Library · lus

Acts 8

8:1 Tin, chumi ni aṭang chuan Jerusalem khuaa kohhran awmte chu nasa takin an tiduhdah ṭan ta a; tichuan, tirhkohte chauh lo chu Judai leh Samari ram khaw tinah an darh ta vek a. 8:2 Tin, Pathian ngaihsak tuten emaw Stephana chu an phûm a, nasa takin an ṭah a. 8:3 Saula erawh chuan kohhranhote a tiduhdah êm êm a, in tinah a lût a, a hmei a pain a hnûk chhuak a, tân inah a khung ṭhîn. 8:4 Tin, a darhte chu khaw tinah an kal a, thu chu an hril zêl a. 8:5 Tin, Philipa chu Samari khuaah a zuk kal a, an hnênah Krista thu a tlângaupui a. 8:6 Tin, ramhuai bawlhhlawhte chu, mi tam tak an manate kawchhûng ata aw ring taka auva an chhuah avâng leh, zeng leh kebai tam takte pawh an lo dam tâk avângin, mipuiten a thu an hriata a thilmak tihte an hmuhin, Philipa thusawi chu rilru hmun khatin an ngaihsak a. 8:8 Tin, chumi khuaah chuan nasa takin an lâwm ta a. 8:9 Tin, a hming Simona, mi pakhat a awm a; ani chuan, “Mi lian ka ni,” tiin, hmânah chumi khuaah chuan dawi hmangin, Samari khuaa mite mak ti takin a siam ṭhîn a; 8:10 mi zawng zawng chuan, mi chhe ber aṭangin lal ber thlengin, “He mi hi Pathian thiltihtheihna, ‘Ropui’ an tih kha a nih hi,” tiin, a thu an ngaihsak hlawm ṭhîn a. 8:11 A dawi hmangin rei tak mak ti taka a siam ṭhin avângin a thu an ngaihsak ṭhîn a ni. 8:12 Nimahsela, anni chuan Pathian ram Chanchin Ṭha leh Isua Krista hminga Chanchin Ṭha Philipa hril chu an âwih veleh a hmei a pain baptisma an chang ta a. 8:13 Tin, Simona meuh pawhin a âwih ve ta a; tin, baptisma a chan zawhin Philipa hnênah a awm reng a, chhinchhiahna leh thilmak nasa tak tihte a hmu a, mak a ti hle mai ṭhîn a. 8:14 Tin, Jerusalem khuaa tirhkoh awmte khân, Samari khuaa miten Pathian thu an âwih tih an hriatin, an hnênah Petera leh Johana chu an tîr a; 8:15 chu mite chu an zuk thlen chuan Thlarau Thianghlim an hmuh theih nân an ṭawngṭaisak a. 8:16 Chumi hma chuan an zîngah tu ma chungah a la thleng lo; Lal Isua hmingin baptisma an chang chauh a la ni. 8:17 Tin, tirhkohte chuan an chungah an kut an nghat a, Thlarau Thianghlim an chang ta a. 8:18 Tin, tirhkohte kut nghah avânga Thlarau Thianghlim pêk a ni tih Simonan a hmuhin, “Hetiang thuneihna hi mi pe ve rawh u, tu chungah pawh kut ka nghahna apiangin Thlarau Thianghlim an hmuh ve nân,” tiin an hnênah tangka pêk a tum ta a. 8:20 Nimahsela, Peteran a hnênah, “I tangka hi i boral rualin boral ve rawh se, Pathian thilpêk tangka suma lei i tum avângin. 8:21 Hêng thûah hian i tel ve lo ve, chan pawh i nei hek lo; i rilru Pathian ngaihin a fel lo ve. 8:22 Chuvângin, i sual hi sim la, Lalpa hnênah ṭawngṭai rawh; chutichuan, i rilrua i ngaihtuah hi a ngaidam mahna che. 8:23 Awhna sual nasa tak phuarin i awm tih ka hria e,” a ti a. 8:24 Tin, Simonan, “In thil sawi hi eng mah ka chunga a thlen loh nân, nangnin Lalpa hnênah mi ṭawngṭaisak rawh u,” a ti a, a chhâng a. 8:25 Chutichuan, anni chuan Lalpa thu chu an hriattîra an sawi zawhin, Jerusalem khuaah an haw leh a; Samari rama mite khaw tam tak hnênah Chanchin Ṭha chu an hril zêl a. 8:26 Tin, Lalpa vântirhkoh pakhatin Philipa chu a bia a, “Tho la, chhim lama Jerusalem khua aṭanga Gaza khaw zuk chhun kawngah khân kal rawh; chumi kawng chu thlalêrah a kal tlang a ni,” a ti a. 8:27 Tichuan, a tho va, a kal ta a. Tin, ngai teh, Ethiopia rama mi pakhat, Ethiopia lalnu Kandaki hnuaia mi tilreh, lal tak, a ro zawng zawng enkawltu, Jerusalem khuaah Pathian be tûrin a han kal a; 8:28 a haw lam chuan a tawlailîra ṭhu chungin zâwlnei Isaia lehkhabu a chhiar zêl a. 8:29 Tin, Thlarau chuan Philipa hnênah, “Saw tawlailîr saw va hnaih la, va pâwl rawh,” a ti a. 8:30 Tin, Philipa chu mi tilreh hnênah chuan a va tlân a, zâwlnei Isaia lehkhabu a chhiar tih a hria a, “I chhiar kha a awmzia i hria em?” a ti a. 8:31 Tin, ani chuan, “Tu ma mi hrilhfiah lohvin engtin nge ka hriat theih ang?” a ti a. Tin, a hnêna ṭhu chhuak tûrin Philipa chu a sâwm ta a. 8:32 Tin, Pathian Lehkha a chhiar lai chu hei hi a ni: “Talh tûrin berâm angin ani chu an hruai a; Berâmno a hmul mêttu hmaa a ngawi reng angin, Ani pawhin a kâ a âng lo; 8:33 A tlâwm laiin a chungah thu rêl an phal lo; A thlahte chanchin tuin nge la hril ang? Khawvêl aṭangin a nun an lâksak si a,” tih hi. 8:34 Tin, mi tilreh chuan Philipa chu a bia a, a hnênah, “Zâwlneiin hêng thu hi tu thu nge a sawi, ama thu nge mi dang thu? Ka zâwt a che,” a ti a. 8:35 Tin, Philipa chuan a sawi a, chu Pathian Lehkha thu chu a bulah a ṭan a, a hnênah Isua thu a hrilh a. 8:36 Tin, kalkawnga an kal laiin tui awmna an thleng a; tin, mi tilreh chuan, “En teh, heta hi tui a awm, baptisma channa tûr engin nge mi dâl kher?” a ti a. 8:38 Tin, tawlailîr chu a dintîr a, an pahnihin, Philipa leh mi tilreh chu tuiah chuan an zuk kal dûn a; tin, Philipa chuan ani chu a baptis ta a. 8:39 Tin, tui ata an chhuah chhoh veleh, Lalpa Thlarau chuan Philipa chu a la bo ta a; tin, mi tilreh chuan ani chu a hmu leh ta lo, hlim taka a kal tâk zêl avângin. 8:40 Nimahsela, Philipa chu miin Azota khuaah an hmu leh ta a; tin, a kal tlang a, Kaisari khaw thlengin khaw tinah Chanchin Ṭha chu a hril zêl a.