Library · my

Isaiah 57

57:1 ဖြောင့်မတ်​သော​သူ​ဆုံးပါး​သွား​သည်​ကို မည်သူ​မျှ​နှလုံး​မ​သွင်း​ကြ​။ ကျေးဇူးပြု​တတ်​သော​သူ​တို့ ရုပ်သိမ်း​ခြင်း​ခံရ​သည်​ကို မည်သူ​မျှ​နား​မ​လည်​ကြ​။ အကယ်စင်စစ် ဖြောင့်မတ်​သော​သူ​သည် မကောင်းမှု​ထဲမှ​ရုပ်သိမ်း​ခံရ​ခြင်း​ဖြစ်​၏​။ 57:2 ဖြောင့်မတ်​စွာ​လျှောက်လှမ်း​သော​သူ​တို့​သည် နားနေရာ​၌​လဲလျောင်းခွင့်​ရ​၏​။ ငြိမ်းချမ်း​ရာ​သို့ ဝင်စား​ခွင့်​ရ​၏​။ 57:3 စုန်းမ​သား​၊ အိမ်ထောင်ရေးဖောက်ပြန်​သူ​၊ ပြည့်တန်ဆာ​အမျိုးအနွယ်​တို့​၊ ချဉ်းကပ်​ကြ​လော့​။ 57:4 သင်​တို့​သည် မည်သူ့​ကို သရော်​ကြ​သနည်း​။ မည်သူ့​ကို​ပါးစပ်​ဟ​၍ လျှာ​ထုတ်​ပြ​ကြ​သနည်း​။ သင်​တို့​သည် အပြစ်​ကျူးလွန်​သော​သားသမီး​များ​၊ မုသား​ပြောဆို​သော​အမျိုးအနွယ်​များ ဖြစ်​ကြ​သည်​မ​ဟုတ်​လော​။ 57:5 ဝက်သစ်ချပင်​တို့​ကြား​၊ စိမ်းလန်း​သော​သစ်ပင်​ရှိသမျှ​တို့​အောက်​တွင် ရမ္မက်မီး​တောက်လောင်​သော​သူ​များ​၊ လျှိုမြောင်​ရှိ ကျောက်တောင်​အက်ကွဲကြောင်း​များ​တွင် သားသမီး​များ​ကို သတ်ဖြတ်​ပူဇော်​သော​သူ​များ ဖြစ်​ကြ​သည်​မ​ဟုတ်​လော​။ 57:6 လျှိုမြောင်​ထဲမှ​ချော​သော​ကျောက်​များ​ထဲတွင် သင်​၏​ဝေစု​ရှိ​၏​။ ထို​ကျောက်​တို့​သည် သင်​၏​ပေါက်မဲ​ဖြစ်​၏​။ အကယ်စင်စစ် သင်​သည် ထို​ကျောက်​တို့​အား သွန်းလောင်းရာပူဇော်သက္ကာ​ကို​သွန်းလောင်း​၏​။ ဘောဇဉ်ပူဇော်သက္ကာ​ကို​ပူဇော်​၏​။ ဤ​သည်​ကို ငါ​လိုက်လျော​ရ​မည်လော​။ 57:7 သင်​သည် မြင့်မား​သော​တောင်​ပေါ်တွင် သင်​၏​အိပ်ရာ​ကို​ခင်း​၏​။ ထို​တောင်​ပေါ်သို့​တက်​၍​လည်း ယဇ်​ပူဇော်​တတ်​၏​။ 57:8 သင်​၏​အမှတ်သင်္ကေတ​ကို တံခါး​၊ တံခါးတိုင်​နောက်၌ သင်​ထား​၏​။ အဝတ်အချည်းစည်း​ဖြင့် ငါ့​ထံ​မှ သင်​ထွက်သွား​၍ တောင်​ပေါ်သို့​တက်သွား​၏​။ သင့်​အိပ်ရာ​ကို​ကျယ်​စွာ​ဖြန့်​၍ အခြား​သူ​တို့​နှင့်​ပဋိညာဉ်ဖွဲ့​၏​။ သူ​တို့​၏​အိပ်ရာ​ကို သင်​နှစ်သက်​၍ သူ​တို့​အဝတ်မဝတ်​ဘဲ​နေ​သည်​ကို ငေးကြည့်​၏​။ 57:9 သင်​သည် ရှင်ဘုရင်​ထံသို့ နံ့သာဆီ​ဖြင့် သွား​၏​။ နံ့သာ​မျိုး​များစွာ​ဖြင့် ကိုယ့်ကိုယ်ကိုယ်​မွှေးကြိုင်​စေ​၏​။ သင်​၏​သံတမန်​တို့​ကို​လည်း အဝေး​သို့​စေလွှတ်​၏​။ သင်​သည် မရဏာနိုင်ငံ​တိုင်အောင် နိမ့်ကျ​၏​။ 57:10 သင်​သည် ဝေး​စွာ​ခရီး​သွား​၍ ပင်ပန်း​သော်လည်း “​မျှော်လင့်စရာ​မ​ရှိ​”​ဟု သင်​မ​ဆို​။ ခွန်အား​သစ်​ကို တွေ့​သောကြောင့် သင်​သည် အား​မ​လျော့ ​။ 57:11 မည်သူ့​ကို ထိတ်လန့်​ကြောက်ရွံ့​၍ သင်​လိမ်လည်​သနည်း​၊ ငါ့​ကို သင်​မ​အောက်မေ့​၊ ငါ့​ကို သင့်​စိတ်​ထဲ၌ မ​ထား​။ ငါ ကြာမြင့်​စွာ​တိတ်ဆိတ်​နေ​သောကြောင့် သင်​ငါ့​ကို​မ​ကြောက်​သည် မ​ဟုတ်​လော​။ 57:12 ဖြောင့်မတ်​သည်​ဟု​ဆို​သော သင်​၏​လုပ်ရပ်​တို့​ကို ငါ​ကိုယ်တော်တိုင် ဖော်ထုတ်​မည်​။ ထို​အရာ​တို့​သည် သင့်​ကို​အကျိုးပြု​လိမ့်မည်​မ​ဟုတ်​။ 57:13 သင်​အော်ဟစ်​သောအခါ ရုပ်တု​တို့​သည် သင့်​ကို​ကယ်နုတ်​ပါစေ​။ သို့သော် ထို​အရာ​အားလုံး​ကို လေ​တိုက်သွား​မည်​။ ထွက်သက်လေ​တစ်​ချက်​က လွင့်သွား​စေ​မည်​။ ငါ​၌​ခိုလှုံ​သော​သူ​မူကား ပြည်​တော်​ကို​အမွေဆက်ခံ​ရ​မည်​။ ငါ​၏​သန့်ရှင်း​သော​တောင်​ကို ပိုင်ဆိုင်​ရ​မည်​။ 57:14 တစ်စုံတစ်ယောက်​က “​မြေဖို့​ကြ​။ မြေဖို့​ကြ​။ လမ်း​ကို​ပြင်​ကြ​။ ငါ​၏​လူ​တို့​သွား​ရာ​လမ်း​မှ ခလုတ်တံသင်း​ကို​ဖယ်ရှား​ကြ​လော့​”​ဟု ဆို​လိမ့်မည်​။ 57:15 မြင့်မြတ်​၍​ချီးမြှောက်​ခြင်း​ခံ​တော်မူ​သော​၊ ထာဝရ​အသက်ရှင်​တော်မူ​သော​၊ သန့်ရှင်း​ခြင်း​ဟု နာမ​ရှိ​တော်မူ​သော​အရှင်​က “​ငါ​သည် စိတ်နှလုံး​ကျိုးပဲ့ကြေမွ​သော​သူ​၊ စိတ်နှိမ့်ချ​သော​သူ​တို့​နှင့်အတူ အထွတ်အမြတ်​ထား​ရာ​အရပ်​၊ သန့်ရှင်း​သော​အရပ်​၌ ကိန်းဝပ်​၏​။ စိတ်အားငယ်​သော​သူ​၊ စိတ်နှလုံး​ကျိုးပဲ့ကြေမွ​သော​သူ​တို့​ကို အားဖြည့်ပေး​ရန် သူ​တို့​တွင် ငါ​ကိန်းဝပ်​၏​။ 57:16 ငါ​ကိုယ်တော်တိုင်​ဖန်ဆင်း​သော​ဝိညာဉ်​၊ ငါ​ကိုယ်တော်တိုင်​ဖန်ဆင်း​သော​ဇီဝအသက်​တို့​သည် ငါ့​ရှေ့​မှာ မ​ညှိုးငယ်​စေရန် ငါ​သည် အစဉ်​အပြစ်တင်​မည်​မ​ဟုတ်​။ အစဉ်​အမျက်ထွက်​မည်​မ​ဟုတ်​။ 57:17 မတရား​အကျိုးစီးပွား​ရှာ​သော​အပြစ်​ကြောင့် ငါ​သည် အမျက်ထွက်​၍ သူ့​ကို​ရိုက်​၏​။ ငါ​သည် အမျက်ထွက်​၍ မျက်နှာ​လွှဲ​သော်လည်း သူ​သည် မိမိ​စိတ်​အလိုရှိ​ရာ​လမ်း​သို့ ဆက်သွား​၍ လမ်းလွဲ​လျက်​ရှိ​၏​။ 57:18 သူ​၏​လမ်း​တို့​ကို ငါ​မြင်​ပြီ​။ သို့သော် ငါ​သည် သူ့​ကို​ကုသ​၍ လမ်းပြ​ပေး​မည်​။ သူ့​ကို​လည်းကောင်း​၊ သူ​နှင့်အတူ​ငိုကြွေးမြည်တမ်း​သော​သူ​တို့​ကို​လည်းကောင်း ပြန်လည်​နှစ်သိမ့်​ပေး​မည်​။ 57:19 နှုတ်ခမ်း​အသီး​ကို ငါ​ဖန်ဆင်း​၏​။ ဝေး​သော​သူ​၊ နီး​သော​သူ​တို့​၌ ငြိမ်သက်​ခြင်း ရှိ​စေ​သော​။ ငါ​သည် သူ့​ကို ကုသ​ပေး​မည်​”​ဟု ထာဝရဘုရား​မိန့်​တော်မူ​၏​။ 57:20 ဆိုးယုတ်​သော​သူ​တို့​သည် မ​ငြိမ်​မ​သက်​လှိုင်းထ​နေ​သော​ပင်လယ်​နှင့်​တူ​၏​။ ပင်လယ်​ရေ​သည် ရွှံ့​နှင့်​အမှိုက်​တို့​ကို ထကြွလှုပ်ရှား​စေ​တတ်​၏​။ 57:21 “​ဆိုးယုတ်​သော​သူ​တို့​၌ ငြိမ်သက်​ခြင်း​မ​ရှိ​”​ဟု ငါ​၏​ဘုရားသခင်​မိန့်​တော်မူ​၏​။