Library · lus

Luke 22

22:1 Tin, chhang dawidim telh loh kût, Kalhlên Kût an tih chu, a hnai ta a. 22:2 Tin, puithiam lal leh lehkhaziaktute chuan a tihhlumna zia an zawng a, vântlâng an hlau si a. 22:3 Tin, sâwm leh pahnihte zînga tel, Juda Iskariota an tiha chhûngah chuan Setana a lût a. 22:4 Tichuan, ani chu a va kal a, an hnêna a mantîr theihna tûrzia puithiam lalte leh hotute chu a va râwn a. 22:5 Tin, anni chu an lâwm hle a, a hnênah tangka pêk an tiam ta a. 22:6 Tin, ani chuan a remti a, mipui awm loh hlâna mantîrna remchâng a zawng ta a. 22:7 Tin, chhang dawidim telh loh ni, Kalhlên Kût, berâmno talhna tûr ni chu a lo thleng ta a. 22:8 Tichuan, Isuan Petera leh Johana chu, “Kalhlên kût chaw kan ei tûrin min va buatsaihsak rawh u,” tiin a tîr a. 22:9 Tin, anni chuan a hnênah, “Khawiah nge va buatsaih ila i duh?” an ti a. 22:10 Tin, ani chuan an hnênah, “Ngai teh u, khawpuia in luhin, mipa, bêla tui puin a tâwk ang che u a; a luhna inah zui lût ang che u. 22:11 Tin, in neitupa hnênah chuan, ‘Zirtîrtuin, ka zirtîrteho nên Kalhlên Kût chaw kan eina tûr, mikhual pindan chu khawiah nge? a ti a che,’ ti ang che u. 22:12 Tichuan, ani chuan pindan chungnung zau tak, bungraw awm sa, a entîr ang che u; chutah chuan buatsaih ang che u,” a ti a. 22:13 Tin, an kal ta a, an hnêna a sawi ang takin an hmu a; tin, Kalhlên Kût chaw chu an buatsaih ta a. 22:14 Tin, a ei a lo hun chuan ani chuan chaw a kîl a, tirhkohte chuan an kîlpui ve a. 22:15 Tin, an hnênah, “Ka thil tuar hmain he Kalhlên Kût chaw hi eipui che u ka duh êm êm a ni. 22:16 Ka hrilh a che u, hei hi Pathian rama a tak tak a nih hma loh zawng, ka ei leh tawh dâwn lo a ni,” a ti a. 22:17 Tin, no a la a, lâwmthu a sawi zawhin, “Hei hi la ula, insem rawh u; 22:18 ka hrilh a che u, tûn achinah Pathian ram a lo thlen hma loh zawng, grêp hrui rah tui hi ka in leh tawh dâwn lo a ni,” a ti a. 22:19 Tin, chhang a la a, lâwmthu a sawi zawhin a phel a, an hnênah a pe a, “Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,” a ti a. 22:20 Tin, zanriah ei zawhin chutiang bawkin no chu a la a, “He no hi ka thisena thuthlung thar chu a ni, in aia chhuak tûra chu. 22:21 Nimahsela, ngai teh u, mi mantîrtu tûra kut chu ka hnênah dawhkân chungah a awm si a. 22:22 Mihring Fapa hi an ruat angin a kal dâwn a ni; nimahsela, a mantîrtu tûr mihring chung chu a pik e!” a ti a. 22:23 Tin, annin, “Kan zîngah chutiang thil ti tûr chu tu nge ni ang le?” tiin an inzâwt ta a. 22:24 Tin, an zîngah tu ber nge ropui bera a ruat tih thûah inhnialna a lo chhuak a. 22:25 Tin, ani chuan an hnênah, “Jentailho lalte chu an chungah an lal ṭhîn a; an chunga thuneitute chu, ‘Nu leh pa,’ an ti ṭhîn. 22:26 Nimahsela, nangni zawng chutiang in ni lo vang; in zînga ropui ber chu nau zâwk angin awm sela, lal ber chu rawngbâwltu angin awm zâwk rawh se. 22:27 Tu nge ropui zâwk, chaw kîltu nge rawngbâwltu? Chaw kîltu a ni lo vem ni? Nimahsela, kei zawng in zîngah rawngbâwltu angin ka awm hi. 22:28 Thlêmna ka tawh chhûng zawng nangni mi awmpuitu in ni a; 22:29 tichuan, ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan, Israel hnam sâwm leh hnam hnih rorêlsakin lalṭhutphahah in la ṭhu ang. 22:31 Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin; 22:32 nimahsela, i rin a bo loh nân ka ṭawngṭaisak che a ni; i hawi kîr leh hunah nangin i unaute tinghet ang che,” a ti a. 22:33 Tin, ani chuan a hnênah, “Lalpa, i hnênah chuan tân inah leh thihnaah pawh kal ve ka huam asin,” a ti a. 22:34 Tin, ani chuan, “Peter, ka hrilh a che, vawi thum mi phat hma loh zawng vawiinah hian âr a khuang lo vang,” a ti a. 22:35 Tin, an hnênah, “Tangka ip lova, iptê lova, pheikhawk lova ka tirh chhuah che u khân thil rêng rêng in tlachham em?” a ti a. Tin, anni chuan, “Chham lo,” an ti a. 22:36 Tin, ani chuan an hnênah, “Tûnah erawh chuan tu pawh tangka ip nei chuan keng rawh se, iptê nên; tu pawh khandaih nei lo chuan a puan hralh sela, lei rawh se. 22:37 Ka hrilh a che u, ‘Ani chu mi sual zîngah an chhiar tel ta,’ tih ziak kha ka chungah a lo thleng tûr a ni; ka chungchâng thûte kha a thleng zo dâwn ta e,” a ti a. 22:38 Tin, anni chuan, “Lalpa, en teh, hei khandaih pahnih a awm,” an ti a. Ani chuan an hnênah, “A tâwk e,” a ti a. 22:39 Tin, ani chu a chhuak a, a dân pângngaiin Olive tlângah chuan a kal ta a; zirtîrte pawhin an zui a. 22:40 Tin, a hmun chu a va thlen chuan an hnênah, “Thlêmnaa in luh loh nân ṭawngṭai rawh u,” a ti a. 22:41 Tin, lung den phâk chinah emaw a va kal hrang ta a; tin, a ṭhingṭhi a, a ṭawngṭai a, 22:42 “Ka Pa, rem i tih chuan he no hi ka hnên ata la sawn rawh; nimahsela, keia thu ni lovin, nangma thû thû ni zâwk rawh se,” a ti a. 22:43 Tin, vân aṭangin vântirhkoh pakhat, a tiharh tûrin a hnênah a rawn inlâr a. 22:44 Tin, a thlaphâng êm êm a, ṭhahnemngai lehzualin a ṭawngṭai a; a thlan chu thi far lian tak angin leiah a far a. 22:45 Tin, a ṭawngṭai zawha a thawhin zirtîrte hnênah chuan a lo kal a, an lungngaih avânga an lo muhîl a hmu a; 22:46 tin, an hnênah, “Engati nge in muthilh? Thlêmnaa in luh loh nân tho ula, ṭawngṭai rawh u,” a ti a. 22:47 Tin, a la sawi lai mêkin, ngai teh, mipui an lo kal a, sâwm leh pahnihte zînga tel Juda an tih chuan an hma a rawn hruai a; tin, fawh tumin Isua a rawn pan a. 22:48 Nimahsela, Isua chuan a hnênah, “Juda, Mihring Fapa hi fâwpin i mantîr dâwn em ni?” a ti a. 22:49 Tin, a vêla mite chuan thil lo thleng tûr chu an hriatin, “Lalpa, khandaihin kan sât ang em?” an ti a. 22:50 Tin, an zînga tuin emaw puithiam lalber bâwih chu a sât a, a beng ding lam a sah thlâksak a. 22:51 Isua erawh chuan, “A tâwk e,” a ti a. Tin, a beng chu a dek a, a tidam ta a. 22:52 Tin, Isuan a hnêna lo kal puithiam lalte, Pathian biak in hotute leh upate hnênah chuan, “Khandaihte, talhtumte kengin, suamhmang man tûr ang rengin in lo chhuak a ni maw? 22:53 Pathian biak ina in hnêna ni tin ka awm laite khân, mi man tumin mi ban si lo va; nimahsela, tûn hi in chêt hun a ni e, thim thuneihna nên,” a ti a. 22:54 Tin, an man a, an hruai a, puithiam lalber inah chuan an hruai lût ta a. Tin, Peteran hla tak aṭangin a zui a. 22:55 Tin, in hual chhûng kawtlaiah mei an chhêm a, an ṭhu khâwm a, Petera chu an zîngah a va ṭhu ve a. 22:56 Tin, mei ênga a ṭhut laiin nula tuin emaw a hmu a, a melh reng a, “He mi pawh hi a hnêna awm kha a nih hi,” a ti a. 22:57 Ani erawh chuan, “Hmeichhia, ani chu ka hre lo ve,” tiin a pha a. 22:58 Tin, nakin deuhvah mi dangin a rawn hmu leh a, “Nang pawh an zînga mi i nih hi,” a ti a. Petera erawh chuan, “Mihring, ka ni lo ve,” a ti a. 22:59 Tin, dârkâr khat lai chinah chuan mi dangin, “He mi pawh hi a hnêna awm kha a ni ngei mai; Galili rama mi a ni alâwm,” a ti tlat a. 22:60 Tin, Peteran, “Mihring, i thusawi chu ka hre lo ve,” a ti a. Tin, thâwklehkhatan, a ṭawng lai tak chuan âr a khuang ta nghâl a. 22:61 Tin, Lalpa chu a hawi a, Petera chu a en a. Tin, Petera chuan Lalpan, “Vawiinah hian âr a khuan hmain vawi thum mi phat ang,” a hnênah a tih thu kha a lo hre chhuak leh ta a. 22:62 Tin, a chhuak a, a ṭap ta zawih zawih a. 22:63 Tin, Isua chu a chelhtuten nuihza siam nân an hmang a, an vua a. 22:64 Tin, a mit an tuam a, “Sawi rawh, tu nge vua che?” tiin an zâwt ṭhîn a. 22:65 Tin, thu dang tam tak pawhin an sawichhiain an hau va. 22:66 Tin, khawvâr veleh vântlâng upaho, puithiam lalte leh lehkhaziaktute chu an rawn inkhâwm a, an rorêlnaah chuan an hruai a, 22:67 “Krista i nih zet chuan min hrilh rawh,” an ti a. Tin, ani chuan an hnênah, “Hrilh che u mah ila in âwih lo vang; 22:68 zâwt che u mah ila in chhâng lo vang. 22:69 Nimahsela, tûn achinah chuan Mihring Fapa hi Pathian thiltihtheihna ding lamah a ṭhu tawh ang,” a ti a. 22:70 Tin, an zain, “Nang hi Pathian Fapa chu i ni em ni le?” an ti a. Tin, ani chuan an hnênah, “Ni e,” a ti a. 22:71 Tin, anni chuan, “Eng hriatna dang nge kan ngaih tawh ang? Keimahni ngeiin ama ka chhuak kan hre tawh alâwm,” an ti a.