Library · lus

2 Samuel 18

18:1 Tin, Davida chuan a hnêna mi awmte chu a chhiar a, sipai sâng chunga hotute, za chunga hotute a siam a. 18:2 Tin, Davida chuan mite chu a tîr chhuak a, hmun thuma ṭhena hmun khat chu Joaban a ho va; tin, hmun thuma ṭhena hmun khat chu Joaba unaupa, Zeruii fapa Abisaian a ho va; tin, hmun thuma ṭhena hmun khat chu Git mi Itaian a ho va. Tin, lal chuan mipui hnênah, “Keimah ngei pawh in hnênah ka kal ve ngei ngei ang,” a ti a. 18:3 Nimahsela, mipuite chuan, “Kal ve lo ve! Keiniho hi chu tlân bo ta pawh ni ila, pawi an ti lo vang a; tin, a chanve lai pawh hi va thi mah ila, pawi an ti hek lo vang. Nang chu keiniho sîng tlukin i hlu si a; chuvângin, khawpui aṭanga min ṭanpui tûra inpeih renga i lo awm chu a ṭha zâwk a ni,” an ti a. 18:4 Tin, lal chuan an hnênah, “Ṭha in tih ang apiang chuan ka ti ang,” a ti a. Chutichuan, lal chu kulh kawngka bulah chuan a ding a; tin, mipui zawng zawng chu za têl têl leh sâng têl têlin an chhuak ta zut zut mai a. 18:5 Tin, lal chuan Joaba leh Abisaia leh Itaia chu, “Keimah vângin, tlangvâl Absaloma chu dîm takin va ti ang che u,” tiin thu a pe a. Mipui zawng zawngin Absaloma chungchâng thûa lalin sipai hotute zawng zawng thu a pêk lai chu an hria a. 18:6 Chutichuan, mipuite chu Israel mite do tûrin indona hmun lamah chuan an kal ta a. Tin, an indona chu Ephraim ram ngaw a ni a. 18:7 Tin, chutah chuan Davida mite hmaah chuan Israel mite chu an tlâwm ta a; tin, chutah chuan chumi ni chuan mi sînghnih zet an that a. 18:8 An indona chuan chumi lai ram zawng zawng chu a huam vek mai si a; chumi ni chuan khandaih ai mahin ram ngawin a lem hnem zâwk a ni. 18:9 Tin, Absaloma chuan Davida mite chu a va tâwk ta thut a. Absaloma chu a sabengtung chungah a chuang a. Sabengtung chu sasaw thing zâr buk tak hnuaiah a lût a, Absaloma lû chu sasaw thingah chuan a tâng ta a, lei si lo, vân si lovin a uai ta reng mai a. Tin, sabengtung chu a tlân ta zêl a. 18:10 Tin, tu emaw hian a hmu a, Joaba a hrilh a, “Ngai teh, sasaw thinga Absaloma inkhai reng ka hmu,” a ti a. 18:11 Tin, Joaba chuan a hrilhtu hnênah chuan, “Ngai teh, chu chu i hmu si a, engati nge i tihhluma, leiah i tihthlâk nghâl loh? Chutiang chuan ti la chu tangkaraw sâwm leh kâwnghrên ka pe tûr che a,” a ti a. 18:12 Tin, mi chuan Joaba hnênah, “Tangkaraw sâng pawh hmu dâwn mah ila, lal fapa chungah ka kut ka thlâk lo rêng rêng ang; kan beng hriat ngeiah lalin nang leh Abisaia leh Itaia hnênah, ‘Tlangvâl Absaloma chu tu mahin khawih hlek suh se,’ tiin thu a pe si che u a. 18:13 Rinawm lo takin lo that ta ringawt mai ila (lal lakah chuan eng mah thup theih a ni âwm si lo va), nang chu i inthiarfihlîm leh mai âwm si a,” a ti a. 18:14 Chutichuan, Joaba chuan, “Hetiang chuan i kiangah ka awm reng thei tawp lo mai,” a ti a, fei pathum a keng a, sasaw thing zînga dama lo la awm Absaloma thinhnûn takah chuan a chhun a. 18:15 Tin, Joaba râlthuam kengtu tlangvâl sâwm chuan an rawn hual a, Absaloma chu an chhun a, an that ta a. 18:16 Tin, Joaba chuan tawtawrâwt a hâm a, Israel-ho ûmtu mipuite chu an lo kîr ta a. Joaba chuan mipuite chu a dang ta tlat mai a. 18:17 Tin, Absaloma ruang chu an la a, ngawah khuarkhurum thûk takah chuan an paih a, a chungah chuan lung an tiang khâwm thûr a; tin, Israel mi zawng zawngte chu mahni puan in ṭheuhvah an tlân haw ta a. 18:18 Absaloma chuan a dam laiin lal ruamah lung tian a lo tiang tawh diam a; “Ka hming daih lohna tûrin fapa pawh ka nei si lo va,” a ti a. Chumi lung tian hmingah chuan ama hming a puttîr a; tûn thlengin Absaloma hriat rengna tih a ni. 18:19 Chutichuan, Zadoka fapa Ahimaaza chuan, “Ka va tlân ang a, Lalpan a hmêlma phuba a lâksak dân chanchin hi lal chu ka va hrilh ang e,” a ti a. 18:20 Tin, Joaba chuan a hnênah, “Vawiinah zawng chanchin chu va la hrilh suh, ni dangah la hrilh zâwk ang che. Lal fapa chu a thih tâk avângin, vawiinah zawng chanchin eng mah va hrilh suh ang che,” a ti a. 18:21 Tichuan, Joaba chuan Kus mi hnênah chuan, “Kal la, i thil hmuh va hrilh rawh le,” a ti a. Tin, Kus mi chuan Joaba chu kûnin chibai a bûk a, a tlân ta a. 18:22 Chutichuan, Zadoka fapa Ahimaaza chuan Joaba hnênah, “Eng pawh ni sela, Kus mi kha ka va ûm tâng e,” a ti leh a. Tin, Joaba chuan, “Ka fapa, chanchin hrilh man i hmu dâwn si lo va, engah nge i tlân ang?” a ti a. 18:23 Nimahsela, ani chuan, “Eng pawh ni sela, ka tlân ang e,” a ti a. Tin, ani chuan a hnênah, “Tlân mai rawh le,” a ti a. Chutichuan, Ahimaaza chu phaizâwl lam kawngah a tlân a, Kus mi chu a lehpêl a. 18:24 Tichuan, Davida chu kulh kawngka chhâwng inkârah chuan a lo ṭhu a. Tin, râlvêngtu chu kulh kawngka pâwnta zâwk chung lamah chuan a chho va, a han hawi vêl ruai ruai a; tin, ngai teh, mi pakhat amah chauhvin a lo tlân a. 18:25 Tin, râlvêngtu chu a au va, lal chu a hrilh a. Tin, râlvêngtu chuan, “Mi pakhat mai a nih chuan chanchin rawn sawi tûr a nei a ni ang,” a ti a. Tin, a lo kal thuai thuai a, a lo hnai ta telh telh a. 18:26 Tin, râlvêngtu chuan mi dang lo tlân a hmu leh a; tin, râlvêngtu chuan kawngkhâr vêngtu a au va. “Ngai teh, mi dang amah chauhvin a lo tlân leh e,” a ti a. Tin, lal chuan, “Ani pawh chuan chanchin a rawn thlen ve dâwn a nih chu,” a ti a. 18:27 Tin, râlvêngtu chuan, “A hmasa zâwka tlân dân chu Zadoka fapa Ahimaaza tlân dân ang hlein ka hria,” a ti a. Tin, lal chuan, “Ani chu mi ṭha tak a ni a, Chanchin Ṭha a rawn thlen dâwn a ni ang,” a ti a. 18:28 Tin, Ahimaaza chuan a au va, lal hnênah, “A fel vek e,” a ti a. Tin, a hmaia lei siin lal hmaah chuan chibai bûkin a kûn a, “Lalpa ka pu beih tuma kut thlâk tumtute dangchattu Lalpa i Pathian chu fakin awm rawh se,” a ti a. 18:29 Tin, lal chuan, “Tlangvâl Absaloma chu a dam alâwm maw?” a ti a. Tin, Ahimaaza chuan a chhâng a, “Joaban lal chhiahhlawh, kei i chhiahhlawh ngei hi mi tirh chhuah laiin an buai mur mur ka hmu a; nimahsela, eng nge ni tih erawh chu ka hre lo,” a ti a. 18:30 Tin, lal chuan, “Ka sîrah hian lo ding rih rawh,” a ti a. Tin, a sîrah a lo ding a. 18:31 Tin, ngai teh, Kus mi chu a lo thleng a; tin, Kus mi chuan, “Lalpa ka pu tân chanchin ka rawn thlen e; i chunga helho zawng zawng phuba chu vawiinah hian Lalpan a lâksâk ta che a ni,” a ti a. 18:32 Tin, lal chuan Kus mi hnênah chuan, “Tlangvâl Absaloma chu a dam alâwm maw?” a ti a. Tin, Kus mi chuan a chhâng a, “Lalpa ka pu hmêlmate leh i chhiatna zawngtute zawng zawng chu chu tlangvâl ang chuan awm vek rawh se,” a ti a. 18:33 Chutichuan, lal chu a mangang ta hle mai a, kulh kawngka chunga pindanah chuan a chho va, a ṭap a. Tin, a chhoh pah chuan, “Aw ka fapa Absalom, ka fapa, ka fapa Absalom, i aiah han thi teh zâwk ila aw! Aw Absalom ka fapa, ka fapa!” a ti a.