Library · lus

Ecclesiastes 2

2:1 ‘Nawmsip bâwlin nuam ka han tâwl teh ang,’ ka ti a. Chu pawh chu a ho khawp mai. 2:2 Nuih hi a âtthlâk hle a, intihhlim pawh a sâwt lo hle tih ka hre ta. 2:3 Uain nêna intihhlima nuam tâwl hi vân hnuaia mihring dam chhûng rei lo tê an hman dân tûr ṭha ber a ni law maw, a finthlâk nge thlâk loh chhin ka tum ta a. 2:4 Nasa takin hna ka thawk a, in te ka sa a, grep huan te ka siam a. 2:5 Huan nuam tak tak ka nei a, thei tinrêng ka phun bawk a. 2:6 A châwm nân dîl ka khuap a, thing a ngaw khup mai. 2:7 Bawih atân mipate leh hmeichhiate ka lei a, ka in chhûnga piang ngawt pawh an tam mai; ka hmaa Jerusalem lal zawng aiin ran leh berâm rual ka ngah a ni. 2:8 Ka chhiah ram leh an lalte ro khâwl khâwm tangka leh rangkachak te chu ka lâksak a; zai thiam nula leh tlangvâl ka nei ṭeuh va, nula duhawm tak tak ka ngah bawk. 2:9 Ka awm hmaa Jerusalem-a lo awmte chu ka khûm vek a ni, ka fin ka chhawr hle mai. 2:10 Ka duh chu ka hlah ngai lo va, a nuam tûrah ka insûm ngai hek lo; ka tih apiangah ka lâwm a, ka hah man chu ka têl zêl a ni. 2:11 Ka thiltihte leh ka hahziate ka han thlîr kîr a, a lo ho mang e, thli man tum ang mai a ni, vân hnuaiah eng mah rêng hlâwk a awm lo. 2:12 Finna kan tih te, âtthlâk leh mâwl kan tihte hi ka chhui ngun a. Lal meuh pawhin lal dang lo tih ṭhin bâk chu a ti thei chuang lo. 2:13 Fin chu ât ai chuan a ṭha, thim ai chuan êng a ṭha zâwk tih ka hria. 2:14 Mi fing chuan a kalna a hria a, mi â erawh chu thimah a kal ṭhîn; mahse, an pahniha chungah khawrêl thuhmun a thleng ṭhîn. 2:15 Mi â-te chan ang bawk ka chan tho dâwn si chuan fin eng nge a sâwtna? “A sâwt hauh lo,” ka ti rilru a. Hei pawh hi ho tak a ni. 2:16 Tu man mi â an hre reng lo ang bawk hian mi fing an hre reng chuang lo; nikhua a lo rei a, an theihnghilh mai; mi fing pawh mi â pawh kan thi vek dâwn. 2:17 Nun hi ka ning ta, vân hnuaia thiltih apiang hi ninawm mai a lo ni, ho tak vek a ni a, thli man tum ang mai a ni. 2:18 Ni sa hnuaia ka thawhrimna leh ka hahna hi ka kham ngei mai, ka thawh chhuah chu mi dangin an nei dâwn si a. 2:19 A neitu tûr chu mi fing nge mi â tu ma hriat a ni lo, ka thawh chhuah zawng zawng chu a la nei dâwn si a, ka fin avânga ka deh chhuah zawng zawng chu a khâwm vek dâwn a ni. A va ho êm! 2:20 Ni sa hnuaia hah taka ka lo thawk ta kha ka inchhîr rum rum mai. 2:21 Fing tak leh remhre taka mi themthiam hnathawh rah chu eng mah thawk hauh lovin a rochung hlauh si ṭhîn. Hei pawh hi ho tak, dik lo tak a ni. 2:22 Ni sa hnuaiah miin hah takin thawk mah se a tân a sâwt em ni? 2:23 A dam chhûng chu buaina leh manganna hlîrin a khat a, zânah pawh a muhîl thei lo. Hei pawh hi a va ho êm! 2:24 Duh tâwka ei leh in lo liama ṭha mihring tân a awm lo, a hah man chên rawh se. Hei pawh hi Pathian ruat a ni tih ka hre ta. 2:25 A thu lo chuan tu nge tui ti taka eia, nuam chên thei ang? 2:26 Amah tilâwmtu chu Pathianin finna te, hriatna te a pe a; thil sual titute erawh chu, Pathian tilâwmtute rochun atân thil a zawn khâwmtîr a, a chhêk khâwmtîr ṭhîn. A va ho êm, thli man tum ang mai a ni.