Library · lus

Genesis 2

2:1 Tichuan, lei leh vân chu an chunga awmho zawng zawngte nên chuan siam zawh a ni ta a. 2:2 Tin, Pathianin ni sarih nîah chuan a thilsiam chu a ti zo va, ni sarih nîah chuan a thilsiam zawng zawng chu a chawlhsan ta a. 2:3 Tichuan, Pathianin ni sarih ni chu mal a sâwm a, a serh ta a; chumi nîah chuan Pathianin a thilsiam zawng zawng, thu ngawta a siam leh kuta a siamte chu a chawlhsan tâk avângin. 2:4 Lei leh vân siam dân chu hetiang hi a ni. Lalpa Pathianin lei leh vân a siam ni khân, 2:5 leia hnim rêng rêng hi leiah a la awm lo va, leia thlai rêng rêng pawh hi a la ṭo hek lo. Lalpa Pathianin lei chungah ruah a la sûrtîr si lo va, lei lettu tûrin mihring lah an la awm hek lo; 2:6 amaherawhchu, lei aṭangin chhûm a lo chhuak a, lei chung zawng zawng chu a tihnâwng ṭhîn a ni. 2:7 Tin, Lalpa Pathianin leia vaivutin mihring a siam a, a hnârah chuan nunna thaw chu a thaw lût a; tichuan, mihring chu mi nung a lo ni ta a. 2:8 Tin, Lalpa Pathianin chhak lamah, Eden-ah chuan huan a siam a, a mihring siam chu chutah chuan a awmtîr ta a. 2:9 Tin, lei aṭangin Lalpa Pathianin thing mit la tak leh ei mi tinrêng a ṭotîr a. Nunna thing pawh huan lai takah chuan a ṭotîr a, a chhia leh a ṭha hriatna thing pawh. 2:10 Tin, Eden aṭangin huan tihnâwng tûrin lui a luang chhuak a; chuta ṭang chuan a pêng darh a, pêng li a lo ni ta a. 2:11 A pakhatna hming chu Pison a ni a; chu chu Havila ram zawng zawng hualtu chu a ni a, chutah chuan rangkachak a awm. 2:12 Chumi rama rangkachak chu ṭha tak a ni. Chutah chuan bedolak leh berul lung pawh a awm. 2:13 Tin, lui pahnihna hming chu Gihon a ni a; chumi chu Kus ram zawng zawng hualtu chu a ni. 2:14 Tin, lui pathumna hming chu Hiddekel a ni a; chu chu Assuria ram chhak lama luang chu a ni. Tin, lui palina chu Euphrates a ni. 2:15 Tin, Lalpa Pathian chuan mihring chu a hruai a, Eden huanah chuan a enkawl leh a vêng tûrin a dah ta a. 2:16 Tin, Lalpa Pathian chuan mihring hnênah chuan, “Huana thing tinrêng rahte hi i duh duhin i ei thei e; 2:17 a chhia leh a ṭha hriatna thing rah erawh hi chu i ei tûr a ni lo, i ei chuan i ei ni la lain i thi ngei tûr a ni,” tiin thu a pe a. 2:18 Tin, Lalpa Pathian chuan, “Mihring amah chauhva awm hi a ṭha lo ve; amah ṭanpuitu tûr a kawppui âwm mi ka siamsak teh ang,” a ti a. 2:19 Tin, Lalpa Pathian chuan leiin ramsa tinrêng leh chunglêng sava tinrêng chu a siam a, an hmingah eng nge a vuah dâwn tih hriat nân Adama hnênah a hruai hlawm a; tin, thil nung tinrêngte chu Adaman an hminga a lo vuah apiang chu an hming a lo ni hlen ta a. 2:20 Tichuan, Adama chuan ran zawng zawng te, chunglêng sava te, ramsa tinrêng te chu hming a vuah ṭheuh va; nimahsela, Adama tân chuan ṭanpuitu tûr a kawppui âwm mi a awm lo va. 2:21 Tichuan, Lalpa Pathian chuan Adama chu tui takin a muthilhtîr a; tichuan, a muhîl ta a; tin, a nâk ruh pakhat a la a, chumi ai chu tisain a awh phuitîr ta a. 2:22 Tin, Lalpa Pathian chuan Adama laka a lâk nâk ruh chu hmeichhiaah a siam a, Adama hnênah a hruai ta a. 2:23 Tin, Adama chuan, “Hei zet chu ka ruh ang ruh neia, ka tisa ang tisa nei ngei chu a ni; mipa laka lâk chhuah a nih avângin ‘hmeichhia’ tih tûr a ni ang,” a ti a. 2:24 Chuvângin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang. 2:25 Tin, Adama leh a nupui chu an pahnihin saruakin an awm a, an zak lêm lo va.