Library · lus

Numbers 36

36:1 Josefa thlah, Manasea fa, Makira fapa Gileada thlahte chhûngkaw hotute chu an lo kal a. Mosia leh hruaituho, Israel chhûngkaw puipate hnênah chuan, 36:2 “ Lalpa chuan kan pu hi Israel mite zîngah ṭhumvâwra ram sem tûrin a ti che a. Lalpa vêkin kan pu chu kan unaupa Zelofehada chan ai a fanute hnêna pe tûrin a ti bawk che a. 36:3 Israel hnam dang zînga mi pasalah nei ta se, an ram chu an chhawm ang a, an pasalte hnam ramah a bei dâwn a, kan hnam chanpual aṭangin an ram chu hnam dang chanah suan tûr tihna a ni ta a. 36:4 Israel-te tâna Jubili kumah pawh an ram chu kan rama belh ni lovin an pasalte hnam rama bei tûr a ni ta si a, kan hnam ram chan chu kan hloh hlen dâwn a ni,” an ti a. 36:5 Mosia chuan Lalpa thupêk chu Israel-te a hrilh a, “Josefa thlahte hian an sawi dik a ni. 36:6 Zelofehada fanute chungchânga Lalpa thupêk chu hetiang hi a ni: An chi zînga mi chauh pasalah duh duh an nei thei ang. 36:7 Tichuan, Israel hnam khat ram chu hnam dang ramah suan theih a ni lo vang. Israel-te chuan an hnam ram chu, chu hnam ngei chuan an nei reng tûr a ni. 36:8 Tu fanu pawhin ram chu rochung sela, a ram neitu hnam zînga mi pasalah a nei ngei tûr a ni. 36:9 Hnam khat ram chu hnam dang ramah suan tûr a ni lo, mahni hnam ram chu an nei tlat tûr a ni,” a ti a. 36:10 Mosia hnêna Lalpa thupêk ang chuan Zelofehada fanu Malaii te, Tirzaii te, Hoglaii te, Milkaii te, Novaii te chuan an pa chipui pasalah an nei ta a. 36:12 Josefa fa, Manasea fate zînga mi an neih avângin an ram chu an pate ram a ni ta reng a. 36:13 Moab phai, Jeriko zâwn, Jordan lui kamah hêng thupêkte leh dânte hi Israel-te tân Mosia hnêna Lalpa pêk chu a ni.