1 Samuel 24
24:1 Saulan Filistia mite a ûm chu a lo haw chuan, “Ngai teh, Davida chu Engedi thlalêrah a awm e,” tiin an hrilh a.
24:2 Saula chuan Israel mi sângthum a thlan chhuahte nên chuan sathâr chênna lungpui hmuna Davida leh a hote awm chu a zawng ta a.
24:3 An kalna kawng sirah chuan berâm huang a lo awm a. Chutah chuan pûk a awm, Saula chu inthiar tûrin a va lût a, Davida leh a hote chu pûk chhûngril lamah chuan an lo awm reng a.
24:4 Davida hote chuan, “ Lalpan i hnêna a sawi, ‘Ngai teh, i hmêlma chu i kutah ka pe ang che, a chungah ṭha i tih angin ti ang che,’ a tih kha a lo thleng ta a nih hi,” an ti a. Davida chu a tho va, a rûk têin Saula kawrfual hmâwr chu a va hlep a.
24:5 Chumi hnu chuan Davida chuan Saula kawrfual hmâwr a hleh avâng chuan a inthiam lo hle a.
24:6 A hote hnênah chuan, “ Lalpa hriakthih, ka pu chunga kut ka lo lek hi ka tih loh tawp tûr ka lo ti a ni; ani chu Lalpa hriakthih a ni ngei si a,” a ti a.
24:7 Davida chuan hêng thu hian a mite chu a thlêm dai a, Saula beih chu a remti ta lo va. Saula pawh chu a tho va, pûk aṭang chuan a chhuak a, a kal leh ta a.
24:8 Chumi hnu chuan Davida pawh chu a lo tho va, pûk aṭang chuan a lo chhuak a, “Lalpa, ka lalpa,” tiin Saula chu a au zui a, Saula chu a lo hawi a, Davida chuan bawkkhupin zah takin chibai a bûk a.
24:9 Davida chuan Saula hnênah, “Ngai teh, ‘Davidan i chhiatna a zawng a ni,’ tia miten i hnêna an sawi chu engah nge i awih ṭhin le?
24:10 Ngai teh, vawiin hian he pûk chhûng ngeiah hian Lalpan ka kutah a hlân che tih nangmah ngeiin i hria. That tûr chein mi ṭhenkhatin min nawr a; mahse, ka zuah che a ni. ‘Ka lalpa chungah kut ka thlâk lo vang, Lalpa hriakthih a ni si a;’ ka ti a ni.
24:11 En teh, ka pu, i puan fêm ka ken reng hi, i puanfêm pawh ka hlep ngei a; mahse, ka that duh lo che a ni; i chungah ka hel lo va, thil sual tih pawh ka nei hek lo. Thah tumin min zawng mah la, kei chuan i chungah thil sual tih ka duh lo tih hria ang che.
24:12 Lalpa chuan nang nêna kan inkâr thu hi rêl sela, kei zawngin i chungah kut ka thlâk dâwn lo, Lalpa chuan i lakah phuba la zâwk rawh se.
24:13 Hmânlai thufingin, ‘Mi sualin thil sual an ti ṭhîn,’ a ti a; kei chuan i chungah kut ka thlâk lo vang.
24:14 Israel lal chu tu beih tumin nge a lo chhuah? Tu nge i ûm le, ui thisâwn nge uihli?
24:15 Lalpa chuan nang nêna kan inkâr thu rêl sela, tifel rawh se. Ka chungthu hi ngaihvenin mi sawipui sela, i kut ata mi chhan chhuak rawh se,” a ti a.
24:16 Chûng thu chu Davidan Saula hnêna a sawi zawhin Saula chuan, “Ka fapa David, i aw a ni maw?” a ti a, ring takin a ṭap chhuak a.
24:17 Davida hnênah chuan, “Kei ai chuan i fel zâwk daih a ni, nang chuan ka chungah thil ṭha i ti a, kei erawh chuan thil ṭha lo ka ti a ni.
24:18 Vawiin hian ka chunga i ṭhatzia i tilang ta, Lalpan i kuta min pêk pawhin min that duh lo va.
24:19 Miin a hmêlma hmu fuh sela, a khawih duh lo vang em ni? Vawiina ka chunga i thil tih dânah hian Lalpa chuan thil ṭhain rûl che rawh se.
24:20 Ngai teh, lal i la ni ngei dâwn a, Israel-te lalram chu i kutah tihngheh a la ni ngei dâwn tih ka hre ta.
24:21 Ka thlahte tiboral lo tûr leh ka pa chhûngkaw zîng ata ka hming thai bo lo tûrin tûnah Lalpa hming chhâlin chhia chham rawh khai,” a ti a.
24:22 Tichuan, Davida chuan Saula hnênah chhia a chham a; Saula chu in lamah a hâwng a, Davida leh a hote chu an bihrûkna lamah an chho ta thung a.