Library · lus

Matthew 8

8:1 Tlâng ata a lo chhuk hnuin mipui nasa takin Isua chu an zui a. 8:2 A hnênah phâr a lo kal a, kûnin chibai a rawn bûk a, “Lalpa, i duh chuan mi tithianghlim thei e,” a ti a. 8:3 Ani chuan a han ban a, a dek a, “Duh e, lo thianghlim tawh ang che,” a ti a, a phâr chu a lo thianghlim ta nghâl a. 8:4 Isuan a hnênah, “Tu hnênah mah sawi suh; amaherawhchu, puithiam hnênah kal la, va inentîr rawh, i dam ngei tih miten an hriat nân; Mosian thil hlan tûr a ruat kha hlân rawh,” a ti a. 8:5 Tin, Kapernaum khua a lo luhin a hnênah sipai za hotu a lo kal a, 8:6 “Lalpa, ka naupang a zeng a, inah a mu reng a, a na hle mai,” tiin tidam tûrin ṭhahnemngai takin a ngên a. 8:7 Ani chuan a hnênah, “Ka lo kal ang a, ka rawn tidam ang e,” a ti a. 8:8 Sipai za hotu erawh chuan a chhâng a, “Lalpa, ka in chhûnga ko lût tlâk che ka ni lo, thu chauh sawi la, ka nau chu a dam mai ang. 8:9 Kei pawh mi thuhnuaia awm ka ni a, ka hnuaiah sipaite an awm leh chhâwng a, ‘Kal rawh,’ ka tih chu a kal a, ‘lo kal rawh,’ ka tih chu a lo kal mai a; ka bawih pawhin ‘hei hi ti rawh’ ka tih chu a ti mai ṭhîn,” a ti a. 8:10 Isuan chu chu a hriatin mak a ti hle a, a zuitute hnênah chuan, “Thu dik ka hrilh a che u, Israel zîngah pawh heti êma ring nasa hi tu mah ka hmu lo. 8:11 Ka hrilh a che u, chhak leh thlang aṭangin mi tam tak an lo kal ang a, vânramah chuan Abrahama te, Isaka te, leh Jakoba te nên ruai an la kîl ho vang a; 8:12 Ram fate erawh chu pâwn thimah hnawh chhuah an ni ang; chutah chuan an ṭap ang a, ha an ṭhial ang,” a ti a. 8:13 Isuan, sipai za hotu hnênah chuan, “Kal tawh le, i rin angin i chungah lo thleng rawh se,” a ti a. Tin, chumi dâr ngeiah chuan naupang chu a dam ta a. 8:14 Petera ina Isua a luhin a pizawn khawsika mu chu a hmu a, 8:15 a kut a khawihsak a, a khawsik chu a reh ta a; a tho va, chaw ei a siamsak ta a. 8:16 Khua a lo tlai lam chuan a hnênah ramhuai man tam tak an rawn hruai a, thuin ramhuaite chu a hnawt chhuak a, damlo lo kal zawng zawng pawh chu a tidam bawk a. 8:17 Zâwlnei Isaian, “Ani chuan kan chak lohnate a la a, kan nâte a phur,” tia a sawi kha a lo thleng ta a ni. 8:18 Mipui nasa tak a vêla awm Isuan a hmuhin Jordan râl lehlama kal tûrin a zirtîrte chu thu a pe a. 8:19 Dân zirtîrtu pakhat a lo kal a, a hnênah, “Zirtîrtu, i kalna apiangah ka zui ang che,” a ti a. 8:20 Isuan a hnênah, “Sihalten kua an nei a, chunglêng savate pawhin riahhmun an nei; Mihring Fapa erawh hi chuan lu nghahna tûr a nei lo,” a ti a. 8:21 A zirtîrte zînga mi dangin a hnênah, “Lalpa, ka pa ka va vui zet ang e aw,” a ti a. 8:22 Isua erawh chuan a hnênah, “Mi zui rawh, mitthiin anmahni mitthi chu lo vui mai rawh se,” a ti a. 8:23 Tin, lawngah a chuang a, a zirtîrte chuan an zui a. 8:24 Dîl chu nasa takin a lo fâwn ta a; tichuan, tuifâwnin lawng chu a rawn vûr hlup hlup mai a, ani erawh chu a muhîl a. 8:25 An va kaitho va, “Lalpa, min chhanhim rawh, kan boral dâwn hi le,” an ti a. 8:26 Ani chuan an hnênah, “Rin tlêmte u, engah nge in hlauh?” a ti a. Tichuan, a tho va, thli leh dîl chu a hau ta a, a lo reh ta ṭhuap mai a. 8:27 Mite chuan mak an ti hle a, “He mi hi mi eng nge a nih? Thli leh dîl lam pawhin a thu an awih hi le!” an ti a. 8:28 Râl lehlam, Gadarin mite ram chu a va thlenin ramhuai man pahnih, thlân aṭanga lo kalte chuan an rawn pan a; an kawlh êm êm mai a, chumi lam kawngah chuan tu mah an kal ngam lo. 8:29 Tin, anni chuan, “Pathian Fapa, kan chungthu-ah rawn inrawlh i tum elo? Hun tiam thlen hmaa min nghaisa tûrin i lo kal em ni?” tiin an lo au va. 8:30 Chuta ṭanga hla feah chuan vawk rual an tla sup sup a. 8:31 Ramhuaite chuan, “Min hnawh chhuah chuan vawk kawchhûngah sâwn min luhtîr ang che,” tiin an ngên a. 8:32 Ani chuan an hnênah, “Va lût ta che u,” a ti a. Tichuan, an lo chhuak a, vawk rual kawchhûngah chuan an lût ta a; tin, ngai teh, vawk rual chu an vaiin dîl kam khâm kovah chuan an tlân liam a, dîlah chuan an boral ta a. 8:33 A enkawltute chu an tlânchhia a, khuaah an kal a, thil awmzia zawng zawng, ramhuai mante chunga thil lo thleng te chu an va sawi a. 8:34 A khuain Isua hmu tûrin an lo chhuak ta a, amah an hmuh chuan an ram chhuahsan tûrin an ngên chiam a.