Genesis 9
9:1 Tin, Pathianin Nova leh a fapate chu mal a sâwm a, an hnênah, “Chi tam tak thlaha lo pungin, lei hi luah khat rawh u.
9:2 Nangmahni ṭihna leh hlauhna leia sa tinrêng leh chunglêng sava tinrêngin an nei ang; chûngte leh leia bawkvâka kal zawng zawng leh tuifinriat sangha zawng zawngte chu, in kuta pêk an ni vek tawh.
9:3 Thil nung che thei tinrêngte chu in tân ei tûr an ni ang a; thlai hring ka pêk che u ang khân engkim ka pe vek a che u.
9:4 Amaherawhchu, sa a nunna (a thisen) chawpin in ei tûr a ni lo.
9:5 Tin, in thisen, in nunnate thisen phuba chu ka la ngei ngei ang; sa tinrêng lakah ka la ang, mihring lakah pawh. Mi tin an unaute lakah chuan, mihring nunna phuba chu ka la ṭheuh vang.
9:6 Tu pawh mihring thisen chhuahtu chu, mihring vêkin ama thisen chu an chhuah ve tûr a ni; Pathian anpuiin mihring a siam si a.
9:7 Tin, nangni chu chi tam tak thlahin lo pung rawh u; leiah hian fa tam tak hring ula, a chungah hian lo pung rawh u,” a ti a.
9:8 Tin, Pathianin Nova hnênah leh a hnêna awm a fapate hnênah chuan,
9:9 “Tin, ngai teh u, keimah ngeiin in hnênah leh in hnua in thlahte hnênah pawh ka thuthlung chu ka tinghet a ni;
9:10 in hnêna thil nung tinrêng awm, in awmpui sava te, ran te, ramsa tinrêngte hnênah pawh; lawng aṭanga lo chhuak zawng zawng, leia sa tinrêng hnênah lam chuan.
9:11 Tin, in hnênah ka thuthlung chu ka tinghet ang: tisa zawng zawng tuilêta tihboralin an awm leh tawh lo vang a; lei tichhe tûrin tui a lêt leh tawh hek lo vang,” tiin a sawi a.
9:12 Tin, Pathian vêkin, “Hei hi kei leh nangni leh in hnêna thil nung tinrêng awmte kâra chhuan, tâwp nei lova awm zêlte tân ka thuthlung chhinchhiahna chu a ni.
9:13 Chhûmah ka chhimbâl ka zâmtîr a, chu chu kei leh lei kâra thuthlung chhinchhiahna tûr a ni ang.
9:14 Tin, heti hi a ni ang a, lei chunga chhûm ka zâmtîrin chhimbâl chu chhûmah chuan a lang ang a,
9:15 kei leh nangni leh tisa zawng zawng zînga mi, thil nung tinrêngte kâra ka thuthlung awm hi ka hre reng ang; tichuan, tui chu tisa zawng zawng tiboral tûrin a lêt leh tawh lo vang.
9:16 Tin, chhimbâl chu chhûmah a zâm ṭhin ang; tichuan, Pathian leh lei chunga tisa awm zawng zawng zînga mi, thil nung tinrêngte kâra kumkhaw thuthlung awm chu, ka hriat reng theihna tûrin ka en ṭhîn ang,” a ti a.
9:17 Tin, Pathian vêkin Nova hnênah chuan, “Chu chu kei leh lei chunga tisa awm zawng zawng kâra ka thuthlung tihngheh chhinchhiahna a ni,” a ti leh a.
9:18 Tin, Nova fapa lawng aṭanga chhuakte chu Sema te, Hama te, Japhetha te an ni. Hama chu Kanaana pa a ni.
9:19 Chu mite pathum chu Nova fapate an ni a, chu mite laka chhuakte chuan lei zawng zawng hi an dâp zo ta a ni.
9:20 Tin, Nova chu lo neituah a awm ṭan a, grêp huan a siam a.
9:21 Uain chu a in a, a rui a; tichuan, a puan inah chuan a mu sual ta a.
9:22 Tin, Hama, Kanaana pa chuan a pa mu sual chu a hmu a, pâwna a unaute pahnih chu a hrilh a.
9:23 Tichuan, Sema leh Japhetha chuan puan an la a, kokia inzâwnin hnungtawlhin an kal a, an pa mu sual chu an khuh ta a. An hmai chu lehlam hawiin a awm a, an pa mu sual chu an hmu lo va.
9:24 Tin, Nova chu a uain rui chu a lo harh a, a fapa naupang berin a chunga a tih zia chu a lo hre ta a.
9:25 Tichuan, “Kanaana chu ânchhe dawngin awm rawh se; A unaute chhiahhlawhte chhiahhlawh a ni ang,” a ti a.
9:26 “ Lalpa, Sema Pathian chu fakin awm rawh se; Kanaana chu a chhiahhlawhah awm rawh se.
9:27 Pathianin Japhetha chu tilian sela, Sema puan inahte awm rawh se; Tin, Kanaana chu a chhiahhlawhah awm rawh se,” a ti bawk a.
9:28 Tin, Nova chu tuilêt hnu chuan kum zathum leh kum sawmnga a dam a.
9:29 Tichuan, Nova dam chhûng zawng zawng chu kum zakua leh kum sawmnga a ni a; tin, a thi ta a.