Library · lus

Isaiah 7

7:1 Tin, Uzia fa Jothama fapa Ahaza lal lai chuan heti hi a ni a, Suria lal Rezina leh Israel lal Remalia fapa Peka chu Jerusalem rûn tûrin an chho va; nimahsela, an hneh thei lo. 7:2 Tin, Davida chhûngte chu, “Suria chu Ephraim nên an ṭang dûn ta,” tiin an hrilh a. Tichuan, a thinlung leh a khua leh tuite thinlung chu, ramhnuai thingte thliin a tinghîng suau suau ang hian tihnghînin a lo awm ta a. 7:3 Chutichuan, Lalpa chuan Isaia hnênah, “Nang leh i fapa Sear-jasuba chu, dîl chhakta zâwk tuilâkna tâwpah, Puansutu Phûl lamlianah chuan, Ahaza hmuak tûrin kal chhuak tawh ula; 7:4 a hnênah, ‘Fîmkhur la, awm hle hle rawh; meichher bung khu mai mai pahnih, Suria lal Rezina leh Remalia fapaa thinurna nasa tak chu hlau suh la, i thinlung chu zâm suh se. 7:5 “Juda chu han beiin han tibuai ila, chutah chuan kan tân luhna tûr siamin, a lai takah Tabeela fapa chu lalah i ṭhuttîr ang u,” tiin, Suria leh Ephraim leh Remalia fapa chuan an phiar che avângin, 7:7 Lalpa Pathian chuan heti hian a ti a: “An thu phiar chu a puitling lo vang a, a hlawhtling hek lo vang. 7:8 Suria lû chu Damaska a ni a, Damaska lû chu Rezina lek a ni si a. Kum sawmruk leh kum nga ral hmain Ephraim chu chi tih tlâk loh va awm tûrin tihchhiat vekin a awm ang. 7:9 Ephraim lû chu Samari a ni a, Samari lû chu Remalia fapa lek a ni si a. In rin duh loh chuan tihnghehin in awm ṭhuai lo vang,” tiin,’ ti rawh,” a ti a. 7:10 Tin, Lalpa chuan Ahaza a be leh a, 7:11 “ Lalpa i Pathian hnênah chhinchhiahna dîl rawh; Seol thûk tak ata emaw, vân sâng tak ata emaw,” a ti a. 7:12 Ahaza erawh chuan, “Ka dîl lo vang, Lalpa pawh ka fiah hek lo vang!” a ti a. 7:13 Tin, ani chuan, “Aw Davida chhûngte u, tûnah ngaithla teh u; mihring tihhah hi thil tê tak têah in ruat a ni maw, ka Pathian lam pawh tihhah in duh zêl ni? 7:14 Chuvângin, Lalpa ngei chuan chhinchhiahna a pe ang che u: ngai teh u, nula thianghlim pakhat a rai ang a, fapa a hring ang a, a hmingah Immanuela a sa ang. 7:15 Ani chuan thil ṭha lo lam duh loh nachâng a hriat hunah leh, thil ṭha lam duh nachâng a hriat hunah chuan bâwnghnute khal leh khawizu a ei ṭhîn ang. 7:16 Naupang chu thil ṭha lo lam duh loh nachâng leh, thil ṭha lam duh nachâng a hriat hma pawhin lal pahnih i huatate ram chu a ṭiau dâwn a ni,” a ti a. 7:17 Ephraim chuan, “Juda a ṭhen ni ata la thleng ngai lo nite chu Lalpa chuan i chungah leh, i khua leh tuite chungah leh, i pa chhûngte chungah chuan a thlentîr ang, Assuria lal ngei chu. 7:18 Chumi nîah chuan heti hi a ni ang a, Lalpa chu Aigupta lui tâwp rêttea tho awm leh, Assuria rama khuai awm chu, ko tûrin a faifûk ang. 7:19 Tichuan, an lo kal ang a, an zain kawr chhe rek rukah te, lungpui pûkah te, hnim hlîng nei zawng zawngah te, ran tlatna hmun zawng zawngah te an fu ang. 7:20 Chumi nîah chuan Lalpan bakmehchem hawh, Luipui piah rama Assuria lal awm chu hmangin, lû leh ke hmul chu a ziat fai ang a; khabe hmul pawh a ziat bo vek ang. 7:21 Tichuan, chumi nîah chuan heti hi a ni ang a, mi pakhatin bâwngla pakhat leh berâm pahnih chauh a vulh ang; 7:22 nimahsela, heti hi a ni ang a, hnute tui tam tak an la pêk dâwn avângin hnute tui khal a ei ṭhîn ang; ram chhûnga la awm apiangin hnute tui khal leh khawizu an ei ṭheuh dâwn si a. 7:23 Tin, chumi nîah chuan heti hi a ni ang a, hmun tin, grêp hrui sâng, tangkaraw sâng man awmna apiangte chu buar leh hnimhlîngnei hmun mai a ni tawh ang. 7:24 Ram zawng zawng chu buar leh hnimhlîngnei hlîr a lo nih tâk avângin, chutah chuan thal leh thal ngul kengin an kal ang. 7:25 Tin, tlâng, bâwngtuthlawha laih tawh zawng zawngah chuan, buar leh hnimhlîngnei hlauh avângin i kal lo vang a; bâwngchalte tlattîrna leh berâm chîl mai mai atân a ni tawh zâwk ang,” a ti a.