1 Samuel 1
1:1 Efraim tlângrama Ramathaim-zofim khuaah mi pakhat a awm a, a hming chu Elkana a ni. Chu mi chu Jehorama fapa a ni a, Jehorama chu Elihua fapa a ni. Elihua chu Tohua fapa a ni.
1:2 Nupui pahnih a nei a, pakhat hming chu Hani a ni a, pakhat hming chu Penini a ni. Penini chuan fate a nei a, Hani erawh chuan fa a nei ve lo.
1:3 Chu mi chu Engkim Lalpa chibai bûk tûr leh a hnêna thilhlan hlân tûrin kum tin a awmna khua aṭang chuan Silo khuaah a chho ṭhîn. Chutah chuan Elia fapa pahnih, Hofnia leh Finehasa, Lalpa puithiamte chu an awm a.
1:4 Elkanan thilhlan a hlan ni chuan a fapa te, a fanu te tân chanvo a siamsak ṭheuh va.
1:5 Hani chu hmangaih hle mah se, Lalpa chuan fa nei thei lova a siam avângin chan khat chauh a siamsak ṭhîn.
1:6 Fa a neih theih loh avânga a lungngaihna tizual tûrin amah ertu Penini chuan a deusawh ṭhîn a.
1:7 Chutianga kum tin Lalpa ina an kal ṭhin lai chuan a ertunu chuan a tilungngai hle ṭhîn a ni. Chuvâng chuan, a ṭap a ṭap a, chaw pawh a ei lo va.
1:8 A pasal Elkana chuan, “Hani, engtizia nge chaw i ei duh loh? Engati nge i rilru a nat le? Fapa sâwm aiin i tân ka hlu zâwk lo em ni?” a ti ṭhîn a.
1:9 Vawi khat chu Silo khuaa an eia an in zawhin Hani chu a tho va. Chutih lai chuan puithiam Elia chu Lalpa in kawngka ban bul ṭhutthlêngah a ṭhu a.
1:10 Hani chu lungchhe taka ṭap chungin Lalpa hnênah a ṭawngṭai a.
1:11 Hetiang hian thu a tiam ta a, “Aw Engkim Lalpa, i bawihnu chan chhiatzia hi min hriatsak a, i bawihnu hi thlahthlam lova fapa min pêk chuan a dam chhûng zawng Lalpa ka pe ang a, a lu pawh meh a ni rêng rêng lo vang,” a ti a.
1:12 Chutianga Lalpa hnêna a ṭawngṭai lai chuan a hmui phun chu Elia chuan a lo en reng a,
1:13 Hani chu ṭhahnemngai takin a ṭawngṭai a, ri lovin a hmui chauh a phun a, Elia chuan zu a rui emaw a ti a.
1:14 Elia chuan a hnênah, “Eng chen nge i ruih dâwn le? I uain in chu dah bo teh khai,” a ti a.
1:15 Hani chuan, “Ka pu, ka rui lo asin, hmeichhe lungngai tak ka nih hi, uain pawh, zupui pawh ka in rêng rêng lo; Lalpa hnênah ka rilru natna ka thlen a nih hi.
1:16 I bawihnu hi hmeichhe sualah puh suh; lungngai leh mangang takin ka ṭawngṭai a nih hi,” a ti a.
1:17 Elia chuan, “Thlamuang takin kal la, a hnêna i dîl chu Israel-te Pathian chuan pe che rawh se,” a ti a.
1:18 Ani chuan, “I chhiahhlawhnu hi min duhsak zêl rawh aw,” a ti a. Tichuan, Hani chu a chhuak a, chawte a ei a, lungngai hmêl a pu ta lo va.
1:19 A tûkah chuan zîng takah an tho va, Lalpa hnênah an ṭawngṭai a, Rama khuaa an in lamah chuan an haw ta a. Elkana chuan a nupui Hani chu a pâwl a. Lalpa chuan ani chu a hre reng a.
1:20 Chumi hnu chuan Hanin nau a pai a, fapa a hring a, “ Lalpa hnêna ka dîl chhuah a ni” tiin a hmingah Samuela a sa a.
1:21 Elkana leh a chhûngte chu Lalpa hnêna an kum tin thilhlan hlân tûr leh an thutiam hlen tûrin an chho va,
1:22 Hani erawh chu a kal ve lo. A pasal hnênah chuan, “Naupang hian hnute hnêk a bân hunah ani chu ka hruai ang a, Lalpa hnênah ka hlân ang a, chutah chuan a awm reng tawh ang,” a ti a.
1:23 A pasal Elkana chuan a hnênah, “Ṭha i tih ang chuan ti rawh, hnute hnêk i bântîr thlengin awm la, Lalpa chuan i tih ang chuan thlentîr rawh se,” a ti a. Hani chuan a fapain hnute hnêk a bân hma chuan inah a awmpui ta a.
1:24 Hnute hnêk a bântîr hnu chuan a fapa chu a hruai a, chhangphut kg. sâwm leh uain bûr khat a keng a, bâwngpa kum thuma upa kaiin Silo khuaa Lalpa inah chuan a kal ta a, a fa chu a la naupang hle a.
1:25 Bâwngpa chu an talh a, naupang chu Elia hnênah chuan an hruai a.
1:26 Tin, ani chuan, “Aw ka pu, nangmah ngeiin i hria a; ih e, ka pu, kei hi he laia i hmaa Lalpa hnêna ṭawngṭai hmeichhia kha ka ni asin.
1:27 He naupang dîl hian ka ṭawngṭai a; tichuan, Lalpan ka dîl chu min pe ta a.
1:28 Chuvângin, ani chu Lalpa hnênah ka hlân a ni. A dam chhûng zawng Lalpa tâna hlan a ni,” a ti a. Chutah chuan Lalpa hmaah an kûn ta a.