Mark 1
1:1 Pathian Fapa, Isua Krista Chanchin Ṭha inṭanna chu:
1:2 Zâwlnei Isaia lehkhabua: ‘Ngai teh, ka tirhkoh i hmaan ka tîr a, Ani chuan i kawng a buatsaih ang.’
1:3 Thlalêra mi au aw chuan ‘Lalpa lamlian chei ṭha ula, A kal nân kawng tluang siam rawh u,’ tia ziak ang khân.
1:4 Baptistu Johana chuan sual ngaihdam nân sima baptisma chan tûr thu thlalêrah a rawn hril a.
1:5 Judai ram kil tina mi leh Jerusalem khuaa mi zawng zawng chuan amah an pan a, an sualte an puang a, Jordan luiah chuan a lo baptis hlawm a.
1:6 Johana chu sanghâwngsei hmul puanin a inthuam a, savun kâwnghrên a hrêng a, khaukhuap leh ram khawizu chawah a ring a.
1:7 “Kei aia ropui zâwk ka hnungah a lo kal a, kei hi chu kûna a pheikhawk hrui phelh tlâk pawh ka ni lo.
1:8 Keiin tuiin ka baptis che u a, ani erawh chuan Thlarau Thianghlimin a baptis ang che u,” tiin thu a hril a.
1:9 Chûng hun lai chuan Isua chu Galili rama Nazaret khua aṭangin a lo kal a, Jordan luiah chuan Johanan a lo baptis a.
1:10 Tui ata a lo chhuah veleh, vân inhawnga Thlarau, ṭhuro anga lo chhuk a hmu a, vân aṭang chuan aw a lo chhuak a.
1:11 “Nang, ka Fapa, ka Duhtaka chu i ni; i chungah ka lâwm êm êm e,” a rawn ti a.
1:12 Thlarau chuan ani chu thlalêrah a tîr chhuak nghâl a.
1:13 Chutah chuan ni sawmli Setana thlêmin a awm a; ramsate zîngah a awm ve a, vântirhkohten a rawng an bâwlsak a.
1:14 Tin, Johana chu an man hnuin Isua chu Pathian Chanchin Ṭha hrilin Galili ramah a kal ta a.
1:15 “Hun chu a lo thleng ta; Pathian ram pawh a hnai e; sim ula, Chanchin Ṭha hi ring rawh u,” a ti zêl a.
1:16 Galili dîl kama a kal lai chuan Simona leh a unaupa Andria chu dîla an lên dêng a va hmu a, sangha man mi an ni rêng a.
1:17 Isuan an hnênah, “Mi zui rawh u; tichuan, mihring man mi-ah ka lo siam ang che u,” a ti a.
1:18 An lênte chu an hnutchhiah a, ani chu an zui ta nghâl a.
1:19 A va kal leh hlek a, Zebedaia fa, Jakoba leh Johana te unau chu a hmu a, lawngah lên an lo ṭhui ṭha a.
1:20 Anni pawh chu a ko ve nghâl a, an pa Zebedaia leh inhlawhfate chu lawngah an kalsan a, Isua chu an zui ta a.
1:21 Tin, Kapernaum khuaah an lût a, Sabat ni chuan Sunagog-ah a zirtîr ta nghâl a.
1:22 Dân zirtîrtute ang lova thunei taka anmahni a zirtîr avâng chuan a zirtîrna chu mak an ti êm êm a.
1:23 An sunagog-ah chuan thlarau bawlhhlawh pai mi pakhat a lo awm ve a, a au chhuak ta phut a,
1:24 “Nazaret Isu, kan chungthu-ah rawn inrawlh i tum elo? Min tiboral tûrin i lo kal em ni? Tu nge i nih ka hria Pathian mi thianghlim chu i ni,” a ti a.
1:25 Isua chuan a hau va, “Ngawi la, a chhûng ata lo chhuak rawh,” a ti a.
1:26 Thlarau bawlhhlawh chuan a sawisa nek a, ring taka auvin a chhûng ata chu a lo chhuak ta a.
1:27 An za chuan mak an ti êm êm a. “Hei eng nge ni ta ngai? Zirtîrna thar a nih hi; thlarau bawlhhlawhte pawh thu nei takin thu a pe a, an awih mai hi,” an inti hlawm a.
1:28 Galili ram kil tinah a chanchin chu a thang ta thuai a.
1:29 Sunagog ata chu a chhuak a, Jakoba leh Johana te nên Simona leh Andria in lam chu an pan nghâl a.
1:30 Simona pizawn chu khawsikin a lo mu reng a, a chanchin an hrilh vat a.
1:31 Ani chuan a va pan a, a kut a chelh a, a kai tho ta a. A khawsik chu a reh ta mai a, chawei a siamsak ta a.
1:32 Chumi tlai, ni tlâk hun chuan, damlo zawng zawng leh ramhuai mante a hnênah an rawn hruai a,
1:33 a khuain kawngka bulah chuan an lo awm khâwm ta hmur a.
1:34 Mi tam tak, nat tinrênga nate chu a tidam a, ramhuai tam tak a hnawt chhuak bawk a, amah an hriat avângin ramhuaite chu an ṭawng a phal lo.
1:35 Tin, zîng takah, khua a la ên hmain a tho va, a chhuak a, hmun fianrialah a kal a, chutah chuan a va ṭawngṭai a.
1:36 Simona leh a ṭhiante chuan an zawng a;
1:37 an va hmuh chuan, “Miin an rawn zawng huai huai che asin,” an ti a.
1:38 Ani chuan, “Hmun dangah, khaw ṭhenawmahte i kal ang u, chûngahte pawh chuan thu ka hril zêl tûr a ni; chu chu ka lo chhuah chhan a ni si a,” a ti a.
1:39 Tichuan, Galili ram zawng zawnga an sunagog-ah lûtin thu a hril zêl a, ramhuaite pawh a hnawt chhuak a.
1:40 A hnênah phâr a lo kal a, a hmaa ṭhingṭhiin tihdam a ngên chiam a, “I duh chuan mi tithianghlim thei e,” a ti a.
1:41 Ani chuan a lo khawngaih êm êm a, a han ban a, a dek a, “Ka duh e, lo thianghlim tawh ang che,” a ti a.
1:42 A phâr chu a lo dam ta nghâl a, a lo thianghlim ta a.
1:43 Khauh takin thu a pe a, a kaltîr ta nghâl a.
1:44 “Tu hnênah mah sawi hauh suh; amaherawhchu, puithiam hnênah va inentîr la, i dam ngei tih an hriatna tûrin inthen nâna Mosia thupêk ang khân thil hlân rawh,” a ti a.
1:45 Ani chu a kal ta a, chu thu chu a sawi a sawi ta mai a, a puang darh ta zâwk a; tichuan, Isua chu khuaah pawh a langin a lût thei ta lo va, hmun fianrialah a awm ta zâwk a; hmun tin aṭangin miin an rawn pan tho va.