Judges 8
8:1 Efraim mite chuan Gideona hnênah, “Midian-ho bei tûra min sâwm ve lo hi engtizia nge?” an ti a, an hau na hle a.
8:2 Ani chuan, “Nangnin in tih ṭhin ai chuan ka thil tih ve chhun hi eng tham mah a ni nêm! Nangni Efraim-hovin in tih chhunte pawh keini hnam tê, Abiezer-ho tih ai chuan a ropui daih alâwm.
8:3 Pathianin in kutah Midian hotu lian Oreba te, Zeeba te a pe che u a, kei chuan eng tham mah tih ka nei hlei nem,” a ti a. Chutianga a ṭawng hnu chuan an thinur pawh chu a dai ta a.
8:4 Gideona leh a mi zathum chuan Jordan an kai a, an chau hle mai a, hmêlmate chu an ûm zêl bawk si a.
8:5 Sukoth khaw mite hnênah chuan Gideonan, “Midian lal Zeba leh Zalmuna kan ûm a, ka hote hi an hah hle tawh a, khawngaih takin ei tûr lo pe teh u,” a ti a.
8:6 Sukoth khaw hotute chuan, “Zeba leh Zalmuna chu in kuta awm em an nih a, i sipai chaute ei tûr kan han pêk na tûr?” an ti a.
8:7 Gideona chuan, “ Lalpan Zeba leh Zalmuna ka kuta mi pêk hun chuan thlalêra hlîng leh râlsamkuaiin in vun ka kai thlêr vek ang maw le,” a ti a.
8:8 Chuta ṭang chuan Penuel-ah an kal a, an hnênah chuan Sukoth mite a tih ang bawk khân a ti a; anni pawh chuan an chhân ang bawk khân an lo chhâng a.
8:9 Penuel-a mite hnênah pawh chuan, “Ralmuanga ka lo kîr leh hun chuan in khua hi ka tichim ngei ang maw le,” a ti a.
8:10 Zeba leh Zalmuna chu Karkor khuaah, an sipaite nên an awm a. Thlalêra chêngho chu mi nuaikhat leh sînghnih indonaah an thi tawh a, a thi bâng mi sîngkhat leh sângnga lai chuan an la zui zêl a ni.
8:11 Gideona chu Noba leh Zogbeha chhak lam thingtlâng kawngah a kal a, hmêlma inring lo chu a bei thut a.
8:12 Midian lal Zeba leh Zalmuna chu an tlân bo va; mahse, an ûm a, an man a; an sipaite chu an buai ta nuai nuai a.
8:13 An inbeih zawh chuan Gideona chu Heres kalkhân lamah a lo haw a.
8:14 Sukoth tlangvâl pakhat hi a man a, an khaw hotute leh upate hming a zâwt a, tichuan Sukkoth khuaa mi lianhote leh upate hming chu a ziaksak vek a, sawmsarih pasarih an ni a.
8:15 Sukoth a thlen chuan an hnênah, “Zeba leh Zalmuna hi en teh u, ‘Zeba leh Zalmuna chu in kuta awm em an niha i sipai chaute ei tûr kan han pêk na tûr’ tia min tihel vei kha,” a ti a.
8:16 Thlalêr hlîng leh râlsamkuai a la a, khaw hotute chu a man a, Sukoth mite hmaah hlîng chuan a hrût ta nek a.
8:17 Penuel kulh bangte chu a tichim bawk a, a chhûnga mite chu a that a.
8:18 Gideona chuan Zeba leh Zalmuna chu, “Tabor tlânga in mi thahte mi eng ang nge an nih?” tiin a zâwt a. Anni chuan, “An ang khawp mai che, lal fa ni âwm tak an ni,” an ti a.
8:19 Ani chuan, “Ka unau, ka nu hrin ve te ngei an nih chu. Lalpa hming chhâlin ka sawi hi, zuah ula chuan nangni pawh ka that lo tûr che u,” a ti a.
8:20 A fapa upa ber Jethera hnênah, “Tho la, that teh,” a ti a. Mahse, khandaih chu a phawi lo, a that ngam lo a ni, a la naupang êm a ni.
8:21 Zeba leh Zalmuna chuan, “Nangmah kha lo tho la, pa leh pa inbeih tûr alâwm,” an ti a. Gideona chu a tho va, Zeba leh Zalmuna chu a that a, an sanghâwngsei nghâwngawrh pawh a lâksak a.
8:22 Israel mite chuan Gideona hnênah, “Midian-ho lakah min chhanhim a, kan chunga rorêltuah ṭang rawh, i fate, i tute pawh ṭang zêl rawh se,” an ti a.
8:23 Gideona chuan, “In chunga rorêltuah ka ṭang lo vang; ka fate pawh an ṭang lo vang. In chunga rorêltu tûr chu Lalpa a ni,” a ti a.
8:24 Gideona chuan an hnênah, “Mi tinin râl bengbeh in lâk kha pakhat min pe ṭheuh ula ka va ti êm!” a ti a. Râlte chu Ismael mi an nih avângin rangkachak bengbeh an lâksak ṭeuh a ni.
8:25 Anni chuan, “Kan ui hauh lo, kan pe ang che,” an ti a. Puan an phah a, râl bengbeh an lâk chu an pe ṭheuh va.
8:26 Chutianga an pêk khâwm rangkachak bengbeh chu kg. sawmhnih dâwn lai a ni. Midian lalho incheina, ṭhi te, puan senduk te leh an sanghâwngsei nghâwngawrh a neih te chu chûng zîngah chuan chhiar tel a ni lo.
8:27 Gideona chuan chûng chuan Efod a siam a, a awmna khua Ofra-ah a dah a. Israel-te chuan an pên bo phah a, Gideona leh a chhûngte tân thang hlauhawm tak a lo ni ta a.
8:28 Midian-ho chu Israel-te chuan an tudawl a, a inlek leh ngai tawh lo. Gideona dam chhûng zawng kum 40 chhûng ram chu a râlmuang a.
8:29 Gideona, Zerubaala an tih bawk chu, ama inah a haw a.
8:30 Gideona chuan nupui a ngah hle a; fapa sawmsarih a nei a.
8:31 Sekem khuaa a hmei chuan fapa a hrinsak bawk a, a hmingah Abimeleka a sa a.
8:32 Joasa fapa Gideona chu a tar hle hnu chuan a thi a, Abiezer mite ram Ofra khuaah, a pa Joasa thlânah an phûm ve ta a.
8:33 Gideona chu a thi ta chauh tihin Israel mite chu Baal lamah an pêng leh a, Baal-berith chu pathianah an neih ta a.
8:34 Kil tina an hmêlmate kut ata chhanchhuaktu Lalpa, an Pathian chu Israel-te chuan an hre reng duh lo va;
8:35 Gideonan Israel-te a khawngaih ṭhîn ang khân anni chuan Gideona chhûngte chu an khawngaih ve duh lo va.