Library · lus

Psalms 26

26:1 Aw Lalpa, ro mi rêlsak ang che, Rilru ṭha tak puin ka awm si a. 26:2 Aw Lalpa, mi en fiahin, mi fiah la; Ringhlel lovin Lalpa chu ka ring bawk a. Ka rilru leh ka thinlung hi tithianghlim ang che. 26:3 I ngilneihna chu ka hmaah a awm si a, I thutakah ka awm fo bawk a. 26:4 Mi eng mah lo mai maite hnênah ka ṭhu ngai lo va; Vervêkte hnênah pawh ka lût hek lo vang. 26:5 Thil ṭha lo titute inkhâwmho chu ka hua a, Mi suaksualte hnênah ka ṭhu lo vang. 26:6 Ka kutte hi sawisêl bonain ka sil ang a, Chutiangin, aw Lalpa, i maichâm chu ka kal hual ang; 26:7 Lâwm thu sawina hla ka sak theih a, I thilmak tih zawng zawng thute chu ka hrilh theih nân. 26:8 Lalpa, i awmna in chu ka ngaina a, I ropuina awmna pawh. 26:9 Ka nunna hi mi sualte zîngah la tel suh la, Ka nun pawh hi thisen chhuah hmangte zîngah la tel hek suh ang che; 26:10 An kutah chuan ngaihtuahna sual a awm a, An kut ding lam chu thamnain a khat a. 26:11 Nimahsela, kei zawng rilru ṭha puin ka awm ang; Min tlan la, min khawngaih ang che. 26:12 Ka ke hi hmun zâwl takah a ding a; Inkhâwmnaahte chuan Lalpa chu ka fak ang.