Library · lus

Matthew 27

27:1 Zîng a lo nih chuan puithiam lalte leh vântlâng upa zawng zawng chuan Isua tihhlum dân tûr an rêl a: 27:2 An phuar a, an kai a, Ramawptu Pilata hnênah an hruai a. 27:3 A mantîrtu Juda chuan Isua chu thiam loh an chantîr tih a hriat veleh a inchhîr a, tangka sawmthum kha puithiam lalte leh upate a pe kîr leh a. 27:4 “Mi pawisawi lo thi tûra ka mantîr kha ka lo tisual a ni,” a ti a. Anni erawh chuan, “Chu chu kan tân eng nge pawi ang? Nangin i tih tihin ti rawh,” an lo tihsan a. 27:5 Tichuan, tangka chu Hmun Thianghlimah a paih lût a, a kal a, a va inâwk hlum ta a. 27:6 Puithiam lalte chuan tangka chu an la a, “Hei hi Tempul tangka bâwma dah a thiang lo ve, thisen man a ni si a,” an ti a. 27:7 Tichuan, an inrâwn a, mikhual phûm nân bêlvawtu hmun an lei ta a. 27:8 Chuvângin a ni, chu hmun chu, tûn thlengin ‘Thisen hmun’ an tih tâk ni. 27:9 Chutichuan, zâwlnei Jeremia hmanga sawi kha a lo thleng ta a ni: “Israel fa tuten emaw Tangka sawmthum an chhiara Man chu an la a, 27:10 Lalpan thu a pêk ang khân Bêlvawtu hmun manah an pe a,” a tih hi. 27:11 Isua chu Ramawptu hmaah chuan a ding a, Ramawptu chuan, “Juda-te lal i ni maw?” tiin a zâwt a. Isuan a hnênah, “I sawi chu,” a ti a. 27:12 Puithiam lalte leh upate hêkna chu a enga mah a chhâng lo. 27:13 Tichuan, Pilatan a hnênah, “An hêkna zozai che hi i hre lo vem ni?” a ti a. 27:14 Nimahsela, a chhâng hlek lo va, an hêkna pakhat mah a chhân loh avâng chuan mak a ti êm êm a. 27:15 Ramawptu chuan kût niin mi tâng pakhat an dîl apiang a chhuahsak ṭhîn a. 27:16 Chumi lai chuan mi hmingthang tak Baraba an tih chu lung inah a tâng a. 27:17 Tichuan, an lo pung khâwm chu Pilatan, “Tu nge chhuahsak che u ila in duh, Baraba nge Isua, Krista an tiha hi?” a ti a. 27:18 Îtsîkna avângin ani chu a hnênah an rawn hlân tih a hre si a. 27:19 Rorêlnaa a ṭhut laiin Pilata nupuiin, “Kha mi fel tak chungah khân eng mah ti suh; vawiin hian amah avângin mumangah thil tam tak ka tuar a ni,” tiin a rawn chah bawk a. 27:20 Puithiam lalte leh upate chuan Baraba chu chhuaha, Isua chu tiboral tûra ngên tûrin mipuite chu an thlêm thlu ta a. 27:21 Ramawptu chuan an hnênah, “Anni pahnih hi a tu zâwk hi nge chhuahsak che u ila in duh?” a ti leh a. 27:22 Anni chuan, “Baraba,” an ti a. Pilatan an hnênah, “Isua, Krista an tih hi, engtin nge ka tih tâk ang le?” a ti a. An za-in, “Krawsah khêngbet rawh,” an ti a. 27:23 Ramawptu chuan, “Engah maw, eng nge a tihsual ni?” a ti a. Nimahsela, mipui chu, “Krawsah khêngbet rawh,” tiin an au ta tuar tuar a. 27:24 Tichuan, Pilatan engtia tih mah a sâwt lo va, buaina a chhuak mai dâwna a hriatin, tui a la a, mipui hmaah chuan a kut a sil a, “He mi fel thisenah hian ka hul e, nangnin in tih tihin ti rawh u,” a ti a. 27:25 Mipui chuan an za-in, “A thisen mawh chu keimahni chungah leh kan fate chungah awm rawh se,” tiin an chhâng a. 27:26 Tichuan, Baraba chu a chhuahsak a; Isua erawh chu sipaite a vuaktîr a, krawsa khenbeh tûrin an kutah a pe ta a. 27:27 Tichuan, Ramawptu sipaite chuan Isua chu praitorian-ah an hruai lût a, an pâwla mi zawng zawng a bulah an au khâwm a. 27:28 A kawr an hlihsak a, kawrfual senduk an hâktîr a. 27:29 Chawimawina atân hlîng an kual a, an khumtîr a, a kut ding lamin tiang an kentîr a, a hmaah an ṭhingṭhi a, “Chibai, Juda-te lal,” tiin nuihza siam nân an hmang ta a. 27:30 Ani chu chil an chhâk a, tiang chu an lâksak a, a luah an vua a. 27:31 Nuihza siam nân an hman zawhin kawrfual chu an hlihsak a, ama kawr chu an hâktîr leh a, krawsa khenbeh tûrin an hruai ta a. 27:32 Kalkawnga an kal laiin Kurini khuaa mi, a hming Simona an hmu a, Isua kraws putsak tûrin an man a. 27:33 Golgotha, ‘Luruh hmun’ an tih chu an va thleng a; 27:34 Chutah chuan uain, thil kha nêna pawlh a in tûrin an pe a; a han tem a, a in duh ta lo va. 27:35 An khenbeh zawhin a silhfênte chu ṭhumvâwrin an insem a. 27:36 Chutah chuan an ṭhu a, amah chu an vêng a. 27:37 Amah hêkna, ‘He mi hi Isua, Juda-te lal a ni,’ tih ziak a lu chungah chuan an bel a. 27:38 A rual chuan suamhmang pahnih krawsah an khêngbet ve a, a ding lamah pakhat, a vei lamah pakhat. 27:39 Mi veivâk nuk nukte chuan an lu an thing a, an tiel a. 27:40 “Nang, Tempul hi ṭhiata ni thuma din leh theitu, intidam rawh. Pathian Fapa i nih meuh chuan kraws ata kha lo chhuk ta che,” an ti a. 27:41 Chutiang bawkin puithiam lalte chuan Dân zirtîrtute leh upate nên nuihzatin, 27:42 “Mi dang mah tidam ṭhîn, mahni lah intidam thei si lo! Israel lal alâwm, tûnah hian kraws ata lo chhuk sela kan ring ang chu! 27:43 Pathian a ring alâwm, amah hi a duh chuan tûnah chhan chhuak ang hmiang, ‘Pathian Fapa ka ni,’ a ti si a,” an ti a. 27:44 Suamhmang khenbehte pawh chuan chutiang bawkin an tiel ve a. 27:45 Dâr sâwm leh pahnih aṭanga tlai dâr thum thlengin khawvêl pum pui a thim ta vek a. 27:46 Tlai dâr thum vêlah chuan Isua chu ring takin a au chhuak a, “Eli, Eli, lema sabakthani” a ti a; chu chu, ‘Ka Pathian, ka Pathian, engah nge mi kalsan?” tihna a ni. 27:47 A kianga ding ṭhenkhat chuan chu chu an hriatin, “He mi hian Elija a ko va ni,” an ti a. 27:48 An zînga pakhat chu a tlân nghâl a, sponj a la a, uain thûrah a chiah a, tiangah a târ a, Isua chu intîr a tum a. 27:49 Mi dangte chuan, “Ngawi rú, amah chhan tûrin Elija a lo kal emaw i en ang u,” an ti a. 27:50 Isua chu ring takin a au leh a, a thlarau a thlah ta a. 27:51 Ngai teh, Tempul chhûng puanzâr chu a chung lam aṭangin a hnuai lam thlengin a thlêr thla a; lîr a lo nghîng a, lungpuite a khi chat a. 27:52 Thlânte a lo inhawng a, mi thianghlim muhîl tawhte taksa tam tak pawh kaihthawh a ni ta a. 27:53 A thawhleh hnuah chuan chûngte chu thlân ata lo chhuakin khaw thianghlimah chuan an lût a, mi tam tak hnênah an inlâr a. 27:54 Sipai za hotu leh a bula Isua vênga awm vete chuan, lîrnghîng leh thil lo thlengte chu an hmuhin an hlau ta êm êm a, “He mi hi Pathian Fapa a ni ngei mai,” an ti a. 27:55 Chutah chuan hmeichhe tam tak, a rawngbâwla Galili aṭanga Isua rawn zuitute chu an awm bawk a, hla tak aṭangin an thlîr a. 27:56 Chûng zîngah chuan Magdala mi Mari te, Jakoba leh Josia nu Mari te an tel a, Zebedaia nupui pawh a tel a. 27:57 Tlaiah chuan Arimathai khuaa mi hausa pakhat, a hming Josefa a lo kal a, ani pawh chu Isua zirtîr a ni bawk a. 27:58 Chu mi chu Pilata hnênah a va kal a, Isua ruang chu a dîl a. 27:59 Pilata chuan a lo phal a. Tichuan, Isua ruang chu Josefa chuan a hlâwm a, puan zai sîn fai takin a tuam a, 27:60 ama thlân thar, lung a ker kuakah chuan a zalh a; thlân kawngka chu lung lian takin a khâr a, a kalsan ta a. 27:61 Chutah chuan Magdala mi Mari leh Mari dang chu an awm ve a, thlân hma zâwnah chuan an ṭhu a. 27:62 A tûk, Sabat ni chuan puithiam lalte leh Farisai-te chu a huhovin Pilata hnênah an kal a 27:63 “Ka pu, Tihdertua khân a dam laiin, ‘ni thum chinah ka tho leh ang,’ a tih kan hre reng a ni. 27:64 Chuvângin, thlân chu ni thum ni thlenga vêng ṭha tûrin thu pe rawh; chuti lo chu a zirtîrten amah chu an va ru hlauh ang a, vântlâng hnênah, ‘Mitthi zîng ata a tholeh ta a ni,’ an ti dah ang e; tichuan, tihderna hnuhnûng zâwk chu a hmasa ai khân a ṭha lo lehzual ang,” an ti a. 27:65 Pilatan an hnênah, “Vêngtute in nei alâwm, kal ula, ṭha in tih ang apiangin vêntîr rawh u,” a ti a. 27:66 Chutichuan, an kal a, thlân khârna lung chu an chhinchhiah a, vêngtute chu an vêntîr ta tlat a.