Library · my

Jeremiah 28

28:1 ယုဒ​ဘုရင်​ဇေဒကိ​မင်းကြီး​နန်းစံ​ကာလ အစပိုင်း စတုတ္ထ​နှစ်​၊ ပဉ္စမ​လ​တွင်​ပင် ဂိဗောင်​မြို့​မှ အဇ္ဇုရ​၏​သား ပရောဖက်​ဟာနနိယ​က ထာဝရဘုရား​၏​အိမ်​တော်​၊ ယဇ်ပုရောဟိတ်​နှင့် လူ​အပေါင်း​တို့​ရှေ့​တွင် ငါ့​အား 28:2 “​အစ္စရေး​လူမျိုး​၏​ဘုရားသခင် ကောင်းကင်​ဗိုလ်ခြေ​အရှင်​ထာဝရဘုရား​က ‘​ဘေဘီလုံ​ဘုရင်​၏​ထမ်းပိုး​ကို ငါ​ချိုး​မည်​။ 28:3 ဤ​အရပ်​မှ ဘေဘီလုံ​မြို့​သို့ ဘေဘီလုံ​ဘုရင်​နေဗုခဒ်နေဇာ​မင်းကြီး​သိမ်းဆည်း​ယူဆောင်​သွား​သည့် ထာဝရဘုရား​၏​အိမ်​တော်​အသုံးအဆောင်​ရှိသမျှ​တို့​ကို နှစ်​နှစ်​အတွင်း ဤ​အရပ်​သို့ ငါ​ပြန်ယူဆောင်​လာ​မည်​။ 28:4 ဘေဘီလုံ​မြို့​သို့ ဖမ်းခေါ်​သွား​ခြင်း​ခံရ​သော ယောယကိမ်​၏​သား ယုဒ​ဘုရင်​ယေခေါနိ​မင်းကြီး​နှင့်တကွ ယုဒ​လူမျိုး​အပေါင်း​တို့​ကို​လည်း ဤ​မြို့​သို့ ပြန်ခေါ်ဆောင်​လာ​မည်​။ အကြောင်းမူကား ငါ​သည် ဘေဘီလုံ​ဘုရင်​၏​ထမ်းပိုး​ကို ချိုး​မည်​’​ဟူ၍ မိန့်​တော်မူ​သည်​”​ဟု ဆို​၏​။ 28:5 ထိုအခါ ပရောဖက်​ယေရမိ​က ထာဝရဘုရား​၏​အိမ်​တော်​၌ ရပ်​နေ​ကြ​သော ယဇ်ပုရောဟိတ်​နှင့် လူ​အပေါင်း​တို့​ရှေ့​၌ ပရောဖက်​ဟာနနိယ​အား 28:6 “​အာမင်​၊ ထိုသို့ ထာဝရဘုရား ပြု​တော်မူ​ပါစေသော​။ ထာဝရဘုရား​၏​အိမ်​တော်​အသုံးအဆောင်​ပစ္စည်း​များ​နှင့် သုံ့ပန်း​အားလုံး​ကို ဘေဘီလုံ​မြို့​မှ ဤ​အရပ်​သို့ ပြန်ခေါ်ဆောင်​လာ​မည်​ဟူ၍ သင်​ပရောဖက်ပြု​ဟောပြော​သည့်​အတိုင်း ထာဝရဘုရား ပြည့်စုံ​စေ​ပါစေ​။ 28:7 သို့ရာတွင် သင်​နှင့်တကွ လူ​အပေါင်း​တို့​အား ငါ​ပြော​သော​စကား​ကို နားထောင်​လော့​။ 28:8 သင်​နှင့်​ကျွန်ုပ်​မ​ရှိ​မီ ယခင်​က​ရှိ​နှင့်​သော ပရောဖက်​တို့​သည် တိုင်းနိုင်ငံ​ကြီး​များ​နှင့်တကွ အပြည်ပြည်​တို့​တွင် စစ်ဘေး​၊ ဆင်းရဲဒုက္ခဘေး​နှင့် ကပ်ရောဂါ​ဘေး​တို့​ဖြစ်​မည့်​အကြောင်း ပရောဖက်ပြု​ဟောပြော​ခဲ့​ကြ​၏​။ 28:9 ပရောဖက်​တစ်​ဦး​က ငြိမ်းချမ်း​ခြင်း​အကြောင်း​ကို ပရောဖက်ပြု​ဟောပြော​၍ သူ​ဟော​သည့်​အတိုင်း​ဖြစ်လာ​လျှင် သူ​သည် ထာဝရဘုရား​စေလွှတ်​တော်မူ​သော​ပရောဖက်​ဖြစ်ကြောင်း သိ​ရ​မည်​”​ဟု ဆို​၏​။ 28:10 ထိုအခါ ပရောဖက်​ဟာနနိယ​သည် ပရောဖက်​ယေရမိ​၏​ပခုံး ​မှ ထမ်းပိုး​ကို​ယူ​၍ ချိုး​ပစ်​ပြီးလျှင် 28:11 ဟာနနိယ​က လူ​အပေါင်း​တို့​ရှေ့​၌ “​ထာဝရဘုရား​က ‘​လူမျိုး​အပေါင်း​တို့​၏​ပခုံး ​ပေါ်​တင်​ထား​သော ဘေဘီလုံ​ဘုရင်​နေဗုခဒ်နေဇာ​မင်းကြီး​၏​ထမ်းပိုး​ကို နှစ်​နှစ်​အတွင်း ငါ​ချိုး​ပစ်​မည်​’​ဟူ၍ မိန့်​တော်မူ​သည်​”​ဟု ပြော​လေ​၏​။ ထိုအခါ ပရောဖက်​ယေရမိ​သည် ထို​နေရာ​မှ ထွက်သွား​လေ​၏​။ 28:12 ပရောဖက်​ယေရမိ​၏​ပခုံး ​မှ​ထမ်းပိုး​ကို ပရောဖက်​ဟာနနိယ​ချိုး​ပြီးနောက်​တွင် ထာဝရဘုရား​၏​နှုတ်ကပတ်တော်​သည် ယေရမိ​ထံ​ရောက်လာ​၍ 28:13 “ဟာနနိယ​ထံသို့​သွား​ပြီး ထာဝရဘုရား​က ‘သင်​ချိုး​လိုက်​သော​သစ်သား​ထမ်းပိုး​အစား သံ​ထမ်းပိုး​ကို သင်​ပြုလုပ်​လေ​ပြီ’​ဟု မိန့်​တော်မူ​၏​။ 28:14 အစ္စရေး​လူမျိုး​၏​ဘုရားသခင် ကောင်းကင်​ဗိုလ်ခြေ​အရှင်​ထာဝရဘုရား​က ‘ဤ​လူမျိုး​အပေါင်း​တို့​၏​ပခုံး ​ပေါ်၌ သံ​ထမ်းပိုး​ကို ငါ​တင်​ပြီ​။ သူ​တို့​သည် ဘေဘီလုံ​ဘုရင်​နေဗုခဒ်နေဇာ​မင်းကြီး​ကို စင်စစ်​အစေခံ​ရ​မည်​။ တောရိုင်းတိရစ္ဆာန်​များ​ကို​လည်း သူ့​အား ငါ​ပေးအပ်​လေ​ပြီ’​ဟူ၍ မိန့်​တော်မူ​ကြောင်း​ဆင့်ဆို​လော့”​ဟု မိန့်ဆို​၏​။ 28:15 ပရောဖက်​ယေရမိ​က ပရောဖက်​ဟာနနိယ​အား “​ဟာနနိယ ယခု​နားထောင်​လော့​။ ထာဝရဘုရား​သည် သင့်​ကို​စေလွှတ်​တော်မူ​သည်​မ​ဟုတ်​။ သင်​သည် ဤ​လူမျိုး​အား မုသား​ကို ယုံစား​စေ​ပြီ​။ 28:16 ထို့ကြောင့် ထာဝရဘုရား​က ‘​ကြည့်ရှု​လော့​။ သင်​သည် ထာဝရဘုရား​အား ပုန်ကန်​ပြောဆို​သည်​ဖြစ်၍ သင့်​ကို ကမ္ဘာမြေ​ပေါ်မှ ထွက်သွား​စေ​မည်​။ ဤ​နှစ်​တွင် သင်​သေ​ရ​မည်​’​ဟူ၍ မိန့်​တော်မူ​သည်​”​ဟု ဆို​လေ​၏​။ 28:17 ထို​နှစ်​၊ သတ္တမ​လ​တွင်​ပင် ပရောဖက်​ဟာနနိယ သေဆုံး​လေ​၏​။