Library · lus

2 Kings 8

8:1 Tin, Elisan a fapa a tihdamsak hmeichhe hnênah chuan, “Tho la, nang leh i chhûngte nên, in awm theih theihna hmunah va awm rih rawh u; Lalpan ṭâm a tlâktîr dâwn e; he ramah hian kum sarih chhûng zet a tla nghe nghe dâwn a ni,” tiin a lo sawi tawh a. 8:2 Tichuan, hmeichhia chu a tho va, Pathian mi thu ang chuan a ti a; a chhûngte nên chuan Philistia-ho ramah kum sarih an va awm ta a. 8:3 Tin, kum sarih a lo vei hnuah chuan heti hi a ni a, chu hmeichhia chu Philistia-ho ram ata a lêt leh ta a; tin, a in leh a lo lal dîl tûrin a va kal a. 8:4 Tin, lal chuan Pathian mi chhiahhlawh Gehazia chu, “Elisan thil ropui a tih zawng zawng mi han hrilh teh khai,” tia a lo biak lai a ni a. 8:5 Tin, mi pakhat thi tawh a tihnun leh thu lal a lo hrilh lai mêk chuan heti hi a ni a, ngai teh, a fapa a tihnunsak leh hmeichhia chuan a in leh a lo lal chu a rawn dîl ve a. Tin, Gehazia chuan, “Aw lalber ka pu, hei hi a ni hmeichhia chu; tin, hei hi a ni a fapa Elisan a tihnun lehsaka chu,” a ti a. 8:6 Tin, lalin hmeichhia chu a han zawh chuan a hrilh ta a. Chutichuan, lal chuan hotu pakhat a ruatsak a, “A ta zawng zawng, a lova thil haw zawng zawng chenin, he ram a chhuahsan ata tûn thlenga mi hi pe leh vek rawh,” a ti a. 8:7 Tin, Elisa chu Damaska khuaah a kal a; tin, Suria lal Ben-hadada chu a damlo va; tichuan, “Pathian mi hetah a lo kal e,” tiin an hrilh a. 8:8 Tin, lalin Hazaela hnênah, “Lâwmman keng langin, Pathian mi be tûrin va kal la, ka nâ hi ka ṭha chhuak leh thei ang emaw Lalpa mi lo râwnsak teh se,” a ti a. 8:9 Chutichuan, Hazaela chu amah be tûr chuan a va kal a, lâwmman atân Damaska khuaa thil ṭha tinrêng, sanghâwngsei sawmli phur a keng a, a hmaah chuan a va ding a, “I fapa Ben-hadada, Suria lalin, ‘Ka nâ hi ka ṭha chhuak leh ang em?’ ti tûrin i hnênah hian mi rawn tîr a ni,” a ti a. 8:10 Tin, Elisa chuan a hnênah, “Kal leh ta langin, a hnênah, ‘I ṭha chhuak leh mawlh ang, a ti e,’ ti ang che; amaherawhchu, a la thi ngei dâwn a ni tih zawng Lalpan mi hriattîr a ni,” a ti a. 8:11 Tichuan, a tân zahthlâk khawpin a melh ta reng mai a; tin, Pathian mi chu a ṭap ta a. 8:12 Tin, Hazaela chuan, “Engati nge ka pu chu a ṭah mai?” a ti a. Ani chuan a chhâng a, “Israela thlahte chunga i thil ṭha lo tih tûr ka hriat vâng a ni; an kulhte i la hâlsak ang a, an tlangvâlte khandaihin i la that ang a, an fanau tê tête chu i la paih sawm ang a, nau pai lai an hmeichhiate chu i la pir thlêr dâwn a ni,” a ti a. 8:13 Tin, Hazaela chuan, “Kei i chhiahhlawh, uicho mai mai hian chutiang thil nasa tak chu han ti thei zia em ka nih?” a ti a. Tin, Elisa chuan a chhâng a, “Suria-ho chungah i la lal dâwn tih Lalpan mi hriattîr a ni,” a ti a. 8:14 Tichuan, Elisa hnên ata a chhuak a, a pu hnên lamah chuan a kal ta a; ani chuan, “Elisa chuan eng nge a lo hrilh che?” a ti a. Tin, ani chuan, “ ‘A ṭha chhuak leh mawlh ang,’ tiin mi hrilh,” a ti a. 8:15 Tin, a tûkah chuan heti hi a ni a, puan chhah tak a la a, tuiah a hnim a, chu chuan a hmai a upsak a, a thi ta a; tichuan, Hazaela chu a aiawhin a lal ta a. 8:16 Tin, Israel lal Ahaba fapa Jorama kum nga a lal kum chuan (chumi lai chuan Jehosaphata chu Juda lal a ni a), Juda lal Jehosaphata fapa Jehorama chu a lal ṭan a. 8:17 A lal ṭan lai chuan kum sawmthum leh kum hnih mi a ni a; Jerusalem khuaah kum riat ro a rêl a. 8:18 Ahaba chhûngte angin, Israel lalte kawng zawh chu a zawh ve a, Ahaba fanu nupuiah a nei a ni; tichuan, Lalpa mit hmuha thil ṭha lo tak a ti ṭhîn a. 8:19 Amaherawhchu, Lalpan a chhiahhlawh Davida avângin Judai ram chu a tichhe duh lo va, a thlahte chena khâwnvâr neihtîr reng a lo tiam tawh si a. 8:20 Ama chhanah chuan Edom-ho chu Juda-te lakah an hel a, an chunga lal tûr an insiam chawp a. 8:21 Tichuan, Jehorama chu Zair khuaah a tawlailîr zawng zawng nên a va kal a; tin, zânah a thawk chhuak a, anmahni hualtu Edom-hote leh an tawlailîr chunga hotute chu a va bei ta a; tin, mite chu an puan in lamahte an tlân ta vek a. 8:22 Chutichuan, Edom-ho chu tûn thlengin Juda-te lakah an la hel ta reng a ni. Chumi lai vêk chuan Libna khua pawh an lo hel ve a. 8:23 Tin, Jehorama chanchin dangte leh a thiltih zawng zawngte chu Juda lalte lal lai thu ziakna buah a chuang a ni lâwm ni? 8:24 Tin, Jehorama chu a pi leh pute hnênah a muhîl a, a pi leh pute zîngan Davida khawpuiah an phûm ta a. A fapa Ahazia chu a aiawhin a lal ta a. 8:25 Israel lal Ahaba fapa Jorama lal kum sâwm leh kum hnih kum chuan, Juda lal Jehorama fapa Ahazia chu a lal ṭan a. 8:26 Ahazian ro a rêl ṭan lai chuan kum sawmhnih leh kum hnih mi a ni a; tin, Jerusalem khuaah kum khat ro a rêl a. Tin, a nu hming chu Athali, Israel lal Omria fanu a ni. 8:27 Ahaba chhûngte kawng zawh chu a zawh ve a, Ahaba chhûngte angin, Lalpa mit hmuha thil ṭha lo tak a ti ṭhîn a; Ahaba chhûngte mâkpa a ni si a. 8:28 Tin, ani chu Ahaba fapa Joraman Ramoth-gilead khuaa Suria lal Hazaela a han beihnaah chuan a tel ve a; tin, Suria-ho chuan Jorama chu an lo hliam a. 8:29 Tin, Lal Jorama chu Suria lal Hazaela an beihnaa Suria-hovin Rama khuaa an lo hliam chu Jezreel khuaa intidam tûrin a kîr leh ta a. Tin, Juda lal Jehorama fapa Ahazia chu Ahaba fapa Jorama a nat avâng chuan kan tûrin Jezreel khuaah a zuk kal a.