Genesis 18
18:1 Abrahama chu chhûn ni lum lai taka puan in kawngka bula a ṭhut laiin, Lalpa chu Mamre sasaw kiangahte chuan a hnênah a rawn inlâr a;
18:2 tin, a han dâk a, a en a; tin, ngai teh, a zâwn lawkah chuan mi pathum an lo ding reng a; tin, a hmuh veleh puan in kawngka ata chu anmahni lâwm tûrin a va tlân a, lei siin chibai a bûk a,
18:3 “Ka pu, mi khawngaih theih chuan, khawngaih takin i chhiahhlawh hi mi kal pêl lul suh ang che u;
18:4 tui tlêm tal rawn la sela, in kete sil ula, thing hnuaiah hian châwl teh rih u.
18:5 Chhang tlêm tal ka va la ang a, in thinlung tiharh ang che u; chumi hnuah chuan in kal zêl dâwn nia; chumi avânga in chhiahhlawh hnêna lo kal hi in ni châwk ang a,” a ti a. Tin, anni chuan, “I sawi ang chuan va ti rawh,” an ti a.
18:6 Tichuan, Abrahama chu puan in chhûngah Sari hnênah chuan a lût thuai a, “Rang takin chhangphut dip tak tehkhâwng thum siam la, hmet la, chhangpêrahte siam rawh,” a ti a.
18:7 Tin, Abrahama chu bâwng rual lamah a va tlân a, bâwngno nalh ṭha zet hi a rawn la a, chhiahhlawh hnênah a pe a; tin, ani chuan a lo siam thuai thuai a.
18:8 Tin, hnute tui khal te, hnute tui te, bâwngno sa siamte chu a la a, an hmaah a va hlui ta a; tin, thing hnuaiah chuan an kiangah a ding reng a, anni chuan an ei ta a.
18:9 Tin, anni chuan a hnênah, “I nupui Sari khawiah nge a awm?” an ti a. Tin, ani chuan, “Saw puan inah sâwn,” a ti a.
18:10 Tin, ani chuan, “Hun hi a lo thlen leh tikah chuan i hnênah ka lo kal leh ngei ngei ang a; tin, ngai teh, i nupui Sari chuan fapa a nei ang,” a ti a. Tin, a hnunga puan in kawngka bul aṭang chuan Sarin a lo hria a.
18:11 Abrahama leh Sari chu upa tak, tar tawh tak an ni a; hmeichhe dân pângngai chu Sari chungah chuan a reh daih tawh a.
18:12 Tichuan, Sarin, “Tar ka nih tawh hnu hian lâwmna ka nei ang maw, ka lalpa lah a upa tawh bawk si a?” tiin a rilruin a nui a.
18:13 Tin, Lalpa chuan Abrahama hnênah, “Engati nge Sarin, ‘Kei tar hian fa ka hring êm ang maw?’ tia a nuih?
18:14 Lalpa tân thil rêng rêng a harsa lutuk em ni? Hun ruatah, hun a lo thlen tikah chuan i hnênah ka lo kal leh ang a; tin, Sari chuan fapa a nei ang,” a ti a.
18:15 Chutichuan, Sari chuan. “Ka nui lo,” tiin a pha a; a hlau si a. Tin, ani chuan, “Awih loh loh tûr; i nuih ngei kha le,” a ti a.
18:16 Tin, mite chu chuta ta chu an tho va, Sodom khaw lam chu an en a; tin, Abrahama chu anmahni thlah tûrin an hnênah a kal ve a.
18:17 Tin, Lalpa chuan, “Ka thiltih tûr hi Abrahama lakah hian ka zêp ang em aw?
18:18 Abrahama hi chi ropui leh thiltithei tak a lo la ni ngei dâwn a, amahah chuan khawvêla chi tin an la thawveng dâwn si a.
18:19 Lalpa kawng an zawh theih nân a hnua a fate leh a chhûngte, thil fel taka ti tûr leh rorêl anga ti tûra thu a pêk theihna tûrin ani chu ka ruat tawh si a; chutichuan, a chungchâng thû a sawia chu Lalpan Abrahama chunga a thlentîr theihna tûrin,” a ti a.
18:20 Tichuan, Lalpa chuan, “Sodom leh Gomorra khaw au thâwm chu a nasain, an sual nasa êm êm ngei mai;
18:21 tûnah ka zuk kal ang a, an au thâwm ka hnêna lo thleng ang ngei hian an ti nge ti lo ka en ang a; an tih loh chuan ka hre mai ang,” a ti a.
18:22 Tin, mite chu chuta ta chu an hawi a, Sodom khaw lam chu an pan ta a; Abrahama erawh chu Lalpa hmaah chuan a la ding reng a.
18:23 Tin, Abrahama chuan a va hnaih a, “Mi felte chu mi sualte zîngah i tiboral ve dâwn em ni?
18:24 Khaw chhûngah chuan mi fel sawmnga tal an awm mahna; a chhûnga mi fel sawmnga awmte avâng chuan khua chu zuah phah lovin i tiboral dâwn em ni?
18:25 Nang êm chuan chutiang chuan mi felte chu mi sualte anga an awm vena tûra, mi felte chu mi sualte zînga tihhlum ve mai te chu i ti âwm êm si lo va; nang êm chuan i ti âwm êm si lo! Lei chung zawng zawng Rorêltu chuan fel takin a ti dâwn lâwm ni?” a ti a.
18:26 Tin, Lalpa chuan, “Sodom khaw chhûngah chuan mi fel sawmnga pawh ka hmuh chuan, anmahni avâng chuan khaw pum pui chu ka zuah mai ang,” a ti a.
18:27 Tin, Abrahama chuan, “Ngai teh, kei vaivut leh meivâp mai hian Lalpa chu ka be pawp ta sa che:
18:28 mi fel chu pangain sawmnga an tling lo a ni mahna; pangaa an tlin loh avângin khaw pum pui chu i tiboral dâwn em ni?” a ti a, a chhâng a. Tin, ani chuan, “Chutah chuan sawmli leh panga pawh ka hmuh chuan ka tiboral lo vang,” a ti a.
18:29 Tin, ani chuan amah chu a be leh zêl a, “Chutah chuan sawmli chauh i hmu a ni mahna,” a ti a. Tin, ani chuan, “Sawmli avâng pawh chuan ka tiboral lo mai ang,” a ti a.
18:30 Tin, ani chuan, “Aw, Lalpa chu thinur suh ang che, ka han sawi leh teh ang: chutah chuan sawmthum chauh i hmu a ni mahna,” a ti a. Tin, ani chuan, “Chutah chuan sawmthum pawh ka hmuh chuan ka tiboral lo mai ang,” a ti a.
18:31 Tin, ani chuan, “Ngai teh, Lalpa chu ka be pawp ta sa che: chutah chuan sawmhnih chauh i hmu a ni mahna,” a ti a. Tin, ani chuan, “Sawmhnih avâng pawh chuan ka tiboral lo vang,” a ti a.
18:32 Tin, ani chuan, “Aw, Lalpa chu thinur suh ang che, vawi khat chauh chuan ka han sawi leh teh ang: chutah chuan sâwm chauh i hmu a ni mahna,” a ti a. Tin, ani chuan, “Sâwm avâng pawh chuan ka tiboral lo vang,” a ti a.
18:33 Tichuan, Lalpa chu Abrahama nêna an inbiak zawh veleh chuan a kal ta a; tin, Abrahama chu ama awmna lamah a kîr leh ta a.