Psalms 138
138:1 I hnênah ka thinlung zawng zawngin lâwmthu ka sawi ang a; Pathianho hmaah pawh nangmah fakin ka zai ang.
138:2 I biak in thianghlim lam hawiin chibai ka bûk ang chia, I ngilneihna leh i thutak avângin i hming ka fak ang; I thu chu i hming rêng rêng ai chuan i tilian ta si a.
138:3 Ka auh ni che khân nangin mi chhâng a, Ka nunna tichakin mi fuih a.
138:4 Aw Lalpa, leia lal zawng zawng chuan lâwmthu an hrilh ang che, I kâa thuchhuakte chu an hre si a.
138:5 A ni, Lalpa awm dân thute chu hlaah an sa ang; Lalpa ropuizia chu a nasa si a.
138:6 Lalpa chu chungnung tak a ni na a, mi tlâwmte chu a ngaihsak ṭhîn a; Mi chapote erawh chu hla tak aṭangin a hre ṭhîn.
138:7 Manganna zîngah lêng mah ila, nangin mi tiharh ang; Mi dotute thinur bei tûrin i kut i phar ang a, I kut ding lamin mi chhandam ang.
138:8 Lalpa chuan ka chungchânga a tih tûr chu a hlen ang: Aw Lalpa, i ngilneihna chu kumkhuain a awm ang a; Nangma kut thiltihte hi bânsan suh ang che.