Library · pcm

Leviticus 21

21:1 God tell Moses: “Make yu tell di priest wey bi Aaron sons sey, ‘For pesin wey don die, make any priest nor go dirty ensef bikos e go di burial. 21:2 But if di pesin dey klose to am like en: mama, papa, sista, broda, 21:3 and en sista wey bi virgin wey nor get husband, e fit go. 21:4 E must nor dirty ensef for somebody wey rilate to am only thru marriage. 21:5 Make di priest nor barb any part for en head, shave en bear-bear or kut en body. 21:6 Dem must dey holy to dia God and nor disgrace my name, bikos na dem dey offa food ofrin to mi. 21:7 Bikos di priests dey holy, dem must nor marry ashawo or woman wey nor bi virgin or woman wey leave en husband. 21:8 Di pipol must si di priest as pesin wey dey holy, bikos na-im dey give di food ofrin to mi. I dey holy and I dey make my pipol holy. 21:9 If priest dota turn to ashawo, e dey bring disgrace for en papa; so dem go burn di girl. 21:10 “ ‘Wen dem don pour di anointin oil for High Priest head, e don dey klean to wear di garment wey priests dey wear and e must nor komb en hair or tear en garment. 21:11 E must nor go where dead body dey; e must nor make ensef unklean even for en papa or mama. 21:12 E must nor komot from di temple or enter where dead body dey, even if na en papa or mama die, bikos e don dey holy thru God anointin oil. Na mi bi Oga God. 21:13 Na only virgin di High Priest go fit marry. 21:14 E nor go marry woman wey en husband don die or wey leave en husband or woman wey dey do ashawo. En wife must bi virgin from en family. 21:15 If not, en shidren wey suppose dey holy go kon dey unklean. Na mi bi God and I don separate am as my High Priest.’ ” 21:16 God tell Moses: 21:17 “Go tell Aaron sey, ‘Make no man from en family wey get diziz, offa food ofrin to God. 21:18 Make nobody wey get diziz go offa food ofrin: dat is, doz wey blind, cripple, wey get sore or wey en body nor komplete; 21:19 man wey en hand and leg break; 21:20 man wey get hunch-back or man wey bi dwarf; man wey get diziz for eye or for en body and man wey nor gri marry. 21:21 Make nobody from Aaron family wey get diziz go offa food ofrin to God. 21:22 Di pesin fit chop di food wey dey holy well-well and di holy food wey bi God own, 21:23 but e nor go enter di holy curtain or kom near di altar, bikos e get diziz. So e nor go offa dis tins, bikos na mi bi God and I don make dem dey holy.’ ” 21:24 So dis na wetin Moses tell Aaron, en sons and all di pipol for Israel.