1 Peter 4
4:1 Since Christ don sofa for us, make wi do like am, bikos di pesin wey sofa for us nor get anytin to do with sin again,
4:2 bikos e don do wetin God wont and nor bi wetin pipol wont.
4:3 Di time wey una dey bihave like unbilivers, don pass. Dat time una live bad life; dey do bad tins; dey drink; dey do anyhow and serve juju.
4:4 Naw, doz unbilivers dey sopraiz and curse una, bikos una nor dey follow dem do bad and wiked tins again.
4:5 For di day wen Christ go judge pipol wey dey alive and doz wey don die, e go ponish dem.
4:6 Na dis make Christ prish di gospel for doz wey don die, so dat even doh e go judge dem as human being, dem go live forever as spirit thru God judgement.
4:7 Di time wen evritin go end don near. So make una dey kontrol unasef and shine una eye wen una dey pray.
4:8 As una dey do so, make una love for each oda dey strong, bikos love dey kover plenty sins.
4:9 Make una welkom pipol for una house without komplain.
4:10 God don give evribody en own gift, so make una use di gift take help each oda as good savant wey get God grace.
4:11 Pesin wey dey prish; make e prish God word well. Pesin wey dey help odas, make e do am with di pawa wey God gi-am, so dat for evritin, God go get glory thru Jesus Christ. Make all glory and pawa bi Christ own forever and ever. Amen!
4:12 My friends, make una nor sopraiz sey una dey pass thru trobol like pesin wey fire dey burn, bikos tins wey go make una fear, go must happen.
4:13 Instead, make una dey happy as una dey sofa for Christ, so dat wen God go show una en glory, belle go sweet una.
4:14 If dem curse una bikos of Christ, God don bless una bi dat, bikos God Spirit wey get glory, rest on-top una life.
4:15 But make anybody among una nor sofa, bikos e kill, tif or curse trobol.
4:16 But if yu sofa bikos yu bi Christian, make yu nor shame, but dey praiz God, bikos yu dey ansa Jesus name.
4:17 Di time for judgement don rish and e go start with God pipol. And if e start with us, wetin go happen to pipol wey nor dey obey God?
4:18 If e go hard for God pipol to dey save, den e nor go eazy for doz wey nor dey fear God.
4:19 So if yu dey sofa as God wont am, make yu trust God wey kreate yu and E nor go ever fail yu.