Library · lus

Psalms 36

36:1 Mi suaksual bawhchhiatna chuan ka thinlung chhûngah hian thu a sawi a, “A mit hmuhah Pathian hlauhna rêng rêng a awm lo,” tiin. 36:2 “Ka khawlohna an hmu chhuak lo vang, an haw hlei lo vang e,” tiin, Mahni mit hmuhah mahni vêk a infak chawp si ṭhîn a. 36:3 A kâa thuchhuakte chu sualna leh bumna thu hlîr a ni ṭhîn a; Finvâr leh thil ṭha tih a bâng ta a. 36:4 A khumlaizâwlah chuan thil sual a suangtuah ṭhîn a; Kawng ṭha lovah chuan a kal lui a, sualna chu a ten lo. 36:5 Aw Lalpa, i ngilneihna chu vânahte khian a awm a; I rinawmna chuan vân dumte khi a tawng a ni. 36:6 I felna chu Pathian tlângte ang a ni a; I rorêlte chu tui thûk zau tak ang a ni; Aw Lalpa, mihring leh sa i humhim ṭhîn. 36:7 Aw Pathian, i ngilneihna chu a va hlu êm! Mihring fate chuan i thla hnuai an chuh ṭhîn. 36:8 Anni chu i in chhûng thil ṭhain an tlai êm êm ang a; I lâwmna luia mi chu i intîr bawk ang. 36:9 Nunna tuikhur chu i hnênah a awm si a; I êngah chuan êng kan la hmu ang. 36:10 Aw, nangmah hretute chungah chuan i ngilneihna chu lantîr zêl la; Thinlung dik tak pute chungah pawh i felna chu lantîr zêl ang che. 36:11 Chapo ke chu mi bei tûrin ka lamah pên suh sela, Mi suaksual kut pawhin mi hnawt bo suh se. 36:12 Sawtah sâwn thil tisualtute chu an tlu reng a; Nam thlûk an ni a, an tho thei tawh lo vang.