Romans 9
9:1 Kristaah chuan thu dik tak ka sawi a ni; ka daw lo ve: Thlarau Thianghlim zârah ka chhia leh ṭha hriatna pawhin a hre chiang.
9:2 Ka rilru nasa takin a hrehawm a, ka lungngaihna pawh a reh thei lo.
9:3 Ka unaute, tisa lama ka chipuite aiah hian ânchhia dawngin Krista hnên ata tihhran ni ila ka ti hial ṭhîn.
9:4 Israel mi an ni a, fa nihna te, ropuina te, thuthlung te, Dân te, rawngbâwl hna te, Pathian thutiam te an chang a.
9:5 Thlahtute chu an pute an ni a, tisa lam chhui chuan Krista ngei pawh chu an chipui a ni; engkim chunga awm Pathian chu chatuana fakin awm rawh se. Amen.
9:6 Pathian thu chu a thlâwn ta tihna zawng a ni hauh lo; Israela thlah zawng zawng Israel mi an ni vek lo ve.
9:7 Abrahama thlah zawng zawng pawh a fate an ni vek hek lo. “Isaka-ah hian i thlahte chhui an ni ang,” Pathianin a tih zâwk kha.
9:8 Tichuan, tisa lama a fate chu Pathian fate an ni chuang kher lo, Pathian thutiam avânga a fate erawh chu Abrahama thlah dik taka ngaih an ni.
9:9 “Tûn ang hunah hian ka lo kal ang a, Sari chuan fapa a nei ang,” ti-a tiam a nih kha.
9:10 Chu chang chu a ni hlei nêm: mi pakhat, min thlahtu Isaka lakah Rebeki chuan phîr a pai a,
9:11 naute pian hma, a chhia emaw, a ṭha emaw an tih theih hma khân Pathianin a duhzâwng angin pakhat zâwk a thlang a ni tih a lang:
9:12 thiltih avâng ni lovin, a kotu duhzâwng avâng zâwkin Rebeki hnênah, “A upa zâwkin a naupang zâwk rawng a bâwl ang,” a tih kha.
9:13 “Jakoba ka hmangaih a, Esauva erawh chu ka hua,” tih ziak a ni bawk.
9:14 Chuti a nih si chuan eng nge kan sawi tâk ang? Pathianah dik lohna a awm em ni? Awm lo ve.
9:15 Ani chuan, “Ka khawngaih apiang chu ka khawngaih ang a, zah ka ngaihna chung apiangah zah ka ngai ang,” tia Mosia hnêna a sawi kha.
9:16 Chuvângin, mihring duh thu emaw, thiltih emaw ni lovin, Pathian khawngaihnaah a innghat zâwk a ni.
9:17 Lehkha Thu-in Farawa hnênah, “He mi avâng ngawt hian ka tungding che a ni, nangmaha ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a.
9:18 Tichuan, Pathian chuan a duh apiang a khawngaih ṭhîn a, a duh apiang pawh a tiluhlul ṭhîn a ni.
9:19 “Chuti chu Pathianin engati nge mi a la dem cheu vang? A duhzâwng chu tu nge dodâl thei awm?” in ti a ni thei e.
9:20 Aw mihring, Pathian hnial veitu chu tu nge maw i nih le? Thilsiam chuan a siamtu hnênah, “Engati nge hetianga mi siam?” a ti ang em ni.
9:21 Bellei tlang khat aṭangin bêl hlu deuh te, hlu lo deuh te siam tûrin bêlvawtu chuan bellei chungah thu a nei lo vem ni?
9:22 Chutiang chuan Pathianin a ti ṭhîn; a thinur leh a thiltihtheihna chu lantîr duh mah se, a thinurna dawngtu bêl, tihboral mai tûrte chu a dawh hrâm hrâm a;
9:23 tin, a khawngaihna bêl, a ropuina chang tûra a buatsaih keiniho hnênah hian ropuina nasa tak a rawn tilang thung a ni.
9:24 Juda-te zîng ata chauh ni lovin, Jentail-te zîng ata a koh chhuahte hi chutiang bêlte chu kan ni.
9:25 Hosea lehkhabuah hetianga a sawi kha: “Ka mi ni ngai lote chu ‘Ka mite,’ ka ti ang a, Hmangaihngailohvi chu ‘Hmangaihi,’ ka ti ang.
9:26 ‘Ka mite in ni lo ve,’ an tihna hmunah ngei chuan Pathian nung fate vuah in ni ang,” tiin.
9:27 Isaia pawh khân Israel mite thu aupuiin, “Israel mite chu tuifinriat ṭiau zâtin tam mah sela, a bâng tlêm tê chauh chhandam an ni ang.
9:28 Lalpa chuan lei chunga a rorêlna tûr chu a hlen thuai dawn si,” a tih kha.
9:29 Isaia vêkin, “Engkim Lalpa chuan a chi thlah min lo zuahsak suh sela chuan, Sodom khua ang kan ni tawh ang a, Gomora khua ang mai kan ni tawh ang,” tia a lo sawi lâwk ang khân.
9:30 Eng nge kan sawi tâk ang le? Jentail thiam chan tum lêm lote chu thiam chantîr an lo ni ta, rinna avânga thiam chantîrna chu.
9:31 Dân zâwma thiam chan tum Israel-te zâwk chuan Dân ang chuan thiam an chang zo ta lo.
9:32 Eng vâng nge ni? Rinna lova thiltiha hmuh an tum vâng a ni a, Tlûkna lungah chuan an tlu ta a ni.
9:33 “Ngai teh, Zion-ah chuan inchhuiha tlûkna lung, Insuta tlûkna lungpui ka dah a, Tu pawh amah ring apiang chu An mualpho lo vang,” tih ziak ang khân.