Library · my

Deuteronomy 27

27:1 တစ်ဖန် မောရှေ​နှင့်​အစ္စရေး​သက်ကြီးဝါကြီး​တို့​သည် လူ​တို့​အား “​ယနေ့ သင်​တို့​အား ငါ​မှာကြား​သည့် ပညတ်တော်​ရှိသမျှ​ကို​စောင့်ထိန်း​လော့​။ 27:2 သင်​တို့​သည် ဂျော်ဒန်​မြစ်​ကို​ကူး​၍ သင်​တို့​၏​ဘုရားသခင်​ထာဝရဘုရား​ပေး​တော်မူ​သော​ပြည်​သို့​ရောက်​သော​နေ့​၌ ကျောက်တုံး​ကြီး​များ​ကို​ဆင့်​၍ ထုံး​သုတ်​ရ​မည်​။ 27:3 သင်​တို့​ဘိုးဘေး​တို့​၏​ဘုရားသခင်​ထာဝရဘုရား​ကတိထား​တော်မူ​သည့်​အတိုင်း ဂျော်ဒန်​မြစ်​ကို​ကူး​၍ သင်​တို့​၏​ဘုရားသခင်​ထာဝရဘုရား​ပေး​တော်မူ​သော နို့​နှင့်​ပျားရည်​စီး​သော​ပြည်​သို့​ဝင်ရောက်​သောအခါ ဤ​တရား​စကား​ရှိသမျှ​တို့​ကို ထို​ကျောက်တုံး​များ​ပေါ်၌ ရေးသား​ထား​ရ​မည်​။ 27:4 သင်​တို့​သည် ဂျော်ဒန်​မြစ်​ကို​ကူး​ပြီးမှ ယနေ့ သင်​တို့​အား ငါ​မှာကြား​ထား​သည့်​အတိုင်း ဧဗလ​တောင်​ပေါ်၌ ထို​ကျောက်တုံး​များ​ကို​ဆင့်​၍ ထုံး​သုတ်​ရ​မည်​။ 27:5 ထို​တောင်​ပေါ်၌ သင်​တို့​၏​ဘုရားသခင်​ထာဝရဘုရား​အဖို့ ယဇ်ပလ္လင်​တည်​ရ​မည်​။ ထို​ယဇ်ပလ္လင်​ကို ကျောက်တုံး​ဖြင့် တည်​ရ​မည်​။ ကျောက်တုံး​များ​ကို သံ​လက်နက်ကိရိယာ​ဖြင့် မ​ထုဆစ်​ရ​။ 27:6 သင်​တို့​၏​ဘုရားသခင်​ထာဝရဘုရား​၏​ယဇ်ပလ္လင်​ကို သဘာဝ​ကျောက်တုံး ​များ​ဖြင့် တည်​၍ ထို​ယဇ်ပလ္လင်​ပေါ်၌ သင်​တို့​၏​ဘုရားသခင်​ထာဝရဘုရား​အား မီးရှို့ရာယဇ်​တို့​ကို ပူဇော်​ရ​မည်​။ 27:7 မိတ်သဟာယယဇ်​ကို​လည်း ပူဇော်​ရ​မည်​။ သင်​တို့​သည် ထို​တောင်​ပေါ်တွင်​စားသောက်​၍ သင်​တို့​၏​ဘုရားသခင်​ထာဝရဘုရား​၏​ရှေ့​တော်​၌ ဝမ်းမြောက်​ရ​မည်​။ 27:8 ဤ​တရား​စကား​ရှိသမျှ​တို့​ကို ထို​ကျောက်တုံး​များ​ပေါ်၌ ရှင်းလင်း​ပြတ်သား​စွာ​ရေးသား​ထား​ရ​မည်​”​ဟု မှာကြား​လေ​၏​။ 27:9 တစ်ဖန် မောရှေ​နှင့် လေဝိ​အမျိုး​ယဇ်ပုရောဟိတ်​တို့​က အစ္စရေး​လူမျိုး​အပေါင်း​တို့​အား “​အို အစ္စရေး​လူမျိုး​တို့​၊ တိတ်ဆိတ်​စွာ​နေ​၍​နားထောင်​ကြ​လော့​။ ယနေ့ သင်​တို့​သည် သင်​တို့​၏​ဘုရားသခင်​ထာဝရဘုရား​၏​လူမျိုး​တော်​ဖြစ်လာ​ကြ​ပြီ​။ 27:10 ထို့ကြောင့် သင်​တို့​သည် သင်​တို့​၏​ဘုရားသခင်​ထာဝရဘုရား​၏​စကား​တော်​ကို နားထောင်​၍ ယနေ့ သင်​တို့​အား ငါ​မိန့်မှာ​သော ကိုယ်တော်​၏​ပညတ်တော်​များ​၊ ပြဋ္ဌာန်းချက်​များ​ကို လိုက်နာ​ရ​မည်​”​ဟု ဆို​လေ​၏​။ 27:11 ထို​နေ့​၌ မောရှေ​က လူမျိုး​တော်​အား 27:12 “​သင်​တို့​သည် ဂျော်ဒန်​မြစ်​ကို​ကူး​ပြီးသည့်နောက် လူ​တို့​အား​ကောင်းချီး​စကား​ပြောကြား​သောအခါ ရှိမောင်​အမျိုး​၊ လေဝိ​အမျိုး​၊ ယုဒ​အမျိုး​၊ ဣသခါ​အမျိုး​၊ ယောသပ်​အမျိုး​၊ ဗင်္ယာမိန်​အမျိုး တို့​သည် ဂေရဇိမ်​တောင်​ပေါ်၌ ရပ်​နေ​ရ​မည်​။ 27:13 ကျိန်ခြင်းစကား​ပြောကြား​သောအခါ ရုဗင်​အမျိုး​၊ ဂဒ်​အမျိုး​၊ အာရှာ​အမျိုး​၊ ဇာဗုလုန်​အမျိုး​၊ ဒန်​အမျိုး​၊ နဿလိ​အမျိုး တို့​သည် ဧဗလ​တောင်​ပေါ်၌ ရပ်​နေ​ရ​မည်​။ 27:14 လေဝိ​အမျိုး​တို့​က အစ္စရေး​အမျိုးသား​အပေါင်း​တို့​အား 27:15 ‘​ထာဝရဘုရား​စက်ဆုပ်ရွံရှာ​တော်မူ​သော​အရာ​ဖြစ်​သည့် ရုပ်တု​ဆင်းတု​ကို လက်မှုအတတ်​ဖြင့် သွန်းလုပ်​၍ လျှို့ဝှက်​သော​နေရာ​၌​စိုက်ထူ​သော​သူ​သည် ကျိန်ဆဲ​ခြင်း​ခံရ​မည်​’​ဟု ကျယ်လောင်​သော​အသံ​ဖြင့် ဆို​ရ​မည်​။ ထိုအခါ လူ​အပေါင်း​တို့​က ‘​အာမင်​’​ဟု ပြန်ဆို​ရ​မည်​။ 27:16 ‘​မိမိ​၏​မိဘ​ကို မထီလေးစား​ပြု​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:17 ‘​မိမိ​အိမ်နီးချင်း​၏​နယ်နိမိတ်​မှတ်တိုင်​ကို​ရွှေ့​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:18 ‘​မျက်စိမမြင်​သော​သူ​ကို လမ်း​လွဲ​စေ​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:19 ‘​တိုင်းတစ်ပါးသား​၊ ဖတဆိုး​၊ မုဆိုးမ​တို့​ရ​ထိုက်​သော တရားမျှတမှု​ကို ပိတ်ပင်​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:20 ‘​မိမိ​ဖခင်​၏​မယား​နှင့်​အိပ်​ခြင်း​ဖြင့် မိမိ​ဖခင်​၏​အိပ်ရာ​ကို​ရှုတ်ချ​သော​သူ ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:21 ‘​တိရစ္ဆာန်​တစ်ကောင်ကောင်​နှင့်​မေထုန်ပြု​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:22 ‘​မိမိ​ဖခင်​၏​သမီး​၊ သို့မဟုတ် မိမိ​မိခင်​၏​သမီး​ဖြစ်​သည့် မိမိ​အစ်မ​၊ သို့မဟုတ် နှမ​နှင့် မေထုန်ပြု​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:23 ‘​မိမိ​ယောက္ခမ​နှင့်​မေထုန်ပြု​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:24 ‘​မိမိ​အိမ်နီးချင်း​ကို လျှို့ဝှက်​စွာ​သတ်​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:25 ‘​အခကြေးငွေ​ယူ​၍ အပြစ်မဲ့​သော​သူ​အား သတ်​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။ 27:26 ‘​ဤ​တရား​စကား​များ​ကို မ​လိုက်နာ​၊ မ​စောင့်ထိန်း​သော​သူ​သည် ကျိန်ဆဲ​ခြင်း​ခံရ​မည်​’​ဟု ဆို​လျှင် လူ​အပေါင်း​တို့​က ‘​အာမင်​’​ဟု ဆို​ရ​မည်​။