Mark 7
7:1 Tin, Pharisaite leh lehkhaziaktute zînga mi tute emaw, Jerusalem khua aṭanga lo kalte chu a hnênah an rawn inkhâwm a.
7:2 Chûnghote chuan a zirtîr ṭhenkhatin kut bawlhhlawha chhang an ei an lo hmu tawh a (“Bawlhhlawh” tih hi “sil loh” tihna a ni.)
7:3 (Pharisaite leh Juda-ho zawng zawng chuan upate thurochhiah chu an pawm tlat avângin, an kut ngun taka an sil loh chuan an ei ngai si lo va.
7:4 Tin, dâwr hmun aṭanga an hâwn pawhin an inbual loh chuan an ei ngai lo. Tin, thu dang tam tak pawm tlat tûra an dawn chhâwnte chu a awm, no te, bêl te, dâr bêl te sil angte hi.)
7:5 Chutichuan, Pharisaite leh lehkhaziaktute chuan, “Engati nge i zirtîrten, upa thurochhiah ang zêla awm lova, kut bawlhhlawhin chhang an ei ṭhin ni?” tiin an zâwt a.
7:6 Tin, ani chuan an hnênah, “Isaia hian nangni mi vervêkte thu hi a lo hril lâwk dik zet mai, ‘He miteho hian an kâin mi chawimawi a, An thinlung erawh chuan mi hlat si a.
7:7 Eng pawh ni sela, an zirtîrnaa mihring thupêkte an zirtîr avângin, an mi biak ṭhin hi a thlâwn mai a ni,’ tih ziak ang hian.
7:8 Pathian thupêkte chu thlahthlamin mihring thurochhiah chu in vuan tlat a nih hi,” a ti a.
7:9 Tin, amah vêkin an hnênah, “Nangmahni thurochhiahte chu in pawm theihna tûrin Pathian thupêkte in duh lo hi rem in hre zet mai e!
7:10 Mosian, ‘I nu leh i pa chawimawi rawh,’ ‘Tu pawh a nu emaw, a pa emaw sawi chhia apiang chu thi mawlh rawh se,’ a ti si a.
7:11 Nangni erawh chuan heti hian in ti ṭhîn, ‘Miin a nu emaw, a pa emaw hnênah, “I mi chhawrna tûr hi Korban a ni tawh,” a tih chuan (chu chu “Pathian hnêna pêk” tihna a ni a),
7:12 a nu tân emaw, a pa tân emaw eng mah tihsak in phal tawh ṭhîn lo;
7:13 mi hnêna in thurochhiah pêk chhâwn hian Pathian thu hi in bawh bo ṭhîn a ni; chutiang thil chu tam tak in ti ṭhîn,’ ” a ti a.
7:14 Tin, mipuite chu a ko leh a, an hnênah, “In zain ka thu hi ngaithla ṭheuh ula, lo ngai thiam rawh u;
7:15 mihring pâwn lam ata a kawchhûnga lûta amah tibawlhhlawh thei eng mah a awm lo; mihring kawchhûng ata lo chhuakte chu mihring tibawlhhlawhtu a ni zâwk e,” a ti a.
7:17 Tin, mipuihote chu ina a luhsan hnuin, a zirtîrte chuan tehkhin thu chu amah an zâwt fiah ta a.
7:18 Tin, ani chuan an hnênah, “Nangni pawh chuti êma hriatna nei lo in ni maw? Eng pawh pâwn lam ata mihring kawchhûnga lût apiang, a thinlung chhûnga lût lovin, a pum chhûnga lûta dailênnaa a chhuah zâwk avângin, amah chu a tibawlhhlawh thei lo tih in hre lâwm ni?” a ti a. (Chu chu ei tûr tinrêng ei a thiang a tihna a ni.)
7:20 Tin, amah vêkin, “Mihring kawchhûng ata lo chhuak chuan, chu ngei chuan mihring a tibawlhhlawh ṭhîn a ni.
7:21 Kawchhûnga mi, mihring thinlung aṭangte chuan ngaihtuahna sualte a lo chhuak si ṭhîn: inngaihna te, rûkrûkna te, tualthahna te,
7:22 uirêna te, awhna te, sualna te, bumna te, hurna te, îtsîkna te, sawichhiatna te, chapona te, âtna te hi;
7:23 chûng thil sual zawng zawng chu kawchhûng aṭangin a lo chhuak a, mihring chu a tibawlhhlawh ṭhîn,” a ti a.
7:24 Tin, a tho va, chuta ṭang chuan Tura leh Sidon bialah a kal ta a; tin, inah a lût a, tu ma hriat a duh lo va; nimahsela, a inthup thei si lo.
7:25 Chutichuan, hmeichhe pakhat, fanu naupang tê, ramhuai bawlhhlawh pai nei chuan a chanchin a lo hria a, a ke bulah a va bawkkhup ta nghâl a.
7:26 Hmeichhia chu Grik mi a ni a, pianna lamah chuan Suro-Phoiniki mi a ni a. Ani chuan a fanu kawchhûng ata ramhuai hnawt chhuak tûrin a ngên a.
7:27 Tin, ani chuan a hnênah, “Fate chu lo puar hmasa rawh se; fate chhang lâksaka uite hnêna paih chu a mawi lo ve,” a ti a.
7:28 Ani chuan a hnênah, “Lalpa, nih zawng a ni a; nimahsela, dawhkân hnuaia uite pawhin fate chhang nawite chu an ei ṭhîn alâwm,” tiin a chhâng a.
7:29 Tin, ani chuan a hnênah, “I thusawi avâng chuan kal tawh le; ramhuai chu i fanu kawchhûng ata a chhuak tawh e,” a ti a.
7:30 Tin, a inah chuan a va hâwng a, a fa chu ramhuaiin lo chhuahsan tawh a, khuma mu a va hmu ta a.
7:31 Tin, Tura ram aṭangin a chhuak leh a, Sidon khua tlawhin Dekapoli ram kal tlang zêlin Galili dîl chu a thleng ta a.
7:32 Tin, mi pakhat, bengngawng, ṭawng pawh ṭawng fiah thei lo hi a hnênah an rawn hruai a, a chunga a kut nghat tûrin an ngên a.
7:33 Tin, ani chuan mipui zîng ata amah chauh chu a hruai hrang a, a kut zungṭangte chuan a beng kuate a khawih a; tin, chil a chhâk a, a lei a dehsak a;
7:34 tin, vân lam enin a thaw huai a, a hnênah, “Ephatha,” a ti a. (Chu chu “Lo inhawng rawh” tihna a ni.)
7:35 Tichuan, a bengte chu a lo inhawng a, a lei phuarna pawh chu a lo inphelh a, fiah takin a ṭawng thei ta a.
7:36 Tin, ani chuan an hnênah tu mah hrilh loh tûr a ti tlat a; nimahsela, a khap nasat poh leh an tlângaupui zual zâwk mah ṭhîn a.
7:37 “Ani chuan engkim ṭha takin a ti a; bengngawngte a tihvârsak a, ṭawngtheilote pawh a tiṭawng ṭhîn,” an ti a, mak an ti nasa êm êm a.