a chhûng ta a. Mite chuan, “Aw Israel-te u, hei hi Aigupta ram aṭanga hruai chhuaktu che u pathian chu a ni,” an ti a. 32:5 Chu chu Aronan a hriat chuan bâwngno lim hmaah chuan maichâm a siam a; “Naktûkah Lalpa chawimawina ruai kan ṭheh ang,” tiin a tlângautîr a. 32:6 A tûk zîngah chuan hâlral thilhlan an hlân a, remna thilhlan an rawn la bawk a, an hlân a, mipuite chu ruai kîl tûr chuan an ṭhu a, inphalrai ruai a ni ta ngawt a. 32:7 Lalpa chuan Mosia hnênah, “Chhuk thuai teh, Aigupta ram aṭanga i hruai chhuah, i mite khu an khawlo zo ta. 32:8 An awm dân tûr ka hrilh ang khân an awm rei peih ta hauh lo mai; rangkachak bâwngno lim an chhûng a, chibai an bûk a, inthawina an hlân e, ‘Aw Israel-te u, hei hi Aigupta ram aṭanga hruai chhuaktu che u in pathian chu a ni, an ti,” a ti a. 32:9 Lalpa chuan Mosia hnênah, “Hêng mite hi an luhlul hle mai ka ti! 32:10 Ka thinur êm mai, khawi nge, ka zu tihlum vek teh ang, nang chauh hi hnam ropui takah ka han din teh ang che,” a ti a. 32:11 Mosia chuan a Pathian, Lalpa chu a ngên a, “Aw Lalpa, ropui tak leh kut chak tak hmanga Aigupta ram ata i hruai chhuah i mite chungah engtizia nge chuti taka i thinur le! 32:12 ‘Tlângrama tihhluma, tihchimih tumin a mite chu Aigupta ram ata a hruai chhuak a lo nih hi,’ Aigupta mite chuan an ti dâwn asin. Thinur tawh teh suh. 32:13 I chhiahhlawh Abrahama te, Isaka te, Israela te kha hre reng teh; mahni inchhâlin an hnênah, ‘Arsi zâtin in thlahte ka tipung ang a, ka sawi ram zawng zawng hi in thlahte hnênah ka pe ang a, an nei kumkhua ang,’ tiin i tiam kha,” a ti a. 32:14 Tichuan, Lalpa chuan a mite chunga thil ṭha lo tih a tum chu a ṭhulh ta a. 32:15 Mosia chu tlâng aṭang chuan a chhuk thla a, a kut lehlam lehlam chuan thupêk ziakna lungphêk chu a keng a. 32:16 Lungphêkte chu Pathian siam a ni; a ziak pawh chu Pathian ngeiin kerin a ziak a ni. 32:17 Mipui au thâwm chu Josua chuan a han hria a, “Chu! riahhmuna thâwm chu indo thâwm a va ni âwm ve?” a ti a. 32:18 Mosia chuan, “Hnehtu au thâwm a ni lo va, chan chau thâwm lah a ni hek lo, hlimhlawp zai thâwm a nih chu,” a ti a. 32:19 Tin, riahhmun chu a zu thleng hnai a, Mosia chuan bâwngno lim leh mipui lâm huai huai chu a han hmu a, a thin a ur ta êm êm a. Tlâng bulṭhutah chuan a lungphêk ken chu a vawm keh a. 32:20 Bâwngno lim an chhûn chu a la lawk a, a rawh a, a râwt dip a, tuiah a phul a, Israel fate chu a intîr ta a. 32:21 Arona hnênah, “Engtin nge mipuiin an tih che a heti taka thil sual i tihtîr tâk le?” a ti a. 32:22 Arona chuan a chhâng a, “Ka Lalpa thinur chu ka chungah alh teh suh se, hêng mite hian thil sual tih an châk zek zekzia i hria alâwm. 32:23 ‘Min hruaitu tûr pathian min siamsak rawh, Aigupta ram aṭanga min hruai chhuaktu Mosia lah hi a chanchin pawh kan hre tawh si lo,’ an rawn ti a. 32:24 Keiin an hnênah, ‘Rangkachak nei chuan thlawn sela, rawn dah rawh se,’ ka lo ti a. An rawn dah a, keiin ka rawh a, bâwngno limah a chang ta mai alâwm maw le!” a ti a. 32:25 Mipui chu an duh duhin an tâl a, an hmêlmate hmuhsit hial khawpin Arona chuan a lo tâltîr mai mai a ni tih Mosian a hmuh chuan, 32:26 riahhmun lamah a va ding a, “ Lalpa lama ṭang duh chu ka hnênah hian lo kal rawh se,” a ti a. Levia thlah zawng zawng chu a lamah chuan an kal ta a. 32:27 An hnênah, “Israel-te Pathian, Lalpa chuan heti hian a ti: ‘mipa chuan khandaih pai ula, riahhmun luhnaah lûtin bûkte chu fang chhuak ula, mahni unau pawh, ṭhian pawh, ṭhenawmpa pawh that rawh se,’ a ti,” a ti a. 32:28 Levia thlahte chuan Mosia sawi ang chuan an ti a; chumi ni chuan mi sângthum lai an that a. 32:29 Mosia chuan, “Mahni fate leh unaute bei hial khawpin Lalpa tân in inpe a, mal a sâwm ngei ang che u,” a ti a. 32:30 A tûkah chuan Mosian mipui hnênah, “Thil sual râpthlâk tak in ti a; mahse, tûnah hian Lalpa hnênah ka han chho leh tâng e, in sual a lo ngaidam thei mial mahna,” a ti a. 32:31 Mosia chu Lalpa hnênah a kal chho leh a, “Hêng mite hian thil sual râpthlâk tak an ti a, rangkachak pathian an siam tâk hi. 32:32 Mahse, an sual hi i ngaidam thei hrâm ang emaw chu? I theih lul loh chuan i mite hming ziakna bu ata ka hming kha thai bo mai ang che,” a ti a. 32:33 Lalpa chuan Mosia chu a chhâng a, “Ka lehkhabu aṭangin ka chunga thil tisualtu hming chauh a ni ka thai bo dâwn ni. 32:34 Kal ta la, ka hrilh tawh che hmunah he mite hi hruai rawh. Ngai teh, ka Vântirhkoh chuan i hma a hruai zêl ang a; ka rawn tlawh hunah chuan an sualna ngei chauhvah a ni ka rawn hrem dâwn ni,” a ti a. 32:35 Tichuan, rangkachak bâwngno lim Arona an siamtîr avâng chuan Lalpa chuan mipui zîngah hri a lêntîr ta a.