Library · lus

1 Thessalonians 1

1:1 Paula, Silvana leh Timothea chuan, Thesalonika khuaa Pa Pathian leh Lalpa Isua Krista kohhran chibai kan bûk e. Khawngaihna leh remna in hnênah awm rawh se. 1:2 Nangniho avâng hian Pathian hnênah lâwmthu kan hril ṭhîn; kan ṭawngṭainaah te chuan bâng lovin in hming kan lam a. 1:3 Rinna avânga ṭan in lâk dân te, hmangaihna avânga in thawhrimzia te, kan Lalpa Isuaa beiseina in nghah nghehzia te hi kan Pa Pathian hmaah kan hre reng ṭhîn a ni. 1:4 Unaute u, Pathianin a hmangaih che u a, ama tân a thlang chhuak che u tih kan hria. 1:5 Chanchin Ṭha in hnêna kan rawn thlen lai khân thu mai mai ni lovin, thiltihtheihna nên, Thlarau Thianghlim nên ring tlat chungin kan rawn sawi a nih kha; in zîngah eng angin nge in tân kan awm tih pawh in hria. 1:6 Kan awm dân leh Lalpa awm dân latute in lo ni ta a, hrehawm tam tak tuar chungin, Thlarau Thianghlima lâwmna nên thu chu in pawm ta a. 1:7 Chutichuan, Makedonia leh Akaia rama ringtu zawng zawng tân entawn in ni a, 1:8 Makedonia leh Akaia ramah Lalpa thu tûnah nangmahni aṭangin a darh mai ni lovin, hmun tinah Pathian in rin thu a thang ta a; chuvângin, keinin eng mah kan sawi a ṭûl ta lo. 1:9 Kan rawn tlawh che u ṭuma min lo lawm dân te, milem kalsana Pathian nung leh dik tak rawngbâwl tûra Pathian lam in lo hawi tâk thu te, 1:10 A Fapa Isua, mitthi zîng ata a kaihthawh, thinur lo thleng tûr laka min chhan chhuaktu chu, vân aṭanga a lo kal nghâka in awm thu te an sawi huai huai a ni.