Library · lus

Hosea 14

14:1 Aw Israel, Lalpa i Pathian lamah chuan kîr leh rawh, I khawlohna avâng ngeiin i tlûk tâk hi. 14:2 Thu keng chungin Lalpa lamah kîr leh la, A hnênah chuan heti hian sawi rawh: “Khawlohna zawng zawng chu la bo la, A ṭha apiang chu pawm ang che; Tichuan, kan hmui rahte chu Bâwngpa aiah kan rawn hlân ang e. 14:3 Assuria chuan min chhandam lo vang a, Sakawr chungahte kan chuang lo vang; Kan kutchhuakte hnênah chuan, ‘Kan pathiante in ni e,’ kan ti tawh hek lo vang, Fahrahte chuan nangmahah Khawngaihna an hmu ṭhîn si a.” 14:4 “An hnungtawlhna hi ka tidam ang a, An lak aṭanga ka thinrimna chu a kian tâk avângin, Anni chu ka hmangaih hrim hrim dâwn a ni. 14:5 Israel lakah chuan daifîm ang ka ni ang a; Ani chu lili angin a lo vul ang a, Lebanon tlâng thing zung angin a zung a thlâk darh ang. 14:6 A zârte chu a ṭawi luih ang a; A mawizia chu olive thing ang mai a ni ang a, Lebanon sidar angin a rimtui ang. 14:7 A hlima chêngte chu an lo kîr ang a; Buh angin an nung thar ang a, Grêp hrui angin an lo duah ang. Lebanon uain angin an hming a thang ang. 14:8 Ephraima chuan milemte nên inzâwlna eng nge a neih tawh ang? Kei hi a ṭawngṭaina chhângtu ka ni a, A tung dingtu pawh ka ni; Kei chu fâr thing hring dup ang ka ni a, I rah ṭhate chu keima laka mi a ni e.” 14:9 Tu nge finga hêng hi hre thiam thei ang? Tu nge fingvâra hre thei ang? Lalpa kawngte chu a dik a, Mi dikte chuan an zawh dâwn si a; Bawhchhetute erawh chu chutah chuan An inchhuih thlu dâwn a ni.