Song of Songs 2
2:1 Ka lo ni e, Saron rose pâr leh phaizâwla lili.
2:2 Hling zînga lili ang hi ka hmangaih chu a ni, Lanute zîngah.
2:3 Ngaw hnuai thing zînga apple thing ang Ka duh tak chu a ni, tlangvâlte zîngah. A hlimah chuan ka ṭhu, nuam takin, A rah chu ka tân a thlum ngei e.
2:4 Ruai ṭheh inah chuan kei mi hruai a, Ka chunga a puan zâr chu hmangaihna.
2:5 Grêp thei chhanga mi tungnungin Mi tiharh teh u, apple theiin, Hmangaihnaah ka uai zo ta e.
2:6 A kut vei lam chu lukhamin, A kut ding lamin mi pawm teh se!
2:7 Ka ngên tlat che u aw Jerusalem fanute, Saza leh ramzukpui chhâlin, Hmangaihna chu chawk thova tiharh lo tûrin; Amahin a duh hma chuan.
2:8 Ka duh tak aw chu, ngai rawh, a lo kal e, Tlângah zuang ṭumin mualah a tualchai e.
2:9 Ka duh tak chuan a ang, saza emaw zuktuai emaw. Ngai rawh, a ding reng kan bang phênah, A rawn bih kha tukverhahte chuan, Zâwngdaikalh âwngah a inlan e.
2:10 Ka duh tak chuan heti hian mi ti a: “Tho la, ka hmangaih, ka enchim loh, lo kal ta che,
2:11 En teh, thlasik a ral a, Ruahtui a kangin a kiang ta si;
2:12 Leian pangpârte an lo lang a, Sîrva zai vâwr hun a lo thleng a, ṭhuva awrâwl hriat a ni ta, kan ramah hian;
2:13 Theipui kûngin rah a chhuah a. Grêp hruite an lo pâr vul, An rimtuinate lêng chhuakin. Tho la, ka hmangaih, ka enchim loh, lo kal ta che.
2:14 Aw ka ṭhuva, lungpui keh kâra mi, Khâm chhawrdawha awm, I hmêl min hmuhtîr la, i aw min hriattîr ta che; I aw a mawi a, i hmêl lah a duhawm si.
2:15 Min mansak ula, sihalte, sihalnotête, Grêp huan tichhetute chu, Kan grêp huante a pâr vul mêk si,” tiin.
2:16 Ka duh tak chu ka ta a ni, kei pawh a ta ka ni e. A ran rual tlattîr ṭhîn kha, lili pâr zîngah.
2:17 Nî a nêma hlim a her bo hma loh chuan, Ka duh tak, Bether tlâng saza, zuktuai ang chang rawh.