Isaiah 37
37:1 Tin, heti hi a ni a, Lal Hezekia chuan chu chu a hriat veleh a silhfênte chu a pawt thlêr a, saiip puan a inbel a, Lalpa inah chuan a lût ta a.
37:2 Tin, a chhûngte chunga hotua awm Eliakima leh, lehkhaziaktu Sebna leh, puithiamho upate chu saiip puan inbelin Amoza fapa zâwlnei Isaia hnênah a tîr a.
37:3 Tin, anni chuan a hnênah, “Hezekian heti hian a ti, ‘Vawiin ni hi manganna leh hmuhsitna ni a ni; nautê chu an pian a hun tawh si a, anmahni hring tûrin chakna a awm tawh si lo.
37:4 Rabsakea, a pu Assuria lalin Pathian nung sawi chhe tûra a tirha thusawite chu, Lalpa i Pathian chuan a bengin a la hria a ni thei e; tichuan, a thusawi, Lalpa i Pathianin a benga a hriatahte chuan a la zilhhau vang. Chumi avâng chuan a la awm chhunte tân chuan i ṭawngṭaina chu hlân chho rawh,’ a ti e,” an ti a.
37:5 Chutichuan, Lal Hezekia chhiahhlawhte chu Isaia hnênah an lo kal a.
37:6 Tin, Isaian an hnênah, “In pu hnênah heti hian in sawi tûr a ni, ‘ Lalpa chuan heti hian a ti, “I thu hriat, Assuria lal chhiahhlawhten min sawichhiatnate kha hlau suh.
37:7 Ngai teh, a kawchhûngah chuan thlarau eng emaw ka awmtîr ang a; tichuan, thuthang a hria ang a, ama ramah a haw leh ang; tichuan, ama ram ngeiah chuan khandaiha tihtlûkin ka awmtîr ang,” a ti e,’ tiin,” a ti a.
37:8 Chutichuan, Rabsakea chu a kîr leh a, Assuria lal chuan Libna khua a lo bei lai a va hmu a; Lakis khua ata chu a kal chhuak tih a hre tawh reng si a.
37:9 Tin, Assuria lal Senakeriba chuan Tirhaka, Ethiopia ram lal chungchâng thu, “Nangmah bei tûrin a chhuak ta,” tiin mi sawi a hria a. Tichuan, chu chu a hriat veleh Hezekia hnênah palaite a tîr a:
37:10 “Heti hian Juda-ho lal Hezekia hnênah in sawi tûr a ni: ‘I rin Pathian chuan, Jerusalem khua Assuria lal kutah pêk a ni lo vang, tiin bum che suh se.
37:11 Ngai teh, Assuria lalten ram zawng zawng tichhe vekin an chunga an thiltihte kha i bengin i hria e; tichuan, nang tehlul hi chhanhimin i awm dâwn bîk em ni?
37:12 Hnam tin pathiante chuan Gozan-ho te, Haran-ho te, Rezeph-ho te, Eden fa Tel-asar khuaa awm te, min thlahtuten an tihboralte kha an chhan him em ni?
37:13 Hamath lal te, Arpad lal te, Sepharvaim khawpui lal te, Hena lal te, Iva lal te kha khawiah nge an awm tâk?’ tiin,” a ti a.
37:14 Tin, Hezekia chuan palaite kut ata lehkha chu a hmu a, a han chhiar a; tichuan, Hezekia chu Lalpa inah chuan a han lût a, Lalpa hmaah chuan a phah ta a.
37:15 Tin, Hezekia chu Lalpa hnênah a ṭawngṭai a,
37:16 “Aw Sipaihote Lalpa, Israel-ho Pathian, cherub chunga ṭhua, nang hi, nang chauh hi, leilung luah ram zawng zawng Pathian chu i ni; nang chuan lei leh vân hi i siam a ni.
37:17 Aw Lalpa, i beng rawn dawh la, ngaithla teh; aw Lalpa, i mit meng la, en teh; Pathian nung sawi chhe tûra mite tîrtu Senakeriba thu zawng zawng hi ngaithla teh.
37:18 Lalpa, Assuria lalten ram zawng zawng leh an lei chu an tichhe ngei tak a,
37:19 an pathiante chu meiah an paih bawk a; chûngte chu pathian an ni lo rêng a ni, mihring kuta siam, thing leh lung an ni zâwk. Chuvângin, an tiboral a ni.
37:20 Chuvângin, aw Lalpa kan Pathian, nang hi, nang chauh hi, Lalpa i ni tih leilung luah ram zawng zawng hian an hriat theih nân a lakah min chhandam ang che,” tiin.
37:21 Chumi lai chuan Amoza fapa Isaia chuan Hezekia hnênah mi a tîr a, heti hian a ti a, “ Lalpa, Israel-ho Pathian chuan heti hian a ti a ni: ‘Assuria lal Senakeriba chhiatna tûr lama ka hnêna i ṭawngṭai avângin,
37:22 hei hi a chungchâng thu Lalpan a sawi chu a ni: Zion fanu nula chuan a hmusit chia, a nuihsan che; Jerusalem fanu chuan a lû a thin khum che.
37:23 Tu nge i tihhmingchhiata i sawi chhiat ni? Tu chungah nge i aw i tihpâwra i mit i tihsân? Israel-ho Mi Thianghlima chung ngeiah.
37:24 I chhiahhlawhte hmangin Lalpa chu i tihmingchhia a, “Ka tawlailîr tam tak nên tlâng hmun zo, Lebanon ram rilahte hian ka lo thleng chho ta a; a sidar thing sâng takte leh a fâr thing ṭha mite hi ka kit ang a; a hmun zo hla ber, a lei ṭha hmun ram ngawah chuan ka lût ang.
37:25 Tuichhunchhuah ka lai a, tui ka in ṭhîn a, ka kephah hnuai hian Aigupta lui zawng zawng chu ka tikang vek ang,” i ti a.
37:26 Keiman hmânlai ata chûng chu ka tih a ni a, hmasâng ata chûng chu ka siam a ni tih i hre lo vem ni? Kulhpui nei khuate tichim tûrin ka ti che a ni.
37:27 Chuvângin, a chhûnga awmte chu an chak mang lo va, an hlau va, an lo mualpho tâk kha; phûl hlobet ang leh, hnim hring ang leh, in chunga hlobet ang leh, lo buh ṭhat hma ang lek an nih kha.
37:28 Kei erawh chuan i ṭhut te, i chhuah te, i luh te, ka chunga i thinurziate hi ka hria asin.
37:29 Ka chunga i thinur avâng leh, i ṭawng chaltlaizia chu ka bengah a lo luh chhoh tâk avâng hian, ka hnârvuah chu i hnârah ka vuah ang a, ka thîrbarh chu i hmuiah ka vuah bawk ang a, i lo kalna kawng ngeiah khân ka kîrtîr leh ang che, tih hi,’ tiin.
37:30 Tin, hei hi i tân chhinchhiahna tûr chu a ni ang: kuminah hian buhhli in ring ang a; nakkumah pawh chumi hli bawk chu in ring ang; tin, a kum thumnaah chuan buh tuh ula, ât ula, grêp huante siam ula, a rah ei rawh u.
37:31 Tin, Juda chhûngte zînga la dam chhunte chu a chhuk zâwnga zung kaia, a chho zâwnga rahin a awm leh ang.
37:32 Jerusalem aṭangin a la awm chhunte chu an chhuak ang a, Zion tlâng aṭangin a la dam tûrte chu an chhuak bawk ang. Sipaihote Lalpa ṭhahnemngaihna chuan chûng chu a ti ang.
37:33 Chuvângin, Lalpa chuan Assuria lal chungchâng thûah heti hian a ti, ‘Ani chuan he khawpui hi a lo thleng lo vang a, hetah hian thal a kâp hek lo vang, phaw nên a kiangah a lo kal hek lo vang a, a beihna tûrin lei kulh a siam hek lo vang.
37:34 A lo kalna kawngah, chumiah ngei chuan a kîr leh ang a, he khawpui hi a lo thleng lo vang, Lalpan a ti.
37:35 Keimah avâng leh ka chhiahhlawh Davida avângin he khawpui hi chhan him tûrin ka hum dâwn a ni,’ tiin,” a ti a.
37:36 Tichuan, Lalpa vântirhkoh chu a va chhuak a, Assuria-ho riahhmunah chuan mi nuai khat leh sîngriat leh sângnga a tihlum a; tin, zîng taka mi an han thawh chuan, ngai teh, mitthi ruang hlîr a lo ni a.
37:37 Chutichuan, Assuria lal Senakeriba chu a chhuak a, a kal bo va, a inah a haw a, Ninevi khuaah chuan a awm ta reng a.
37:38 Tin, heti hi a ni a, a pathian Nisroka inah chuan pathian a biak laiin a fapa Adrammeleka leh Sarezera-te chuan khandaihin an sât hlum a; tichuan, an tlân bo va, Ararat ramah an lût a. Tichuan, a fapa Esar-haddona chuan a aiawhin ro a rêl ta a.