2 Samuel 2
2:1 Tin, heti hi a ni a, chumi hnuah chuan Davida chuan, “Judai rama khawiiah emaw ka han kal ang em?” tiin Lalpa a râwn a. Tin, Lalpa chuan a hnênah, “Han kal rawh khai,” a ti a. Tin, Davida chuan, “Khawiiah nge ka han kal ang?” a ti a. Tin, ani chuan, “Hebron-ah,” a ti a.
2:2 Chutichuan, Davida chu chutah chuan a han kal ta a, a nupuite pahnih, Jezreel mi Ahinoami leh Karmel mi Nabala nupui Abigaili-te nên.
2:3 Tin, Davida chuan a hnêna mi awm zawng zawng chu a hruai chho va, mi tin an chhûngkuate ṭheuh nên, Hebron khuaahte chuan an awm ta a.
2:4 Tin, Juda mite chu an va kal a, Juda mite chunga lal atân Davida chu hriak an thih a. Chutichuan, “Saula phûmtute chu Jabes-gilead mite an ni,” tiin Davida chu an hrilh a.
2:5 Tichuan, Jabes-gilead mite hnênah chuan Davida chuan mi a tîr a, an hnênah, “In pu, in pu Saula chu in khawngaihzia tilanga in lo phûm avângin Lalpa chuan malsâwm che u rawh se.
2:6 Tichuan, Lalpa chuan in chungah ngilneihna leh thutak lantîr sela; hêng thil in tih avâng hian kei pawhin in ngilneih man chu ka rûl ang che u.
2:7 Chutichuan, in kutte chu lo chak sela, huai takin awm rawh u; in pu Saula chu a thi ta si a, Juda chite chuan an chunga lal atân hriak min thih ta bawk a,” a ti a.
2:8 Tin, Nera fapa Abnera, Saula sipaite hotu chuan, Saula fapa Isbosetha chu Mahanaim-ah a hruai a;
2:9 Gilead chungah te, Asur chungah te, Jezreel chungah te, Ephraim chungah te, Benjamin chungah leh Israel zawng zawng chungahte lalah a siam ta a.
2:10 (Saula fapa Isbosetha chu Israel chunga ro a rêl ṭan lai chuan kum sawmli mi a ni a, kum hnih ro a rêl a.) Nimahsela, Juda mite chuan Davida chu an pawm zâwk a.
2:11 Davidan Hebron-a Juda chite chunga ro a lo rêlna chu kum sarih leh thla ruk a ni tawh a.
2:12 Tin, Nera fapa Abnera leh Saula fapa Isbosetha chhiahhlawhte chu Mahanaim ata an chhuak a, Gibeon-ah an kal a.
2:13 Tin, Zeruii fapa Joaba leh Davida chhiahhlawhte chu an kal chhuak a, Gibeon dîlah chuan an intâwk a; tichuan, pâwl khat chu dîl râl lehlamah an ṭhu a, pâwl khat chu dîl râl lehlamah.
2:14 Tin, Abnera chuan Joaba hnênah, “Tlangvâlte chu lo thawk sela, kan hmaah han inbei teh rêng ang hmiang,” a ti a. Tin, Joaba chuan, “Lo thawk ang hmiang,” a ti a.
2:15 Chutichuan, an thawk a, a zât chin ruat chiahin an kai phei a, Benjamin chi, Saula fapa Isbosetha lama ṭang sâwm leh pahnih; tin, Davida chhiahhlawh sâwm leh pahnih.
2:16 An khingpuite chu an lû ṭheuhvah an inman a, mahni bitumate chu khandaihin an nâkah an inchhun ṭheuh va; tichuan, an tlu za ta vek mai a. Chuvângin, chumi hmun chu Helkath-hazurim an ti ta a, chu chu Gibeon-a awm a ni.
2:17 Tichuan, chumi nia an inbei chu a nasa ta hle mai a; tin, Abnera leh Israel mite chu Davida chhiahhlawhte lakah chuan an tlâwm ta a.
2:18 Tin, chutah chuan Zeruii fapate pathum: Joaba te, Abisaia te, Asahela te an awm a; Asahela chu zukpui ang maia ngalchak a ni.
2:19 Chutichuan, Asahela chuan Abnera chu a ûm a; Abnera a ûm chu ding lam leh vei lama pêng hauh lovin a ûm ngat ngat a.
2:20 Chutichuan, Abnera chu a han lehhawi a, “Nang i ni maw, Asahel?” a han ti a. Tin, ani chuan a chhâng a, “Keimah ka ni e,” a ti a.
2:21 Tin, Abnera chuan a hnênah, “I ding lamah emaw, i vei lamah emaw khân pêng la, tlangvâl pakhat kha man la, a inrâlthuamna lâksak rawh,” a ti a. Nimahsela, Asahela chuan amah a ûm chu a pênsan duh chuang lo va.
2:22 Tin, Abnera chuan Asahela hnênah, “Mi pênsan rawh. Engah nge ka chhun thlûk ang che? I unaupa Joaba hmêl ka hmu ngam dâwn em ni?” a ti leh a.
2:23 Nimahsela, a pêng duh chuang lo va; chuvângin, Abnera chuan a fei chhawr lamin a pumah a chhun a, fei chu a hnung lamah a tlang a, chutah chuan a tlu ta tawp a, chumi hmunah chuan a thi ta a. Tin, heti hi a ni a, Asahela a tlûka a thihna hmun lo thleng apiang chu chutah chuan an ding chawt zêl a.
2:24 Joaba leh Abisaia chuan Abnera chu an ûm zêl a; tin, Gibeon thlalêr kawnga Gia dep Amma tlâng an thlen chuan ni a tla a.
2:25 Tin, Benjamina thlahte chu Abnera hnênah an pung khâwm a, pawl khatah an insiam a, tlâng chhîpah an va ding ta a.
2:26 Chutichuan, Abnera chuan Joaba a au va, “Khandaihin a sâm reng dâwn em ni ang? A tâwp lamah chuan a la lungngaihthlâk hle dâwn tih i hre lo vem ni? Eng chen nge mipuite chu an unaute ûm tawh lo tûra i hrilh dâwn le?” a ti a.
2:27 Tin, Joaba chuan, “Pathian nunna chhâlin ka sawi e, eng mah han sawi lo la chu naktûk zîng thlengin ka miten an ûm dâwn che u asin le,” a ti a.
2:28 Chutichuan, Joaba chuan tawtawrâwt chu a han hâm a, mipuite chu an ding ta ṭhup mai a, Israel mite chu an ûm ta lo va, an bei leh ta lo.
2:29 Tichuan, Abnera leh a mite chu Araba kal tlangin chumi zân chuan an kal zankhua a, Jordan an kân a, Bithron an kal tlang zak a; Mahanaim an thleng a.
2:30 Tin, Joaba chuan Abnera a ûm chu a kîrsan ta a. Tin, mipui zawng zawng a han khâwm vek chuan Davida hote sâwm leh pakua leh Asahela an lo kim ta lo va.
2:31 Davida hote erawh chuan Benjamin mite leh Abnera mite chu zathum leh sawmruk an tihlum a.
2:32 Chutichuan, Asahela ruang chu an la a, Bethlehem-a a pa thlânah an phûm a. Tin, Joaba leh a mite chu zankhuain an kal a, Hebron an thlenin khua a vâr a.