Genesis 4
4:1 Tin, Adama chuan a nupui Evi chu a pâwl a; tichuan, a rai a, Kaina a hring a, “ Lalpa ṭanpuiin mipa ka lo nei ta,” a ti a.
4:2 Tin, a nau Abela a rawn hring leh a. Tin, Abela chu berâm vêngtuah a awm a, Kaina erawh chu lei lettuah a awm.
4:3 Tin, a nakinah chuan heti hi a ni a, Kaina chuan Lalpa hnêna hlan atân lova mi a rawn la a.
4:4 Tin, Abela pawh chuan a berâm rual zînga piang hmasa berte leh an thaute chu a rawn la bawk a. Tin, Lalpa chuan Abela leh a thilhlan chu a lâwm a;
4:5 Kaina leh a thilhlan erawh chu a lâwm ve lo va. Tichuan, Kaina chu a thinur êm êm a, a hmêl chu a lo dur ta khup a.
4:6 Tichuan, Lalpa chuan Kaina hnênah chuan, “Engati nge i thin a ur? Engati nge i hmêl a lo dur tâk?
4:7 Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni; a duh zâwng chu nangma hnên lam a ni ang a, a chungah thu i nei tûr a ni,” a ti a.
4:8 Kaina chuan a nau Abela hnênah, “Lovah i feh ang,” a ti a. Tin, heti hi a ni a, lova an awm laiin Kaina chuan a nau Abela chu a bei a, a that ta mai a.
4:9 Tichuan, Lalpa chuan Kaina hnênah chuan, “I nau Abela kha khawiah nge a awm tâk?” a ti a. Tin, ani chuan, “Ka hre lo. Ka nau vêngtu ka ni em ni?” a ti a.
4:10 Tin, ani chuan, “Eng nge i tih tâk ni? I nau thisen aw chuan lei aṭangin mi au asin.
4:11 Chuvângin, lei, i kut ata i nau thisen dawng tûra a kâ lo ângtu ata hi ânchhe dawng i ni ta.
4:12 Lei i leh pawhin a ṭhatna chu a pe phal tawh lo vang che. Leiah hian tlân bo leh vâkvai i lo ni tawh ang,” a ti a.
4:13 Tin, Kaina chuan Lalpa hnênah, “I mi hremna hi a nasa êm a, ka tuar zo lo vang.
4:14 Ngai teh, nangin vawiinah hian lei chung ata mi hnawt chhuak ta si a, i mit hmuh phâk loh va thuhrûkin ka awm dâwn ta a; leiah hian tlân bo leh vâkvai ka lo ni dâwn ta si a; tichuan, heti hi a ni ang a, tu pawh mi hmu apiangin mi that mai ang,” a ti a.
4:15 Tin, Lalpa chuan a hnênah, “Chuti a nih chuan, tu pawh Kaina that apiang chu a leh sarihin a chungah phuba lâk a ni ang,” a ti a. Tichuan, miin amah an hmuha an thah loh nân Lalpan Kaina chu a chhinchhiah ta a.
4:16 Tichuan, Kaina chu Lalpa hnên ata chu a chhuak a, Eden chhak lama Nod ramah chuan a awm ta a.
4:17 Tin, Kaina chuan a nupui a pâwl a; tichuan, a rai a, Enoka a hring a. Tin, khua a siam a, a khaw hmingah chuan a fapa hming chawiin Enok a ti a.
4:18 Tin, Enoka chuan fapa Irada a nei a, Irada chuan fapa Mehujaela a nei a, Mehujaela chuan fapa Methusaela a nei a, Methusaela chuan fapa Lameka a nei a.
4:19 Tin, Lameka chuan nupui pahnih a nei a: pakhat hming chu Adai a ni a, pakhat hming chu Zillai a ni.
4:20 Tin, Adai chuan Jabala a hring a; ani chu puan ina awm ran vulhtuho thlahtu a ni.
4:21 A nau hming chu Jubala a ni a; ani chu ṭingṭang leh phênglâwng tumtuho zawng zawng thlahtu a ni.
4:22 Tin, Zillai pawh chuan Tubal-kaina, dâr leh thîr hriamhrei tinrêng chhertu a hring a. Tin, Tubal-kaina farnu chu Naami a ni.
4:23 Tin, Lameka chuan a nupuite hnênah chuan: “Adai leh Zillai-te u, ka aw hria ula; Lameka nupuite u, ka thusawi hi ngaithla rawh u. Mi tihhliam avângin mi ka that a, Mi vuak thitlin avângin tlangvâl ka that a ni.
4:24 Kaina phuba mah a leh sariha an lâk dâwn chuan, Lameka phuba chu a leh sawmsarih leh pasarihin an la ngei ngei ang,” a ti a.
4:25 Tin, Adama chuan a nupui chu a pâwl leh a; tichuan, ani chuan fapa a hring leh a, a hmingah chuan Setha a sa a: “Pathianin Abela aiah chi thlah dang mi ruatsak ta; Kaina chuan amah a that ta si a,” a ti a.
4:26 Tin, Setha chuan, amah ngei pawh chuan fapa a nei ta a; a hmingah chuan Enosa a sa a. Chumi lai chuan miten Lalpa hming chu an lo lam ṭan ta a.