Psalms 146
146:1 Lalpa chu fak rawh u. Aw ka nunna, Lalpa chu fak rawh.
146:2 Ka dam chhûng zawngin Lalpa chu ka fak ang a; Ka nun chhûng zawngin ka Pathian fakin ka zai ang.
146:3 Mi liante chu ring suh ula, Mihring fapa, ṭanpuina rêng rêng awm lohna chu ring hek suh u.
146:4 A thawin a chhuahsan a, ani chu a leilungah a kîr leh a; Chumi ni ngei chuan a ngaihtuahnate chu a bo nghâl a ni.
146:5 Jakoba Pathian ṭanpuitua nei chu lâwm takin a awm ṭhîn, Lalpa Pathiana beiseina neitu chu:
146:6 Ani chu lei te, vân te, Tuifinriat te leh an chhûnga awm zawng zawng siamtu a ni; Ani chuan kumkhua atân thutak a vawng ṭha ṭhîn a,
146:7 Ani chuan hnehchhiahna tuarte tân ro a rêl ṭhîn a, Ani chuan rilṭamte hnênah chaw a pe ṭhîn. Lalpa chuan mi tângte chu a chhuah ṭhîn a;
146:8 Lalpa chuan mitdelte mit a tivâr ṭhîn a; Lalpa chuan kun ngawih ngawihte chu a kai tho ṭhîn a; Lalpa chuan mi felte chu a hmangaih ṭhîn a;
146:9 Lalpa chuan mikhualte chu a vawng ṭha ṭhîn a; Pa nei lo leh hmeithai chu a chelh reng ṭhîn a; Mi suaksualte kawng erawh chu a tiletling ṭhîn.
146:10 Lalpa chu kumkhuain lalah a ṭhu ang a, Aw Zion, i Pathian chu chhuan zawng zawng thlengin lalah a ṭhu ang. Lalpa chu fak rawh u.